Sanduku la Bwana Lawekwa katika Hema

¹Wakaliingiza sanduku la Mungu, na kuliweka katikati ya hema aliyoipiga Daudi kwa ajili yake; wakatoa sadaka za kuteketezwa na sadaka za amani mbele za Mungu.[#2 Sam 6:17-19]

²Na Daudi alipokwisha kuitoa sadaka ya kuteketezwa na sadaka za amani, akawabariki watu kwa jina la BWANA.

³Kisha akawagawia kila mtu wa Israeli, wanaume kwa wanawake, kila mtu mkate wa ngano, na kipande cha nyama, na mkate wa zabibu.

⁴Akawaagiza baadhi ya Walawi kwamba watumike mbele ya sanduku la BWANA, wamfanyie ukumbusho, na shukrani, na sifa, BWANA, Mungu wa Israeli;

⁵Asafu mkuu wao, na wa pili wake Zekaria, na Yeieli, na Shemiramothi, na Yehieli, na Metithia, na Eliabu, na Benaya, na Obed-edomu, na Yeieli, wenye vinanda na vinubi; naye Asafu mwenye kupiga matoazi;

⁶nao makuhani Benaya na Yahazieli wenye baragumu daima, mbele ya sanduku la Agano la Mungu.

Daudi aimba wimbo wa shukrani

⁷Ndipo siku hiyo Daudi alipoagiza kwanza kumshukuru BWANA, kwa mkono wa Asafu na nduguze.[#2 Sam 23:1]

⁸Mshukuruni BWANA, liitieni jina lake;[#Zab 105:1; 145:1]

Wajulisheni watu matendo yake.

⁹Mwimbieni, mwimbieni nyimbo za kumsifu;[#Zab 95:1,2; 100:1]

Yatangazeni matendo yake yote ya ajabu.

¹⁰Jisifuni kwa jina lake takatifu;[#Zab 34:3; Isa 45:25]

Na ufurahi moyo wao wamtafutao BWANA.

¹¹Mtafuteni BWANA na nguvu zake;[#Amo 5:6,14]

Utafuteni uso wake siku zote.

¹²Yakumbukeni matendo yake yote ya ajabu aliyoyafanya;[#Zab 103:2; 111:2]

Miujiza yake na hukumu za kinywa chake;

¹³Enyi wazao wa Israeli, mtumishi wake,

Enyi wana wa Yakobo, wateule wake.

¹⁴Yeye, BWANA, ndiye Mungu wetu;

Duniani kote kuna hukumu zake.

¹⁵Likumbukeni agano lake milele,

Neno lile aliloviamuru vizazi elfu.

¹⁶Agano alilofanya na Abrahamu,[#Mwa 15:18; 17:2; 26:3; Neh 9:8; Ebr 6:13-18]

Na kiapo chake kwa Isaka;

¹⁷Aliyomthibitishia Yakobo kuwa amri,

Na kwa Israeli kuwa agano la milele.

¹⁸Akisema, Nitakupa wewe nchi ya Kanaani,

Iwe urithi wenu mliopimiwa;

¹⁹Mlipokuwa watu wawezao kuhesabiwa;[#Mwa 34:30; Ebr 11:13]

Naam, watu wachache na wageni ndani yake.

²⁰Mkitangatanga toka taifa hadi taifa,

Toka ufalme mmoja hadi kwa watu wengine.

²¹Hakumwacha mtu awaonee;[#Mwa 12:17; 20:3; Kut 7:15-18]

Hata wafalme aliwakemea kwa ajili yao;

²²Akisema, Msiwaguse masihi wangu,[#Zab 105:15; 1 Yoh 2:27; #16:22 Au mtiwa mafuta (tazama 1 Sam 2:10).]

Wala msiwadhuru nabii zangu.

²³Mwimbieni BWANA, nchi yote;[#Zab 47:1; 96:1]

Tangazeni wokovu wake siku baada ya siku.

²⁴Watangazieni mataifa habari za utukufu wake,[#Isa 12:4]

Na watu wote habari za maajabu yake.

²⁵Kwa kuwa BWANA ni mkuu mwenye kusifiwa sana;[#Zab 24:8; 89:6-8; Isa 40:25,26]

Na wa kuhofiwa kuliko miungu yote.

²⁶Maana miungu yote ya watu si kitu;[#Law 19:4; Zab 115:4-8; Isa 45:20; Yer 10:3; 1 Kor 8:4]

Lakini BWANA ndiye aliyezifanya mbingu.

²⁷Heshima na adhama ziko mbele zake;[#Zab 8:1]

Nguvu na furaha zipo mahali pake.

²⁸Mpeni BWANA, enyi jamaa za watu,

Mpeni BWANA utukufu na nguvu.

²⁹Mpeni BWANA utukufu wa jina lake;

Leteni sadaka, na mje mbele zake;

Mwabuduni BWANA kwa uzuri wa utakatifu;

³⁰Tetemekeni mbele zake, nchi yote.

Naam, ulimwengu umethibitika usitikisike;

³¹Mbingu na zifurahi, nchi na ishangilie;[#Isa 35:10; Lk 2:13; Ufu 14:2]

Na waseme katika mataifa, BWANA ametamalaki;

³²Bahari na ivume na vyote viijazavyo;[#Zab 96:10]

Mashamba na yashangilie na vyote vilivyomo;

³³Ndipo miti yote ya mwituni iimbe kwa furaha,

Mbele za BWANA,

Kwa maana anakuja kuihukumu nchi.

³⁴Mshukuruni BWANA kwa kuwa ni mwema;[#Zab 106:1; 107:1; 118:1]

Kwa maana fadhili zake ni za milele.

³⁵Nanyi semeni,[#Zab 106:47,48]

Ee Mungu wa wokovu wetu, utuokoe,

Utukusanye kwa kututoa katika mataifa,

Tulishukuru jina lako takatifu,

Tuzifanyie shangwe sifa zako.

³⁶Na ahimidiwe BWANA, Mungu wa Israeli, tangu milele hata milele. Na watu wote wakasema, Amina; wakamhimidi BWANA.[#1 Fal 8:15; Zab 72:18,19; Kum 27:15; Neh 8:6]

Ibada zarejeshwa tena

³⁷Basi akawaacha huko, mbele ya sanduku la Agano la BWANA, Asafu na nduguze, ili watumike mbele ya sanduku daima, kila siku kama ilivyokuwa kazi yake.

³⁸Naye Obed-edomu, pamoja na ndugu zao, sitini na wanane; Obed-edomu na mwana wa Yeduthuni, na Hosa, wawe mabawabu;

³⁹na Sadoki kuhani, na nduguze makuhani, mbele ya maskani ya BWANA katika mahali pa juu palipokuwa huko Gibeoni,[#1 Nya 21:29; 2 Nya 1:3; 1 Fal 3:4]

⁴⁰ili kumtolea BWANA sadaka za kuteketezwa juu ya madhabahu ya sadaka ya kuteketezwa daima asubuhi na jioni, naam, kulingana na yote yaliyoandikwa katika Torati ya BWANA, aliyowaamuru Israeli;[#Kut 29:38; Hes 28:3]

⁴¹na pamoja nao Hemani na Yeduthuni, na wale wengine waliochaguliwa, waliotajwa majina yao, ili kumshukuru BWANA, kwa kuwa fadhili zake ni za milele;[#2 Nya 5:13; 7:3; Ezr 3:11; Neh 9:17; Zab 25:10; 33:5; 100:5; Yer 33:11; Yoe 2:13; Lk 6:36; Yak 5:11]

⁴²na pamoja nao Hemani na Yeduthuni wenye baragumu na matoazi, kwa hao watakaovumisha sauti, na vinanda kwa ajili ya hizo nyimbo za Mungu; na hao wana wa Yeduthuni wawepo mlangoni.

⁴³Kisha watu wote wakaenda zao kila mtu nyumbani kwake; naye Daudi akarudi ili awabariki watu wa nyumbani mwake.[#2 Sam 6:19,20; Mwa 18:19; Yos 24:15]