Kufufuka kwa Kristo

¹Basi, ndugu zangu, nawaarifu ile Injili niliyowahubiria; ambayo ndiyo mliyoipokea, na katika hiyo mnasimama,

²na kwa hiyo mnaokolewa; ikiwa mnayashika sana maneno niliyowahubiria isipokuwa mliamini bure.

³Kwa maana niliwatolea ninyi hapo mwanzo yale niliyoyapokea mimi mwenyewe, ya kuwa Kristo alikufa kwa ajili ya dhambi zetu, kama yanenavyo Maandiko;[#Isa 53:5-12]

⁴na ya kuwa alizikwa; na ya kuwa alifufuka siku ya tatu, kama yanenavyo Maandiko;[#Zab 16:8-10; Mt 12:40; Mdo 2:24-32; 2 Fal 20:5; Isa 54:7; Hos 6:2; Yon 1:17]

⁵na ya kuwa alimtokea Kefa; tena na wale Kumi na Wawili;[#Mt 28:16-17; Mk 16:14; Lk 24:34,36; Yn 20:19]

⁶baadaye aliwatokea ndugu zaidi ya mia tano pamoja; katika hao wengi wanaishi hata sasa, ila baadhi yao wamelala;

⁷baadaye akamtokea Yakobo; tena na mitume wote;[#Lk 24:50]

⁸na mwisho wa watu wote, alinitokea mimi, kama ni mtu aliyezaliwa si kwa wakati wake.[#Mdo 9:3-6; 1 Kor 9:1]

⁹Maana mimi ni mdogo katika mitume, nisiyestahili kuitwa mitume, kwa sababu nililiudhi kanisa la Mungu.[#Mdo 8:3; Efe 3:8; Mt 5:19; 1 Tim 1:15]

¹⁰Lakini kwa neema ya Mungu nimekuwa hivi nilivyo; na neema yake iliyo kwangu ilikuwa si bure, bali nilizidi sana kufanya kazi kupita wao wote; wala si mimi, bali ni neema ya Mungu pamoja nami.[#2 Kor 11:5,23; 6:1]

¹¹Basi kama ni mimi, au kama ni wao, ndivyo tuhubirivyo na ndivyo mlivyoamini.

Kufufuliwa kwa mwili

¹²Basi, ikiwa Kristo anahubiriwa ya kwamba amefufuka katika wafu, mbona baadhi yenu husema kwamba hakuna kiyama ya wafu?

¹³Lakini kama hakuna kiyama ya wafu, Kristo naye hakufufuka;

¹⁴tena kama Kristo hakufufuka, basi, kuhubiri kwetu ni bure na imani yenu ni bure.

¹⁵Naam, na sisi tumeonekana kuwa mashahidi wa uongo wa Mungu; kwa maana tulimshuhudia Mungu ya kuwa alimfufua Kristo, ambaye hakumfufua, ikiwa wafu hawafufuliwi.[#Mdo 1:22; 5:32]

¹⁶Maana kama wafu hawafufuliwi, Kristo naye hakufufuka.[#1 Kor 6:14]

¹⁷Na kama Kristo hakufufuka, imani yenu ni bure; mngalimo katika dhambi zenu.

¹⁸Na hapo wao nao waliolala katika Kristo wamepotea.

¹⁹Kama tumemtumaini Kristo katika maisha haya tu, sisi tu watu wa kusikitikiwa ziadi kuliko watu wote.

²⁰Lakini sasa Kristo amefufuka katika wafu, limbuko lao waliolala.[#Kol 1:18; 1 Kor 11:30]

²¹Maana kwa kuwa mauti ililetwa na mtu, kadhalika na kiyama ya wafu ililetwa na mtu.[#Mwa 3:17-19; Rum 5:12,18]

²²Kwa kuwa kama katika Adamu wote wanakufa, kadhalika na katika Kristo wote watahuishwa.

²³Lakini kila mmoja mahali pake; limbuko ni Kristo; baadaye walio wake Kristo, atakapokuja.[#1 The 4:16; Ufu 20:5]

²⁴Hapo ndipo mwisho, atakapompa Mungu Baba ufalme wake; atakapobatilisha utawala wote, na mamlaka yote, na nguvu.[#Dan 2:44]

²⁵Maana sharti amiliki yeye, hata awaweke adui zake wote chini ya miguu yake.[#Zab 110:1; Mt 22:44]

²⁶Adui wa mwisho atakayebatilishwa ni mauti.[#Ufu 20:14; 21:4]

²⁷Kwa kuwa, Alivitiisha vitu vyote chini ya miguu yake. Lakini atakaposema, Vyote vimetiishwa, ni dhahiri ya kuwa yeye aliyemtiishia vitu vyote hayumo.[#Zab 8:6]

²⁸Basi, vitu vyote vikiisha kutiishwa chini yake, ndipo Mwana mwenyewe naye atatiishwa chini yake yeye aliyemtiishia vitu vyote, ili kwamba Mungu awe yote katika wote.

²⁹Au je! Wenye kubatizwa kwa ajili ya wafu watafanyaje? Kama wafu hawafufuliwi kamwe, kwa nini kubatizwa kwa ajili yao?

³⁰Na sisi, kwa nini tumo hatarini kila saa?[#Rum 8:36]

³¹Naam, ndugu, kwa huku kujisifu kwangu niliko nako juu yenu katika Kristo Yesu Bwana wetu, ninakufa kila siku.[#2 Kor 4:10,11]

³²Ikiwa, kwa jinsi ya kibinadamu, nilipigana na hayawani wakali kule Efeso, nina faida gani? Wasipofufuliwa wafu, na tule, na tunywe, maana kesho tutakufa.[#Isa 22:13]

³³Msidanganyike; Mazungumzo mabaya huharibu tabia njema.

³⁴Tumieni akili kama ipasavyo, wala msitende dhambi; kwa maana wengine hawamjui Mungu. Ninanena hayo niwafedheheshe.[#Rum 13:11; Efe 5:14; 1 Kor 6:5; Mdo 26:8]

Mwili wa ufufuo

³⁵Lakini labda mtu atasema, Wafu wafufuliwaje? Nao huja kwa mwili gani?

³⁶Ewe mpumbavu! Uipandayo haihuiki, isipokufa;[#Yn 12:24]

³⁷nayo uipandayo, huupandi mwili ule utakaokuwa, ila chembe tupu, ikiwa ni ya ngano au nyingineyo;

³⁸lakini Mungu huipa mwili kama apendavyo, na kila mbegu mwili wake.[#Mwa 1:11]

³⁹Nyama zote hazifanani; nyingine ni ya wanadamu, nyingine ya hayawani, nyingine ya ndege, nyingine ya samaki.

⁴⁰Tena kuna miili ya mbinguni, na miili ya duniani; lakini fahari yake ile ya mbinguni ni mbali, na fahari yake ile ya duniani ni mbali.

⁴¹Kuna fahari moja ya jua, na fahari nyingine ya mwezi, na fahari nyingine ya nyota; maana iko tofauti ya fahari hata kati ya nyota na nyota.

⁴²Hivyo ndivyo ilivyo kwa kiyama ya wafu. Hupandwa katika uharibifu; hufufuliwa katika kutoharibika;

⁴³hupandwa katika aibu; hufufuliwa katika fahari; hupandwa katika udhaifu; hufufuliwa katika nguvu;[#Flp 3:20,21]

⁴⁴hupandwa mwili wa asili; hufufuliwa mwili wa roho. Ikiwa uko mwili wa asili, na wa roho pia uko.

⁴⁵Ndivyo ilivyoandikwa, Mtu wa kwanza, Adamu, akawa kiumbe aliye hai; Adamu wa mwisho ni roho yenye kuhuisha.[#Mwa 2:7; Yn 6:63; 2 Kor 3:6,17]

⁴⁶Lakini hautangulii ule wa roho, bali ule wa asili; baadaye huja ule wa roho.

⁴⁷Mtu wa kwanza atoka katika nchi, ni wa udongo. Mtu wa pili atoka mbinguni.[#Mwa 2:7]

⁴⁸Kama alivyo yeye wa udongo, ndivyo walivyo walio wa udongo; na kama alivyo yeye wa mbinguni, ndivyo walivyo walio wa mbinguni.

⁴⁹Na kama tulivyoichukua sura yake yule wa udongo, kadhalika tutaichukua sura yake yeye aliye wa mbinguni.[#Mwa 5:3]

⁵⁰Ndugu zangu, nisemayo ni haya, ya kuwa nyama na damu haziwezi kuurithi ufalme wa Mungu; wala uharibifu kurithi kutoharibika.[#1 Kor 6:13]

⁵¹Angalieni, nawaambia ninyi siri; hatutalala sote, lakini sote tutabadilika,[#1 The 4:15-17]

⁵²kwa dakika moja, kufumba na kufumbua, wakati wa parapanda ya mwisho; maana parapanda italia, na wafu watafufuliwa, wasiwe na uharibifu, nasi tutabadilika.[#Mt 24:31; 1 The 4:16]

⁵³Maana sharti huu uharibikao uvae kutoharibika, nao huu wa kufa uvae kutokufa.[#2 Kor 5:4]

⁵⁴Basi huu uharibikao utakapovaa kutoharibika, na huu wa kufa utakapovaa kutokufa, hapo ndipo litakapokuwa lile neno lililoandikwa, Mauti imemezwa katika ushindi.[#Isa 25:8]

⁵⁵Kuko wapi, Ewe mauti, kushinda kwako? Uko wapi, Ewe mauti, uchungu wako?[#Hos 13:14; Isa 25:8]

⁵⁶Uchungu wa mauti ni dhambi, na nguvu za dhambi ni torati.[#Rum 7:13; 6:14]

⁵⁷Lakini Mungu na ashukuriwe atupaye kushinda kwa Bwana wetu Yesu Kristo.

⁵⁸Basi, ndugu zangu wapendwa, mwimarike, msitikisike, mkazidi sana kutenda kazi ya Bwana sikuzote, kwa kuwa mnajua ya kwamba taabu yenu siyo bure katika Bwana.[#2 Nya 15:7; Ufu 14:13]