Uzinzi hulichafua kanisa

¹Hakika habari imeenea ya kuwa kwenu kuna zinaa, na zinaa ya namna isiyokuwako hata katika Mataifa, kwamba mtu awe na mke wa babaye.[#Kum 22:30; Law 18:7,8]

²Nanyi mwajivuna, wala hamkusikitika, ili kwamba aondolewe miongoni mwenu huyo aliyetenda jambo hilo.

³Kwa maana kweli, nisipokuwapo kwa mwili, lakini nikiwapo kwa roho, mimi mwenyewe nimekwisha kumhukumu yeye aliyetenda jambo hilo, kana kwamba nikiwapo.[#Kol 2:5]

⁴Katika jina la Bwana wetu Yesu, ninyi mkiwa mmekusanyika pamoja na roho yangu, pamoja na uweza wa Bwana wetu Yesu;[#Mt 16:19; 18:18; 2 Kor 13:10]

⁵kumtolea Shetani mtu huyo, ili mwili uadhibiwe, ili na roho iokolewe katika siku ya Bwana Yesu.[#1 Tim 1:20; 1 Pet 4:6]

⁶Kujisifu kwenu si kuzuri. Hamjui kwamba chachu kidogo hulichachusha donge zima?[#Gal 5:9]

⁷Basi, jisafisheni, mkatoe ile chachu ya kale, mpate kuwa donge jipya, kama vile mlivyo hamkutiwa chachu. Kwa maana Pasaka wetu amekwisha kutolewa kuwa sadaka, yaani, Kristo;[#Kut 12:5,21; 13:7; Isa 53:7; 1 Pet 1:19]

⁸basi na tuifanye karamu, si kwa chachu ya kale, wala kwa chachu ya uovu na ubaya, bali kwa yasiyochachika, ndio weupe wa moyo na kweli.[#Kut 13:7; 12:3-20; Kum 16:3]

Uzinzi hauna budi kuhukumiwa

⁹Niliwaandikia katika barua yangu, kwamba msichangamane na wazinzi.[#Mt 18:17; 2 The 3:14]

¹⁰Sisemi msichangamane kabisa na wazinzi wa dunia hii, au na wenye kutamani, au na wanyang'anyi, au na wenye kuabudu sanamu; maana hapo ingewalazimu kutoka katika dunia.

¹¹Lakini, mambo yalivyo, niliwaandikia kwamba msichangamane na mtu aitwaye ndugu, akiwa ni mzinzi au mwenye kutamani au mwenye kuabudu sanamu au mtukanaji au mlevi au mnyang'anyi; mtu wa namna hii msikubali hata kula naye.[#2 The 3:6; Tit 3:10; 2 Yoh 1:10]

¹²Maana yanihusu nini kuwahukumu wale walio nje? Ninyi hamwahukumu hao walio ndani?[#Mk 4:11]

¹³Lakini hao walio nje Mungu atawahukumu. Ninyi mwondoeni yule mbaya miongoni mwenu.[#Kum 13:5; 17:7; 22:24]