Kristo mwombezi wetu

¹Watoto wangu wadogo, nawaandikia haya ili kwamba msitende dhambi. Na kama mtu akitenda dhambi tunaye Mwombezi kwa Baba, Yesu Kristo mwenye haki,[#Rum 8:34; Ebr 7:25; Yn 14:16]

²naye ndiye kafara ya upatanisho wa dhambi zetu; wala si kwa dhambi zetu tu, bali na kwa dhambi za ulimwengu wote.[#Kol 1:20; Yn 11:51]

³Na katika hili tunajua ya kuwa tumemjua yeye, ikiwa tunashika amri zake.

⁴Yeye asemaye, Nimemjua, wala hazishiki amri zake, ni mwongo, wala kweli haimo ndani yake.[#1 Yoh 1:8]

⁵Lakini yeye alishikaye neno lake, katika huyo upendo wa Mungu umekamilika kweli kweli. Katika hili twajua ya kuwa tumo ndani yake.[#Yn 14:21,23; 1 Yoh 5:3]

⁶Yeye asemaye ya kuwa anakaa ndani yake, imempasa kuenenda mwenyewe vile vile kama yeye alivyoenenda.[#Yn 13:15]

Amri mpya

⁷Wapenzi, siwaandikii amri mpya, ila amri ya zamani mliyokuwa nayo tangu mwanzo. Na hiyo amri ya zamani ni neno lile mlilolisikia.[#Yn 13:34; Mt 5:17]

⁸Tena nawaandikia amri mpya, neno lililo kweli ndani yake na ndani yenu; kwa kuwa giza linapita na ile nuru ya kweli imekwisha kung'aa.[#Rum 13:12; Yn 13:34; 15:10,12]

⁹Yeye asemaye kwamba yumo katika nuru, naye amchukia ndugu yake, yumo gizani hata sasa.[#1 Yoh 4:20]

¹⁰Yeye ampendaye ndugu yake, akaa katika nuru, wala ndani yake hamna kikwazo.[#Rum 14:13,15; Yn 11:9]

¹¹Bali yeye amchukiaye ndugu yake, yuko katika giza, tena anakwenda katika giza, wala hajui aendako, kwa sababu giza imempofusha macho.[#Yn 11:10; 12:35]

¹²Nawaandikia ninyi, watoto wadogo, kwa sababu mmesamehewa dhambi zenu, kwa ajili ya jina lake.[#1 Kor 6:11]

¹³Nawaandikia ninyi, akina baba, kwa sababu mmemjua yeye aliye tangu mwanzo. Nawaandikia ninyi, vijana, kwa sababu mmemshinda yule mwovu. Nimewaandikia ninyi, watoto, kwa sababu mmemjua Baba.[#1 Yoh 1:1]

¹⁴Nimewaandikia ninyi, akina baba, kwa sababu mmemjua yeye aliye tangu mwanzo. Nimewaandikia ninyi, vijana, kwa sababu mna nguvu, na neno la Mungu linakaa ndani yenu, nanyi mmemshinda yule mwovu.[#Efe 6:10]

¹⁵Msiipende dunia, wala mambo yaliyomo katika dunia. Mtu akiipenda dunia, kumpenda Baba hakumo ndani yake.[#Yak 4:4]

¹⁶Maana kila kilichomo duniani, yaani, tamaa ya mwili, na tamaa ya macho, na kiburi cha uzima, havitokani na Baba, bali vyatokana na dunia.[#Mit 27:20; Yak 4:16; Tit 2:12]

¹⁷Na dunia inapita, pamoja na tamaa zake, bali yeye afanyaye mapenzi ya Mungu adumu hata milele.[#Mt 7:21; 1 Pet 4:2]

Maonyo juu ya wapinga Kristo

¹⁸Watoto, ni wakati wa mwisho; na kama vile mlivyosikia kwamba mpinga Kristo yuaja, hata sasa wapinga Kristo wengi wamekwisha kuwapo. Kwa sababu hiyo tunajua ya kuwa ni wakati wa mwisho.[#Mt 24:5,24; 1 Pet 4:7; 1 Kor 10:11]

¹⁹Walitoka kwetu, lakini hawakuwa wa kwetu. Maana kama wangalikuwa wa kwetu, wangalikaa pamoja nasi. Lakini walitoka ili wafunuliwe kwamba si wote walio wa kwetu.[#Mdo 20:30; 1 Kor 11:19]

²⁰Nanyi mmepakwa mafuta na Yeye aliye Mtakatifu nanyi mnajua nyote.[#1 Kor 2:15]

²¹Sikuwaandikia ninyi kwa sababu hamwijui iliyo kweli, bali kwa sababu mnaijua, tena kwamba hapana uongo wowote utokao katika hiyo kweli.

²²Ni nani aliye mwongo ila yeye akanaye ya kuwa Yesu ni Kristo? Huyo ndiye mpinga Kristo, yeye amkanaye Baba na Mwana.

²³Kila amkanaye Mwana, hanaye Baba; amkiriye Mwana anaye Baba pia.[#1 Yoh 4:15; Yn 5:23; 15:23]

²⁴Ninyi basi, hilo mlilolisikia tangu mwanzo na likae ndani yenu. Ikiwa hilo mlilolisikia tangu mwanzo linakaa ndani yenu, ninyi nanyi mtakaa ndani ya Mwana, na ndani ya Baba.

²⁵Na hii ndiyo ahadi aliyotuahidia, yaani, uzima wa milele.

²⁶Nimewaandikia haya kuhusu habari za watu wale wanaotaka kuwapoteza.

²⁷Nanyi, mafuta yale mliyoyapata kwake yanakaa ndani yenu, wala hamna haja ya mtu kuwafundisha; lakini kama mafuta yake yanavyowafundisha habari za mambo yote, tena ni kweli wala si uongo, na kama yalivyowafundisha, kaeni ndani yake.[#Yn 14:26; 16:13; Yer 31:34]

²⁸Na sasa, watoto wadogo, kaeni ndani yake, ili kusudi, atakapofunuliwa, muwe na ujasiri, wala msiaibike mbele zake katika kuja kwake.[#1 Yoh 3:2; 4:17]

Watoto wa Mungu

²⁹Kama mkijua ya kuwa yeye ni mwenye haki, jueni ya kuwa kila atendaye haki amezaliwa na yeye.[#1 Yoh 3:7,10]