Wake na waume

¹Kadhalika ninyi wake, watiini waume zenu; kusudi, ikiwa wako wasioliamini Neno, wavutwe kwa mwenendo wa wake zao, pasipo lile Neno;[#Efe 5:22; Kol 3:18; Tit 2:5]

²wakiutazama mwenendo wenu safi, na wa hofu.[#1 Pet 2:12]

³Kujipamba kwenu, kusiwe kujipamba kwa nje, yaani, kusuka nywele; na kujitia dhahabu, na kuvalia mavazi;[#1 Tim 2:9; Isa 3:18-24]

⁴bali kuwe utu wa moyoni usioonekana, katika mapambo yasiyoharibika; yaani, roho ya upole na utulivu, iliyo ya thamani kuu mbele za Mungu.

⁵Maana hivyo ndivyo walivyojipamba wanawake watakatifu wa zamani, waliomtumaini Mungu, na kuwatii waume zao.

⁶Kama vile Sara alivyomtii Abrahamu, akamwita bwana; nanyi ni watoto wake, mfanyapo mema, pasipo kutishwa na hofu yoyote.[#Mwa 18:12; Mit 3:25]

⁷Kadhalika ninyi waume, kaeni na wake zenu kwa akili; na kumpa mke heshima, kama chombo kisicho na nguvu; maana wao pia ni warithi wa neema ya uzima, ili maombi yenu yasizuiliwe na chochote.[#Efe 5:25; Kol 3:19]

Mateso kwa ajili ya kutenda Haki

⁸Neno la mwisho ni hili; muwe na nia moja, wenye kuhurumiana, wenye kupendana kama ndugu, wasikitikivu, wanyenyekevu;[#Rum 12:16]

⁹watu wasiolipa baya kwa baya, au laumu kwa laumu; bali wenye kubariki; kwa sababu hayo ndiyo mliyoitiwa ili mrithi baraka.[#Zab 34:12-16; Yak 1:26; Mt 5:44; 1 The 5:15; 1 Pet 2:23]

¹⁰Kwa maana,[#Zab 34:12-16; Yak 1:26]

Atakaye kupenda maisha,

Na kuona siku njema,

Auzuie ulimi wake usinene mabaya,

Na midomo yake isiseme uongo.

¹¹Na aache mabaya, atende mema;

Atafute amani, aifuate sana.

¹²Kwa kuwa macho ya Bwana huwaelekea wenye haki,

Na masikio yake husikiliza maombi yao;

Bali uso wa Bwana uko juu ya watenda mabaya.

¹³Naye ni nani atakayewadhuru, mkiwa wenye juhudi katika mema?

¹⁴Lakini hata mkiteswa kwa sababu ya kutenda haki, mna heri. Msiogope kutisha kwao, wala msifadhaike; bali mtakaseni Kristo Bwana mioyoni mwenu.[#Mt 5:10; Isa 8:12-13; 1 Pet 2:20]

¹⁵Muwe tayari siku zote kumjibu kila mtu awaulizaye habari za tumaini lililo ndani yenu; lakini kwa upole na kwa heshima.[#Isa 8:13; Kol 4:6; 1 Pet 1:3,13]

¹⁶Nanyi muwe na dhamiri njema, ili katika neno lile mnalosingiziwa, watahayarishwe wale wautukanao mwenendo wenu mwema katika Kristo.[#1 Pet 2:12]

¹⁷Maana ni afadhali kuteswa kwa kutenda mema, ikiwa ndiyo mapenzi ya Mungu, kuliko kwa kutenda mabaya.[#1 Pet 2:20-24]

¹⁸Kwa maana Kristo naye aliteswa mara moja kwa ajili ya dhambi, mwenye haki kwa ajili yao wasio haki, ili atulete kwa Mungu; akauawa kimwili, lakini akahuishwa kiroho,[#Rum 6:10; Efe 2:18; Ebr 9:28; 10:10]

¹⁹ambayo kwa hiyo aliwaendea roho waliokaa kifungoni, akawahubiria;[#1 Pet 4:8]

²⁰watu wasiotii hapo zamani, wakati Mungu alipowavumilia kwa subira, siku za Nuhu, safina ilipokuwa ikitengenezwa; ambamo ndani yake wachache, yaani, watu wanane, waliokoka kwa maji.[#Mwa 6:1—7:7,17,24]

²¹Mfano wa mambo hayo ni ubatizo, unaowaokoa ninyi pia siku hizi; (siyo kuwekea mbali uchafu wa mwili, bali jibu la dhamiri safi mbele za Mungu), kwa kufufuka kwake Yesu Kristo.[#Efe 5:26; Ebr 10:22]

²²Naye yuko katika mkono wa kulia wa Mungu, amekwenda zake mbinguni, malaika na enzi na nguvu zikiisha kutiishwa chini yake.[#Efe 1:20,21; Zab 110:1; Kol 1:16]