¹Lakini nafsini mwangu nilikusudia hivi, nisije kwenu tena kwa huzuni.[#2 Kor 12:21; 1 Kor 4:21]

²Maana mimi nikiwatia huzuni, basi ni nani anifurahishaye mimi ila yeye ahuzunishwaye nami?

³Nami niliwaandikia neno lilo hilo, ili nijapo nisitiwe huzuni na wale ambao ilinipasa kuwafurahia; nikiwatumaini ninyi nyote kwamba furaha yangu ni yenu nyote pia.

⁴Maana katika dhiki nyingi na taabu ya moyo niliwaandikia nikiwa na machozi mengi; si kwamba mhuzunishwe, bali mpate kujua upendo wangu nilio nao kwenu jinsi ulivyo mwingi.[#Mdo 20:31]

Msamaha kwa mkosaji

⁵Lakini iwapo mtu amehuzunisha, hakunihuzunisha mimi tu, bali kwa sehemu (nisije nikalemea mno), amewahuzunisha ninyi nyote.[#1 Kor 5:1]

⁶Yamtosha mtu wa namna hii adhabu ile aliyopewa na walio wengi;

⁷hata kinyume cha hayo, ni afadhali mmsamehe na kumfariji, mtu kama huyo asije akamezwa katika huzuni yake ipitayo kiasi.

⁸Kwa hiyo nawasihi kumthibitishia upendo wenu.

⁹Maana niliandika kwa sababu hii pia, ili nipate wazi kwenu kwamba mmekuwa wenye kutii katika mambo yote.[#2 Kor 7:15]

¹⁰Lakini kama mkimsamehe mtu neno lolote, nami nimemsamehe; kwa maana mimi nami, ikiwa nimemsamehe mtu neno lolote, nimemsamehe kwa ajili yenu mbele za Kristo,[#Lk 10:16]

¹¹Shetani asije akapata kutushinda; kwa maana hatukosi kuzijua fikira zake.[#Lk 22:31]

Wasiwasi wa Paulo huko Troa

¹²Basi nilipofika Troa kwa ajili ya Injili ya Kristo, nikafunguliwa mlango katika Bwana,[#Mdo 20:1; 14:27; 1 Kor 16:9]

¹³sikuona raha nafsini mwangu, kwa sababu sikumwona Tito ndugu yangu, bali niliagana nao, nikaondoka kwenda Makedonia.

¹⁴Ila Mungu ashukuriwe, anayetufanya tushangilie ushindi daima katika Kristo, na kuidhihirisha harufu ya kumjua yeye kila mahali kwa kazi yetu.

¹⁵Kwa maana sisi tu manukato ya Kristo, mbele za Mungu, katika wao wanaookolewa, na katika wao wanaopotea;[#1 Kor 1:18]

¹⁶katika hao wa pili harufu ya mauti iletayo mauti; katika hao wa kwanza harufu ya uzima iletayo uzima. Naye ni nani atoshaye kwa mambo hayo?[#2 Kor 3:5,6; Lk 2:34]

¹⁷Kwa maana sisi si kama walio wengi, walichuuzao neno la Mungu; bali kama kwa weupe wa moyo, kama kutoka kwa Mungu, mbele za Mungu, twanena katika Kristo.[#2 Kor 1:12; 1 Pet 4:11]