Yakobo na Esau wakutana

¹Yakobo akainua macho yake, akaona, na tazama, Esau anakuja na watu mia nne pamoja naye. Akawagawanyia Lea, na Raheli, na wale vijakazi wawili, wana wao.[#Mwa 32:6]

²Akawaweka hao vijakazi na wana wao mbele, na Lea na wanawe nyuma yao, na Raheli na Yusufu mwisho.

³Akapita mwenyewe mbele yao, akainama mpaka nchi mara saba, hata alipomkaribia ndugu yake.[#Mwa 18:2; 42:6]

⁴Esau akaja mbio kumlaki, akamkumbatia, na kumwangukia shingoni, akambusu; nao wakalia.[#Mwa 32:28; Mit 16:1; 21:1; Yer 10:23]

⁵Akainua macho yake, akawaona wale wanawake na watoto, akauliza, Ni nani hawa walio pamoja nawe? Akasema, Ni watoto Mungu aliompa mtumwa wako kwa neema yake.[#Mwa 48:9; Zab 127:3; Isa 8:18]

⁶Ndipo wale vijakazi, na wana wao, wakakaribia wakainama.

⁷Lea naye, na wanawe, wakakaribia wakainama. Baadaye Yusufu na Raheli wakakaribia, wakainama.

⁸Akasema, Kundi hili lote nililokutana nalo, maana yake ni nini? Akasema, Ili kunipatia kibali machoni pa bwana wangu.[#Mwa 32:5,16]

⁹Esau akasema, Ninayo tele, ndugu yangu, hifadhi uliyo nayo yawe yako.

¹⁰Yakobo akasema, Sivyo; nakuomba kama nimekubalika machoni pako tafadhali upokee zawadi yangu mkononi mwangu, Hakika, kuona uso wako ni kama kuuona uso wa Mungu – maana umenipokea kwa kibali kama chake.[#Mwa 43:3; 2 Sam 3:13; 14:24-32; Mt 18:10]

¹¹Tafadhali pokea zawadi yangu iliyoletwa kwako, kwa sababu Mungu amenineemesha, na kwa sababu ninavyo hivi vyote. Akamsihi sana, naye akapokea.[#Amu 1:15; 1 Sam 25:27; 2 Fal 5:15; Flp 4:18; 2 Fal 5:23]

¹²Kisha Esau akamwambia, Twende zetu, tusafiri, nami nitakutangulia.

¹³Akamjibu, Bwana wangu anajua ya kuwa watoto ni wachanga, tena kondoo na ng'ombe nilio nao wanyonyesha. Hao wanyama wakiharakishwa siku moja, watakufa wote.

¹⁴Tafadhali bwana wangu na apite mbele ya mtumwa wake; nami nitawaongoza polepole kwa kadiri ya mwendo wa wanyama walio mbele yangu, na kwa kadiri ya mwendo wa watoto, hadi nitakapofika kwa bwana wangu huko Seiri.[#Mwa 32:3]

¹⁵Esau akasema, Basi nikuachie, baadhi ya watu walio pamoja nami. Akasema, Pana haja gani? Na nione kibali tu machoni pa bwana wangu.[#Rut 2:13]

¹⁶Basi Esau akarudi siku ile ile akishika njia yake mpaka Seiri.

¹⁷Yakobo akaendelea mpaka Sukothi. Akajijengea nyumba, akawafanyia makundi yake vibanda. Kwa hiyo jina la mahali pale pakaitwa Sukothi.[#Yos 13:27; Amu 8:5]

Yakobo afika Shekemu

¹⁸Yakobo akaja kwa amani mpaka katika mji wa Shekemu, ulio katika nchi ya Kanaani, alipokuja kutoka Padan-aramu; akapiga kambi mbele ya huo mji.[#Yn 3:23; Mdo 7:16; Yos 24:1]

¹⁹Akainunua sehemu ya nchi, alipopiga hema yake, kwa mkono wa wana wa Hamori, baba wa Shekemu, kwa vipande mia moja vya fedha.[#Yos 24:32; Yn 4:5; Mdo 7:16]

²⁰Akajenga huko madhabahu, akaiita, El-elohe-Israeli.[#Mwa 35:7; #33:20 maana yake ni Mungu, Mungu wa Israeli.]