Uovu wa wanadamu

¹Ikawa wanadamu walipoanza kuzidi usoni pa nchi na wana wa kike walizaliwa kwao,[#Ayu 1:6; 2:1]

²wana wa Mungu waliwaona hao binti za wanadamu ya kuwa ni wazuri; wakajitwalia wake wowote waliowachagua.[#2 Kor 6:18; Kum 7:3,4]

³BWANA akasema, Roho yangu haitashindana na mwanadamu milele, kwa kuwa yeye naye ni mwili; basi siku zake zitakuwa miaka mia moja na ishirini.[#Lk 19:42; Gal 5:16,17; 1 Pet 3:20; Zab 78:39]

⁴Nao Wanefili walikuwako duniani siku zile; tena, baada ya hayo, wana wa Mungu walipoingia kwa binti za wanadamu, wakazaa nao wana; hao ndio waliokuwa watu hodari zamani, watu wenye sifa.[#Hes 13:33; #6:4 maana yake ni majitu.]

⁵BWANA akaona ya kuwa maovu ya mwanadamu ni makubwa duniani na kwamba kila kusudi analowaza moyoni mwake ni baya tu siku zote.[#Rum 1:28-31; Mwa 8:21; Kum 29:19; Mit 6:18; Mt 15:19; Mt 24:37; Lk 17:26; 1 Pet 3:20]

⁶BWANA akaghairi kwa kuwa amemwumba mwanadamu duniani, akahuzunika moyo.[#Hes 23:19; 1 Sam 15:11,29; Isa 63:10; Efe 4:30]

⁷BWANA akasema, Nitamfutilia mbali mwanadamu niliyemwumba usoni pa nchi; mwanadamu na mnyama, na kitambaacho na ndege wa angani; kwa maana naghairi ya kwamba nimewaumba.

⁸Lakini Nuhu akapata neema machoni pa BWANA.[#Mwa 19:19; Kut 33:12; Lk 1:30; Mdo 7:46]

Nuhu atengeneza safina

⁹Hivi ndivyo vizazi vya Nuhu. Nuhu alikuwa mtu wa haki, mkamilifu katika vizazi vyake; Nuhu alikwenda pamoja na Mungu.[#2 Pet 2:5]

¹⁰Nuhu akazaa wana watatu wa kiume, Shemu, na Hamu, na Yafethi.

¹¹Dunia ikaharibika mbele za Mungu, dunia ikajaa dhuluma.

¹²Mungu akaiona dunia, na tazama, imeharibika; maana kila mtu duniani amepotoka.[#Zab 14:2; 33:13]

¹³Mungu akamwambia Nuhu, Mwisho wa kila kiumbe umefika mbele zangu; kwa sababu wameijaza dunia maovu, basi nitawaangamiza pamoja na dunia.[#Eze 7:2; Amo 8:2; 1 Pet 4:8]

¹⁴Jitengenezee safina ya mti wa mvinje; tengeneza vyumba ukaifunike kwa lami ndani na nje.

¹⁵Hivi ndivyo utakavyoifanya; dhiraa mia tatu urefu wa safina, dhiraa hamsini upana wake, na dhiraa thelathini kwenda juu.

¹⁶Uifanyie safina mwangaza, ukaumalize juu kiasi cha mkono mmoja; ukautie mlango wa safina katika ubavu wake; ukaifanyie dari tatu, ya chini, ya pili, na ya tatu.

¹⁷Tazama, nitaleta gharika ya maji juu ya nchi, niharibu kila kitu chenye mwili na pumzi ya uhai, kisiwepo chini ya mbingu; kila kilichoko duniani kitakufa.[#2 Pet 2:5; Rum 5:12,14]

¹⁸Lakini nitafanya agano langu nawe kuwa thabiti; nawe utaingia katika safina, wewe, na wanao, na mkeo, na wake za wanao, pamoja nawe.

¹⁹Na katika kila kilicho hai chenye mwili, wawili wa kila namna utawaleta ndani ya safina, kuwahifadhi pamoja nawe; wawe mume na mke.

²⁰Katika vyote virukavyo kwa jinsi yake, na kila namna ya mnyama kwa jinsi yake, kila kitambaacho juu ya nchi kwa jinsi yake, wawili wa kila namna watakuja kwako ili uwahifadhi.

²¹Ukajitwalie chakula cha kila namna kinacholika, ukakusanye, nacho kitakuwa ni chakula chenu na chao.[#Mwa 1:29,30]

²²Ndivyo alivyofanya Nuhu, sawasawa na vyote alivyomwamuru Mungu, hivyo ndivyo alivyofanya.[#Ebr 11:7; Mwa 7:5]