Maana ya imani

¹Basi imani ni kuwa na hakika ya mambo yatarajiwayo, ni kusadiki mambo yasiyoonekana.[#Ebr 3:14; 2 Kor 5:7]

²Maana kwa hiyo wazee wetu walishuhudiwa.

³Kwa imani twafahamu ya kuwa ulimwengu uliumbwa kwa neno la Mungu, hata vitu vinavyoonekana havikufanywa kwa vitu vilivyo dhahiri.[#Mwa 1:1; Zab 33:6,9; Yn 1:3]

Mfano wa Habili, Henoko na Nuhu

⁴Kwa imani Habili alimtolea Mungu dhabihu iliyo bora kuliko Kaini; kwa hiyo alishuhudiwa kuwa ana haki; Mungu akazishuhudia sadaka zake, na kwa hiyo, ijapokuwa amekufa, angali akinena.[#Mwa 4:3-10; Mt 23:35]

⁵Kwa imani Henoko alihamishwa, asije akaona mauti, wala hakuonekana, kwa sababu Mungu alimhamisha; maana kabla ya kuhamishwa alikuwa ameshuhudiwa kwamba amempendeza Mungu.[#Mwa 5:21-24]

⁶Lakini pasipo imani haiwezekani kumpendeza; kwa maana mtu amwendeaye Mungu lazima aamini kwamba yeye yuko, na kwamba huwapa thawabu wale wamtafutao.[#Ebr 7:25; 10:35]

⁷Kwa imani Nuhu akiisha kuonywa na Mungu katika habari za mambo yasiyoonekana bado, kwa jinsi alivyomcha Mungu, aliunda safina, apate kuiokoa nyumba yake. Na hivyo akauhukumu makosa ulimwengu, akawa mrithi wa haki ipatikanayo kwa imani.[#Mwa 6:8,9,13-22; 7:1; Rum 3:22,24; 4:20]

Imani ya Abrahamu

⁸Kwa imani Abrahamu alipoitwa aliitika, atoke aende mahali pale atakapopapata kuwa urithi; akatoka asijue aendako.[#Mwa 12:1-5]

⁹Kwa imani alikaa ugenini katika ile nchi ya ahadi, kama katika nchi isiyo yake, akikaa katika hema pamoja na Isaka na Yakobo, warithi pamoja naye wa ahadi ile ile.[#Mwa 23:4; 26:3; 35:12,27]

¹⁰Maana alikuwa akiutazamia mji wenye misingi, ambao mwenye kuubuni na kuujenga ni Mungu.

¹¹Kwa imani hata Sara mwenyewe alipokea uwezo wa kuwa na mimba; alipokuwa amepita wakati wake; kwa kuwa alimhesabu yeye aliyeahidi kuwa mwaminifu.[#Mwa 17:19; 18:11-14; 21:2]

¹²Na kwa ajili ya hayo wakazaliwa na mtu mmoja, naye alikuwa kama mfu, watu wengi kama nyota za mbinguni wingi wao, na kama mchanga ulio ufuoni, usioweza kuhesabika.[#Mwa 15:5; 22:17; 32:12; Rum 4:19]

¹³Hawa wote wakafa katika imani, walikuwa hawajazipokea zile ahadi, bali wakaziona tokea mbali na kuzishangilia, na kukiri kwamba walikuwa wageni, na wasafiri juu ya nchi.[#Mwa 23:4; 47:9; 1 Pet 1:1; 2:11; 1 Nya 29:15; Zab 39:12]

¹⁴Maana hao wasemao maneno kama hayo waonesha wazi kwamba wanatafuta nchi yao wenyewe.

¹⁵Na kama wangaliikumbuka nchi ile waliyotoka, wangalipata nafasi ya kurudi.

¹⁶Lakini sasa wanaitamani nchi iliyo bora, yaani, ya mbinguni. Kwa hiyo Mungu haoni haya kuitwa Mungu wao; maana amewatengenezea mji.[#Kut 3:6; Mk 12:26,27]

¹⁷Kwa imani Abrahamu alipojaribiwa, akamtoa Isaka awe dhabihu; na yeye aliyezipokea hizo ahadi alikuwa akimtoa mwanawe, mzaliwa pekee;[#Mwa 22:1; Yak 2:22]

¹⁸naam, yeye aliyeambiwa, Katika Isaka uzao wako utaitwa,[#Mwa 21:12]

¹⁹akihesabu ya kuwa Mungu aweza kumfufua hata kutoka kuzimu; akampata tena toka huko kwa mfano.[#Rum 4:17]

²⁰Kwa imani Isaka akawabariki Yakobo na Esau, hata kuhusu mambo yatakayokuwa baadaye.[#Mwa 27:27-29,39-40]

²¹Kwa imani Yakobo, alipokuwa karibu kufa, akambariki kila mmoja wa wana wa Yusufu, akaabudu akiegemea kichwa cha fimbo yake.[#Mwa 47:31—48:15,16,20]

²²Kwa imani Yusufu, alipokuwa amekaribia mwisho wake, alitaja habari za kutoka kwao wana wa Israeli, akaagiza kuhusu mifupa yake.[#Mwa 50:24-25; Kut 13:19]

Imani ya Musa

²³Kwa imani Musa, alipozaliwa, akafichwa miezi mitatu na wazazi wake, kwa sababu waliona kwamba ni mtoto mzuri; wala hawakuiogopa amri ya mfalme.[#Kut 2:2; 1:22]

²⁴Kwa imani Musa alipokuwa mtu mzima, akakataa kuitwa mwana wa binti Farao;[#Kut 2:10-12]

²⁵akaona ni afadhali kupata mateso pamoja na watu wa Mungu kuliko kujifurahisha katika dhambi kwa muda;

²⁶akihesabu ya kuwa kushutumiwa kwake Kristo ni utajiri mkuu kuliko hazina za Misri; kwa kuwa aliyatazamia hayo malipo.[#Zab 89:50; 69:9; Ebr 13:13; 10:34,35]

²⁷Kwa imani akatoka Misri, asiogope ghadhabu ya mfalme; maana alistahimili kama amwonaye yeye asiyeonekana.[#Kut 2:15; 12:51]

²⁸Kwa imani akaifanya Pasaka, na kule kunyunyiza damu, ili yule mwenye kuwaangamiza wazaliwa wa kwanza asiwaguse wao.[#Kut 12:12,13,21-30]

Imani ya mashujaa wengine Waisraeli

²⁹Kwa imani wakapita kati ya Bahari ya Shamu, kama katika nchi kavu; Wamisri walipojaribu kufanya vivyo wakatoswa.[#Kut 14:21-31]

³⁰Kwa imani kuta za Yeriko zikaanguka, zilipokwisha kuzungukwa siku saba.[#Yos 6:12-21]

³¹Kwa imani Rahabu, yule kahaba, hakuangamia pamoja na hao walioasi; kwa kuwa aliwakaribisha wale wapelelezi kwa amani.[#Yos 2:1-21; 6:17,22-25; Yak 2:25]

³²Nami niseme nini tena? Maana wakati usingenitosha kuleta habari za Gideoni na Baraka na Samsoni na Yeftha na Daudi na Samweli na za manabii;[#Amu 6:11—8:32; 4:6—5:31; 13:2—16:31; 11:1—12:7; 15:20; 1 Sam 16:1—1 Fal 2:11]

³³ambao kwa imani walishinda milki za wafalme, walitenda haki, walipata ahadi, walifunga vinywa vya simba,[#Dan 6:1-27; Amu 14:6; 1 Sam 17:34,35]

³⁴walizima nguvu za moto, waliokoka kutoka kwa makali ya upanga. Walitiwa nguvu baada ya kuwa dhaifu, walikuwa hodari katika vita, walikimbiza majeshi ya wageni.[#Dan 3:1-30]

³⁵Wanawake walipokea wafu wao waliofufuliwa. Lakini wengine waliumizwa vibaya hata kuuawa, wasikubali ukombozi, ili wapate ufufuo ulio bora;[#1 Fal 17:17-24; 2 Fal 4:25-37]

³⁶wengine walijaribiwa kwa dhihaka na mapigo, naam, kwa minyororo, na kwa kutiwa gerezani;[#1 Fal 22:26-27; 2 Nya 18:25-26; Yer 20:2; 37:15; 38:6]

³⁷walipigwa kwa mawe, walikatwa kwa misumeno, walijaribiwa, waliuawa kwa upanga; walizungukazunguka wakivaa ngozi za kondoo na ngozi za mbuzi; walikuwa wahitaji, wakiteswa, wakitendwa mabaya;[#2 Nya 24:21]

³⁸(watu ambao ulimwengu haukustahili kuwa nao), walikuwa wakizungukazunguka katika nyika na katika milima na katika mapango na katika mashimo ya nchi.

³⁹Na watu hao wote wakiisha kushuhudiwa kwa sababu ya imani yao, hawakuipokea ahadi;

⁴⁰kwa kuwa Mungu alikuwa ametangulia kutuwekea sisi kitu kilicho bora, ili wao wasikamilishwe pasipo sisi.