Musa ni mtumishi, Kristo ni Mwana

¹Kwa hiyo, ndugu watakatifu, wenye kuushiriki mwito wa mbinguni, mtafakarini sana Mtume na Kuhani Mkuu wa maungamo yetu, Yesu,[#Ebr 4:14]

²aliyekuwa mwaminifu kwake yeye aliyemweka, kama Musa naye alivyokuwa, katika nyumba yote ya Mungu.[#Hes 12:7]

³Kwa maana huyo amehesabiwa kuwa amestahili utukufu zaidi kuliko Musa, kama vile yeye aitengenezaye nyumba alivyo na heshima zaidi ya hiyo nyumba.

⁴Maana kila nyumba imetengenezwa na mtu; ila yeye aliyevitengeneza vitu vyote ni Mungu.

⁵Na Musa kweli alikuwa mwaminifu katika nyumba yote ya Mungu kama mtumishi, awe ushuhuda wa mambo yatakayonenwa baadaye;[#Hes 12:7]

⁶bali Kristo, kama mwana, juu ya nyumba ya Mungu; ambaye nyumba yake ni sisi, kama tukishikamana sana na ujasiri wetu na fahari ya tumaini letu mpaka mwisho.[#Efe 2:19; Kol 1:23]

Onyo juu ya kutoamini

⁷Kwa hiyo, kama anenavyo Roho Mtakatifu,[#Zab 95:7-11]

Leo, kama mkisikia sauti yake,

⁸Msifanye mioyo yenu kuwa migumu,[#Kut 17:7; Hes 20:2-5]

Kama wakati wa kuasi,

Siku ya kujaribiwa katika jangwa,

⁹Hapo baba zenu waliponijaribu, wakanipima,

Wakaona matendo yangu miaka arubaini.

¹⁰Kwa hiyo nilichukizwa na kizazi hiki,

Nikasema, Sikuzote ni watu waliopotoka mioyo hawa;

Hawakuzijua njia zangu;

¹¹Kama nilivyoapa kwa hasira yangu,[#Hes 14:21-23]

Hawataingia rahani mwangu.

¹²Hadharini, ndugu zangu, usiwepo katika mmoja wenu moyo mbovu wa kutoamini, ujitengao na Mungu aliye hai.

¹³Lakini mwonyane kila siku, maadamu inaitwa leo; ili mmoja wenu asifanywe mgumu kwa udanganyifu wa dhambi.[#1 The 5:11]

¹⁴Kwa maana tumekuwa washirika wa Kristo, kama tukishikamana na mwanzo wa uthabiti wetu kwa nguvu mpaka mwisho;[#Ebr 6:11; 11:1]

¹⁵kama inenwavyo,[#Zab 95:7-8]

Leo, kama mkisikia sauti yake,

Msifanye mioyo yenu kuwa migumu,

Kama wakati wa kuasi.

¹⁶Maana ni akina nani walioasi, waliposikia? Si wale wote waliotoka Misri wakiongozwa na Musa?[#Hes 14:1-35; Kut 17:1]

¹⁷Tena ni akina nani aliochukizwa nao miaka arubaini? Si wale waliokosa, ambao mizoga yao ilianguka katika jangwa?[#Hes 14:29; 1 Kor 10:10]

¹⁸Tena ni akina nani aliowaapia ya kwamba hawataingia katika pumziko lake, ila wale walioasi?[#Hes 14:22,23]

¹⁹Basi twaona ya kuwa hawakuweza kuingia kwa sababu ya kutoamini kwao.