Yudithi anakuwa mgeni wa Holofene

¹Akaamuru apelekwe mezani vilipowekwa vyombo vyake vya fedha, akaandaliwe chakula katika vyakula vyake yeye, na kupewa mvinyo yake anywe.

²Yudithi akasema, La, sitakula hicho, nisije nikakosa; bali chakula changu kitengenezwe kwa vitu nilivyokuja nayvo.[#Dan 1:8; Estk 4:17w]

³Holofene akamwambia, Lakini kama vile vitu ulivyo navyo vikipungua, tutawezaje kukupatia vingine, madhali kwetu hakuna mtu wa taifa lako?

⁴Yudithi akamwambia, Bwana wangu, roho yangu iishivyo, mtumishi wako hatavimaliza vile vitu nilivyo navyo hata BWANA atimize kwa mkono wangu yale mambo aliyoyakusudia.

⁵Watumishi wa Holofene wakampeleka hemani, akalala hata usiku wa manane,

⁶hata wakati wa alfajiri alituma mtu kwa Holofene kusema, Sasa bwana wangu atoe amri wamruhusu mtumishi wako aondoke akasali.

⁷Holofene akawaagiza walinzi wake wasimzuie. Akakaa kambini siku tatu, akiondoka kila siku kwenda katika bonde la Bethulia, na kunawa kisimani.

⁸Alipotoka alimwomba Mungu wa Israeli ainyoshe njia yake apate kuwainua wana wa taifa lake.

⁹Akarudi ametakasika, akakaa hemani hata alipokula chakula cha jioni.

Yudithi karamuni

¹⁰Ikatokea, siku ya nne, Holofene aliwafanyia karamu watumsihi wake mwenyewe tu, wala hakuwaalika maakida wake.

¹¹Akamwambia Bagoa, towashi, aliyekuwa juu ya vitu vyake vyote, nenda sasa, umshawishi yule bibi wa Kiebrania aliyepo kwenu aje kwetu, kula na kunywa pamoja nasi.

¹²Maana ni aibu kwetu tukimwacha mwanamke kama huyu aondoke bila kuzungumza naye. Na kama tusipomkaribisha kwetu atatudharau.

¹³Bagoa akatoka mbele ya Holofene, akamwendea, akasema, Msichana mwema asiogope kumjia bwana wangu na kuheshimiwa mbele yake, na kunywa divai na kufurahi pamoja nasi, na kuwa leo kama mmoja wa binti za wana wa Ashuru wanaohudumu katika nyumba ya Nebukadreza.

¹⁴Yudithi akamwambia, Nami ni nani nimkatae bwana wangu? Yoyote yapendezayo machoni pake nitayafanya mara; hii itakuwa furaha yangu hata siku ya kufa kwangu.

¹⁵Akaondoka, akajipamba kwa mavazi na mapambo yote ya kike; mjakazi wake akaenda akamtandikia ngozi karibu na Holofene, ndizo ngozi alizopewa na Bagoa kwa matumizi yake ya kila siku, ya kulia na kulalia.

¹⁶Yudithi akaingia akaketi, moyo wa Holofene ukamfurahia na roho yake ikachochewa, akamwonea shauku sana. Naye, tangu siku ya kwanza aliyomwona, alikuwa akitafuta nafasi ya kumbembeleza.

¹⁷Holofene akamwambia, Basi, unywe, ufurahi pamoja nasi.

¹⁸Yudithi akasema, Bwana wangu, nitakunywa, maana nafsi yangu imetukuka ndani yangu leo kuliko siku yoyote tangu kuzaliwa kwangu.

¹⁹Akatwaa vile vitu vilivyoandaliwa na mjakazi wake, akala na kunywa mbele yake.

²⁰Holofene akamfurahia sana, akanywa divai nyingi mno kuliko alivyokunywa kwa wakati mmoja katika siku yoyote tangu kuzaliwa kwake.