Hukumu juu ya Waamoni

¹Kuhusu wana wa Amoni. BWANA asema hivi, Je, Israeli hana wana? Je! Hana mrithi? Basi, mbona Malkamu anamiliki Gadi, na watu wake wanakaa katika miji yake?[#Eze 21:28-32; 25:1-7; Amo 1:13-15; Sef 2:8-11]

²Basi, kwa sababu hiyo, tazama, siku zinakuja, asema BWANA, nitakapofanya kishindo cha vita kisikike juu ya Raba, mji wa Amoni, nao utakuwa magofu ya ukiwa, na binti zake watateketezwa kwa moto; ndipo Israeli watawamiliki wao waliokuwa wakimmiliki, asema BWANA.[#Amo 1:14]

³Omboleza, Ee Heshboni,[#Isa 32:11; Yer 48:7]

Kwa maana Ai umeangamizwa;

Lieni, enyi binti za Raba,

Mjivike nguo za magunia;

Ombolezeni, mkipiga mbio

Huko na huko kati ya maboma;

Maana Malkamu atakwenda kuhamishwa,

Makuhani wake na wakuu wake pamoja.

⁴Mbona unajisifu kwa sababu ya mabonde, bonde lako litiririkalo, Ee binti mwenye kuasi? Utumainiaye hazina zako, ukisema, Ni nani atakayenijia?[#Yer 21:13]

⁵Tazama, nitaleta hofu juu yako, asema Bwana, BWANA wa majeshi, itakayotoka kwa wote wakuzungukao; nanyi mtafukuzwa nje, kila mtu mbali kabisa, wala hapana mtu wa kuwakusanya wapoteao.

⁶Lakini baada ya hayo nitawarudisha wana wa Amoni walio utumwani, asema BWANA.[#Yer 48:47]

Hukumu juu ya Edomu

⁷Kuhusu Edomu. BWANA wa majeshi asema hivi, Je! Hakuna tena hekima katika Temani? Mashauri yamewapotea wenye busara? Je! Imetoweka hekima yao?[#Amo 1:11; Ayu 5:12-14; Oba 1:8; Isa 19:11]

⁸Kimbieni, rudini nyuma, kaeni chini sana, enyi mnaokaa Dedani; maana nitaleta msiba wa Esau juu yake, wakati nitakapomwangalia.[#Isa 2:19; Yer 25:23]

⁹Je! Kama wachuma zabibu wangekujia, wasingeacha zabibu ziokotwe? Kama wangekujia wezi usiku, wasingeharibu hata watakapopata vya kutosha?[#Isa 17:6]

¹⁰Lakini nimemwacha akiwa hana kitu Esau, nimepafunua mahali pake pa siri, wala hataweza kujificha; kizazi chake kimeangamizwa, na ndugu zake, na jirani zake, naye mwenyewe hayuko.[#Isa 17:14]

¹¹Waache watoto wako wasio na baba, mimi nitawahifadhi hai, na wajane wako na wanitumaini mimi.

¹²Maana BWANA asema hivi, Tazama, wale wasioandaliwa kunywea kikombe, watakinywea, ni hakika; na wewe je! U mtu ambaye hataadhibiwa kabisa? Hukosi utaadhibiwa, naam, kunywa utakunywa.[#Yer 25:29; Oba 1:16]

¹³Kwa maana nimeapa kwa nafsi yangu, asema BWANA, kwamba Bozra utakuwa ajabu, na aibu, na ukiwa, na laana; na miji yake yote itakuwa ukiwa wa daima.[#Mwa 22:16; Isa 45:23; 34:6; Amo 6:8; 1:12]

¹⁴Nimepata habari kwa BWANA,[#Oba 1:1,2]

Na mjumbe ametumwa kati ya mataifa,

Akisema, Jikusanyeni, mkaujie,

Mkainuke kwenda vitani.

¹⁵Maana nimekufanya mdogo kati ya mataifa,

Na kudharauliwa katika watu.

¹⁶Kuhusu kuogofya kwako,[#Ayu 39:27; Mit 15:25; Amo 9:2]

Kiburi cha moyo wako kimekudanganya,

Wewe ukaaye katika pango za majabali,

Ushikaye kilele cha milima;

Ujapofanya kiota chako juu sana kama tai,

Nitakushusha kutoka huko; asema BWANA.

¹⁷Na Edomu atakuwa ajabu; kila mtu apitaye atashangaa, na kuzomea, kwa sababu ya mapigo yake yote.[#Yer 18:16; 50:13]

¹⁸Kama vile vilivyotokea wakati wa kuangushwa Sodoma na Gomora, na miji iliyokuwa karibu nayo, asema BWANA; hapana mtu atakayekaa huko, wala hapana mwanadamu atakayekaa huko kama mgeni akaavyo.[#Mwa 19:24-25; Kum 29:23; Yer 50:40; Amo 4:11]

¹⁹Angalia, atapanda kama simba toka kiburi cha Yordani juu ya malisho yasiyonyauka; lakini nitamkimbiza ghafla ayaache; na yeye aliye mteule nitamweka juu yake; maana ni nani aliye kama mimi? Tena ni nani atakayeniandikia muda? Tena ni mchungaji yupi atakayesimama mbele zangu?[#Yer 4:17; 12:5; Zek 11:3; Kut 15:11; Zab 89:6-8; Ayu 41:10]

²⁰Basi, lisikieni shauri la BWANA;[#Yer 50:45]

Alilolifanya juu ya Edomu;

Na makusudi yake aliyoyakusudia

Juu yao wakaao Temani;

Hakika watawaburura, naam, wadogo wa kundi;

Hakika malisho yao yatafadhaika kwa ajili yao.

²¹Nchi yatetemeka kwa sauti ya kuanguka kwao;

Kuna kilio, sauti yake yasikiwa katika Bahari ya Shamu.

²²Tazama, atapanda na kuruka kama tai, na kutandaza mabawa yake juu ya Bozra; na mioyo ya mashujaa wa Edomu siku hiyo itakuwa kama moyo wa mwanamke akiwa katika uchungu wa kujifungua.[#Yer 4:13]

Hukumu juu ya Dameski

²³Kuhusu Dameski.[#Isa 17:1-3; Amo 1:3-5; Zek 9:1]

Hamathi umetahayarika, na Arpadi pia;

Maana wamesikia habari mbaya;

Wameyeyuka kabisa;

Wamesumbuka kama bahari, isiyoweza kutulia.

²⁴Dameski umedhoofika;[#Isa 13:8]

Umejigeuza kukimbia; tetemeko limeushika;

Dhiki na huzuni zimeupata,

Kama za mwanamke katika uchungu wake.

²⁵Imekuwaje mji wa sifa haukuachwa, mji wa furaha yangu?[#Yer 51:41]

²⁶Kwa hiyo vijana wake wataanguka katika njia zake kuu, na watu wote wa vita watanyamazishwa katika siku hiyo, asema BWANA wa majeshi.

²⁷Nami nitawasha moto katika ukuta wa Dameski, nao utayateketeza majumba ya Ben-hadadi.[#Amo 1:4; 2 Fal 13:3]

Hukumu juu ya Kedari na Hazori

²⁸Kuhusu Kedari, na falme za Hazori, ambazo Nebukadneza, mfalme wa Babeli, alizipiga. BWANA asema hivi, Ondokeni, pandeni hadi Kedari, mkawateke nyara wana wa mashariki.[#Ayu 1:3]

²⁹Hema zao na makundi yao watayatwaa; watachukulia mbali mapazia yao kwa faida yao wenyewe, na vyombo vyao vyote, na ngamia wao; nao watawapigia kelele wakisema, Hofu ziko pande zote.[#Zab 120:5]

³⁰Kimbieni ninyi, nendeni mbali mkitangatanga, kaeni chini sana, enyi mkaao Hazori, asema BWANA; maana Nebukadneza, mfalme wa Babeli, amefanya shauri juu yenu, naye amekusudia neno juu yenu.

³¹Ondokeni, pandeni hata taifa lililo katika hali ya raha, likaalo bila kuhangaika, asema BWANA; wasio na malango wala makomeo, wakaao peke yao.[#Hes 23:9; Kum 33:28; Amu 18:28; Mik 7:14]

³²Na ngamia wao watakuwa mateka, na wingi wa makundi yao utakuwa nyara; nami nitawatawanya katika pande zote watu wale wanyoao denge; nami nitaleta msiba wao toka pande zao zote, asema BWANA.[#Kum 28:64; Eze 5:10; Yer 25:23]

³³Na Hazori utakuwa kao la mbwamwitu; ukiwa milele; hakuna mtu atakayekaa huko, wala hakuna mwanadamu atakayekaa huko kama mgeni akaavyo.[#Yer 9:11; Mal 1:3]

Hukumu juu ya Elamu

³⁴Neno la BWANA lililomjia Yeremia, nabii, juu ya Elamu, mwanzo wa kumiliki kwake Sedekia, mfalme wa Yuda, kusema,[#Mwa 10:22; Yer 25:25]

³⁵BWANA wa majeshi asema hivi, Tazama nitauvunja upinde wa Elamu, ulio mkuu katika nguvu zao.[#Mwa 14:1; Ezr 4:9; Isa 21:2; Dan 8:2]

³⁶Na juu ya Elamu nitazileta pepo nne, toka pembe nne za mbinguni, nami nitawatawanya katika pande zote nne, wala hakuna taifa ambalo hawatalifikia watu wa Elamu waliofukuzwa.

³⁷Nami nitawafadhaisha watu wa Elamu mbele ya adui zao, na mbele ya hao wanaowatafuta roho zao; nami nitawaletea mabaya, naam, hasira yangu kali, asema BWANA; nami nitautuma upanga uwafuatie, hadi nitakapowaangamiza;[#Yer 48:2]

³⁸nami nitaweka kiti changu cha enzi huko Elamu, nami nitawaharibu, mfalme na wakuu, watoke huko, asema BWANA.[#Yer 43:10; Dan 7:9]

³⁹Lakini itakuwa, katika siku za mwisho, nitawarudisha wafungwa wa Elamu, asema BWANA.