Miiko ya ndoa

¹BWANA akanena na Musa, na kumwambia,

²Nena na wana wa Israeli, uwaambie, Mimi ndimi BWANA, Mungu wenu.[#Kut 6:7; Eze 20:5]

³Nanyi msifanye matendo kama yale ya nchi ya Misri mlikokaa; wala msifanye matendo kama yale ya nchi ya Kanaani, nitakayowapeleka; wala msifuate amri zao hao.[#Eze 23:8; Kut 23:24]

⁴Mtayatii maagizo yangu, na mtazishika amri zangu, ili kuzifuata; mimi ndimi BWANA Mungu wenu.

⁵Kwa ajili ya hayo mtazishika amri zangu na maagizo yangu yeyote atakayefanya hivyo ataishi; mimi ndimi BWANA.[#Neh 9:29; Eze 18:9; 20:11-13; Lk 10:28; Rum 10:5; Gal 3:12; Isa 44:6; Yer 9:24; Mal 3:6]

⁶Mtu yeyote miongoni mwenu asimkaribie mwenziwe aliye wa jamaa yake ya karibu ili kumfunua utupu; mimi ndimi BWANA.

⁷Utupu wa baba yako, wala utupu wa mama yako, usifunue, maana ndiye mama yako; usifunue utupu wake.

⁸Utupu wa mke wa baba yako, usifunue; maana, ni utupu wa baba yako.[#Law 20:11; Kum 22:30; 27:20; Mwa 49:4; 1 Kor 5:1]

⁹Utupu wa dada yako, binti ya baba yako, au binti ya mama yako, awe alizaliwa nyumbani mwenu au kwingine, utupu wa hao usifunue.[#Law 20:17; Kum 27:22; 2 Sam 13:12]

¹⁰Utupu wa binti ya mwanao wa kiume, au wa binti ya binti yako, utupu wao hao usifunue; kwa kuwa ni utupu wako mwenyewe.

¹¹Utupu wa binti ya mkewe baba yako, aliyezaliwa na baba yako, yeye ni dada yako, usifunue utupu wake.

¹²Usifunue utupu wa dada ya baba yako; maana, yeye ni jamaa wa karibu.[#Law 20:19-20]

¹³Usifunue utupu wa dada ya mama yako; maana, yeye ni jamaa ya mama yako wa karibu.

¹⁴Usifunue utupu wa ndugu ya baba yako, usimkaribie mkewe huyo; yeye ni shangazi yako.

¹⁵Usifunue utupu wa mkweo mwanamke; yeye ni mke wa mwanao; usifunue utupu wake huyo.[#Law 20:12; Mwa 38:18; Eze 22:11]

¹⁶Usifunue utupu wa mke wa nduguyo; maana, ni utupu wa nduguyo.[#Law 20:21; Mt 14:3,4; 22:24]

¹⁷Usifunue utupu wa mwanamke na binti yake; usimtwae binti ya mwanaye wa kiume, au binti ya binti yake, ili kufunua utupu wake; hao ni jamaa ya karibu; ni uovu mkuu.[#Law 20:14; Kum 27:23]

¹⁸Wala usitwae mwanamke pamoja na dada yake, awe mtesi wake, na kufunua utupu wake, dada yake akiwa hai.[#Mwa 30:15; Mal 2:15; #18:18 Au usimuoe.]

¹⁹Usimwendee mwanamke kufunua utupu wake atakapokuwa najisi kwa ajili ya hedhi.[#Law 20:18; Eze 18:6]

²⁰Usilale na mke wa mwenzio, ukajitia unajisi naye.[#Law 20:10; Mit 6:29; Mal 3:5; Mt 5:27,28; 1 Kor 6:9; Ebr 13:4]

²¹Usimtoe kafara mzawa wako yeyote kwa Moleki na ulinajisi jina la Mungu wako; mimi ndimi BWANA.[#Law 20:1-5; 2 Fal 16:3; Yer 19:5; 1 Fal 11:7,33; Eze 36:20; Mal 1:12; Isa 42:8; #18:21 Moleki ni jina la mungu aliyeabudiwa na Wakanaani, kwa kutoa dhabihu ya watoto wao kwa kuwapitisha motoni. Katika Agano Jipya ni Moloki.]

²²Usilale na mwanamume mfano wa kulala na mwanamke; ni machukizo.[#Law 20:13; Rum 1:27; 1 Tim 1:10]

²³Wala usilale na mnyama yeyote, ili kujitia unajisi kwake; wala mwanamke asisimame mbele ya mnyama ili kulala naye; ni upotovu.[#Kut 22:18; Law 20:15-16; Kum 27:21]

²⁴Msijitie unajisi katika hata mojawapo ya mambo hayo; kwa maana hayo mataifa nitakayoyatoa mbele zenu yamekuwa najisi kwa mambo hayo yote;[#Mt 15:18; 1 Kor 3:17; Kum 18:12]

²⁵nayo nchi ikawa najisi; na nikaipatiliza kwa ajili ya uovu wake, kisha ikawatema wakazi wake.[#Hes 35:34; Isa 24:5; 26:21; Yer 9:9; 16:18]

²⁶Kwa hiyo mtazishika amri zangu na maagizo yangu, wala msifanye mojawapo ya machukizo hayo; yeye aliye mzaliwa, wala mgeni aishiye kati yenu;

²⁷(kwa kuwa hao watu wa nchi wameyafanya machukizo haya yote, hao waliotangulia mbele zenu, na hiyo nchi imekuwa najisi;)

²⁸ili hiyo nchi isiwatapike na ninyi pia, hapo mtakapoitia unajisi, kama ilivyoitapika hiyo taifa iliyotangulia mbele yenu.

²⁹Kwani mtu yeyote atakayefanya mojawapo ya machukizo hayo, nafsi hizo zitakazoyafanya zitakatiliwa mbali na watu wao.

³⁰Kwa hiyo yafuateni maagizo yangu, ili kamwe msiwe na mojawapo ya tabia hizi zinazochukiza, zilizotangulia kufanywa mbele zenu; mimi ndimi BWANA, Mungu wenu.