Yesu aingia Yerusalemu kwa shangwe

¹Walipokaribia Yerusalemu karibu na Bethfage na Bethania, kukabili mlima wa Mizeituni, aliwatuma wawili katika wanafunzi wake,[#Mt 21:1-9; Lk 19:29-38; Yn 12:12-16]

²akawaambia, Nendeni mpaka kile kijiji kinachowakabili; na katika kuingia ndani yake, mara mtaona mwanapunda amefungwa, asiyepandwa na mtu bado; mfungueni, kamleteni.

³Na mtu akiwaambia, Mbona mnafanya hivi? Semeni, Bwana anamhitaji na mara atamrudisha tena hapa.[#Mk 14:14]

⁴Wakaenda zao, wakamwona mwanapunda amefungwa penye mlango, nje katika njia kuu, wakamfungua.

⁵Baadhi ya watu waliosimama huko wakawaambia, Mnafanya nini kumfungua mwanapunda?

⁶Wakawaambia kama Yesu alivyowaagiza, nao wakawaruhusu.

⁷Wakamletea Yesu yule mwanapunda, wakatandika mavazi yao juu yake; akaketi juu yake.

⁸Watu wengi wakatandaza mavazi yao njiani, na wengine matawi waliyoyakata mashambani.

⁹Nao watu waliotangulia na wale waliofuata wakapaza sauti, Hosana; ndiye mbarikiwa ajaye kwa jina la Bwana;[#Zab 118:25-26]

¹⁰umebarikiwa na ufalme ujao, wa baba yetu Daudi. Hosana juu mbinguni.

¹¹Naye akaingia Yerusalemu hata ndani ya hekalu; na alipokwisha kutazama yote pande zote, kwa kuwa ni wakati wa jioni, akatoka, akaenda Bethania pamoja na wale Kumi na Wawili.[#Mt 21:12-22; Lk 19:45-48]

Yesu aulaani mtini

¹²Siku iliyofuata walipokuwa wakitoka Bethania, aliona njaa.

¹³Akaona kwa mbali mtini wenye majani, akaenda ili labda aone kitu juu yake; na alipoufikia hakuona kitu ila majani; maana si wakati wa tini.[#Lk 3:9; 13:6-9]

¹⁴Akajibu, akauambia, Tangu leo hata milele mtu asile matunda kwako. Wanafunzi wake wakasikia.[#Mk 11:20]

Yesu atakasa hekalu

¹⁵Wakafika Yerusalemu, naye akaingia ndani ya hekalu, akaanza kuwafukuza wale waliokuwa wakiuza na kununua ndani ya hekalu, akazipindua meza za wabadili fedha, na viti vyao wauzao njiwa;[#Yn 2:14-16]

¹⁶wala hakumruhusu mtu yeyote kupitia katika hekalu akiwa amebeba kitu.

¹⁷Akafundisha, akasema, Je! Haikuandikwa, Nyumba yangu itaitwa nyumba ya sala kwa mataifa yote? Bali ninyi mmeifanya kuwa pango la wanyang'anyi.[#Isa 56:7; Yer 7:11]

¹⁸Wakuu wa makuhani na waandishi wakapata habari wakatafuta jinsi ya kumwangamiza; maana walimwogopa, kwa sababu mkutano wote walishangazwa na mafundisho yake.

¹⁹Na kulipokuwa jioni alitoka mjini.[#11:19 Makala zingine zinaongeza ‘pamoja na wanafunzi wake’.]

Fundisho kutoka kwa mtini ulionyauka

²⁰Na asubuhi walipokuwa wakipita, waliuona ule mtini umenyauka toka shinani.[#Mk 11:14]

²¹Petro akakumbuka habari yake, akamwambia, Rabi, tazama, mtini ulioulaani umenyauka.

²²Yesu akajibu, akamwambia, Mwaminini Mungu.[#Yn 14:1]

²³Amin, nawaambia, yeyote atakayeuambia mlima huu, Ng'oka ukatupwe baharini, wala asione shaka moyoni mwake, ila aamini kwamba hayo asemayo yametukia, yatakuwa yake.[#Mt 17:20; 1 Kor 13:2; Lk 17:6]

²⁴Kwa sababu hiyo nawaambia, Yoyote myaombayo mkisali, aminini ya kwamba mnayapokea, nayo yatakuwa yenu.[#Mt 7:7; Yn 14:13; 16:23]

²⁵Nanyi, kila msimamapo na kusali, sameheni, mkiwa na neno juu ya mtu; ili na Baba yenu aliye mbinguni awasamehe na ninyi makosa yenu. [[#Mt 5:23; 6:14-15]

²⁶Lakini kama ninyi hamsamehe, wala Baba yenu aliye mbinguni hatawasamehe ninyi makosa yenu.]

Yesu aulizwa juu ya mamlaka yake

²⁷Wakafika Yerusalemu tena; hata alipokuwa akitembea hekaluni, walimwendea wakuu wa makuhani, na waandishi, na wazee,[#Mt 21:23-27; Lk 20:1-8]

²⁸wakamwambia, Ni kwa mamlaka gani unatenda mambo haya? Naye ni nani aliyekupa mamlaka hii uyatende haya?

²⁹Yesu akawaambia, Nitawauliza neno moja, nanyi mnijibu, kisha nitawaambia ni kwa mamlaka gani nayatenda haya.

³⁰Ubatizo wa Yohana ulitoka mbinguni, au kwa wanadamu? Nijibuni.

³¹Wakasemezana wao kwa wao, wakisema, Kama tukisema, Ulitoka mbinguni, atasema, Mbona, basi, hamkumwamini?

³²Ila tukisema, Ulitoka kwa wanadamu – waliogopa watu; maana watu wote walimwona Yohana kuwa nabii halisi.

³³Wakamjibu Yesu, wakasema, Hatujui. Yesu akawaambia, Wala mimi siwaambii ninyi ni kwa mamlaka gani nayatenda haya.