Kufufuka kwa Yesu

¹Na sabato ilipokwisha kupita, Mariamu Magdalene na Mariamu mamaye Yakobo, na Salome walinunua manukato wapate kwenda kumpaka.[#Mt 28:1-8; Lk 24:1-12; Yn 20:1-10]

²Na alfajiri mapema, siku ya kwanza ya juma, wakaenda kaburini, jua lilipoanza kuchomoza;

³wakasemezana wao kwa wao, Ni nani atakayetuvingirishia lile jiwe mlangoni pa kaburi?

⁴Hata walipotazama, waliona ya kuwa lile jiwe limekwisha kuvingirishwa; nalo lilikuwa kubwa mno.

⁵Wakaingia kaburini wakaona kijana akiwa ameketi upande wa kulia, amevaa vazi jeupe; wakastaajabu.

⁶Naye akawaambia, Msistaajabu; mnamtafuta Yesu Mnazareti, aliyesulubiwa; amefufuka; hayupo hapa; patazameni mahali walipomweka.

⁷Lakini nendeni zenu, mkawaambie wanafunzi wake, na Petro, ya kwamba awatangulia kwenda Galilaya; huko mtamwona, kama alivyowaambia.[#Mt 26:32; Mk 14:28]

⁸Wakatoka nje, wakakimbia kutoka kaburini; kwa maana wameingiwa na hofu na mshangao; wala hawakumwambia mtu neno, maana waliogopa.

Yesu amtokea Mariamu Magdalene

[

⁹Naye alipofufuka alfajiri siku ya kwanza ya juma, alimtokea kwanza Mariamu Magdalene, ambaye alikuwa amemtoa pepo saba.[#Lk 8:2; Yn 20:11-18]

¹⁰Huyo akashika njia akawapasha habari wale waliokuwa pamoja naye, nao wapokuwa wanaomboleza na kulia.

¹¹Lakini hao waliposikia kwamba yu hai, naye amemwona, hawakuamini.

Yesu awatokea wanafunzi wawili

¹²Baada ya hayo akawatokea wawili miongoni mwao, akiwa na sura nyingine; nao walikuwa wakitembea njiani kwenda mashambani.[#Lk 24:13-35]

¹³Na hao wakaenda zao wakawapa habari wale wengine; wala hao hawakuwaamini.

Yesu awatuma wanafunzi

¹⁴Baadaye akaonekana na wale kumi na mmoja walipokuwa wakila, akawakemea kwa kutoamini kwao na ugumu wa mioyo yao, kwa kuwa hawakuwasadiki wale waliomwona alipofufuka katika wafu.[#Lk 24:36-49; Yn 20:19-23]

¹⁵Akawaambia, Nendeni ulimwenguni kote, mkaihubiri Injili kwa kila kiumbe.[#Mdo 1:8; Mt 28:18-20]

¹⁶Aaminiye na kubatizwa ataokoka; asiyeamini, atahukumiwa.[#Mdo 2:38]

¹⁷Na ishara hizi zitafuatana na hao waaminio; kwa jina langu watatoa pepo; watasema kwa lugha mpya;[#Mdo 16:18; 2:4,11; 10:46]

¹⁸watashika nyoka; hata wakinywa kitu cha kuua, hakitawadhuru kamwe; wataweka mikono yao juu ya wagonjwa, nao watapona.[#Lk 10:19; Mdo 28:3-6; Yak 5:14,15]

Kupaa kwa Yesu

¹⁹Basi Bwana Yesu, baada ya kusema nao, akachukuliwa juu mbinguni, akaketi mkono wa kulia wa Mungu.[#Mdo 1:9-11; Lk 24:50-53; 1 Tim 3:16; Zab 110:1; Mdo 7:55; 2 Fal 2:11]

²⁰Nao wale wakatoka, wakahubiri kotekote, Bwana akitenda kazi pamoja nao, na kulithibitisha lile neno kwa ishara zilizofuatana nalo.][#Ebr 2:4]