Mfano wa mpanzi

¹Akaanza kufundisha tena kando ya ziwa. Kundi kubwa sana la watu wakamkusanyikia, hata yeye akapanda katika mashua, akakaa ziwani, watu wote walikuwa katika nchi kavu kando ya ziwa.[#Mt 13:1-28; Lk 8:4-15; #Lk 5:1-3]

²Akawafundisha mambo mengi kwa mifano, akawaambia katika mafundisho yake,

³Sikilizeni; Tazama, mpanzi alitoka kwenda kupanda;

⁴ikawa alipokuwa akipanda, mbegu nyingine ilianguka kando ya njia, wakaja ndege wakaila.

⁵Nyingine ikaanguka penye mwamba, pasipokuwa na udongo mwingi; mara ikaota kwa kuwa na udongo haba;

⁶hata jua lilipozuka iliungua, na kwa kuwa haina mizizi ikanyauka.

⁷Nyingine ikaanguka penye miiba; ile miiba ikamea ikaisonga, isizae matunda.

⁸Nyingine zikaanguka penye udongo ulio mzuri, zikazaa matunda, zikimea na kukua, na kuzaa, moja thelathini, moja sitini, na moja mia.

⁹Akasema, Aliye na masikio ya kusikilia, na asikie.

Makusudi ya mifano

¹⁰Naye alipokuwa peke yake, wale watu waliomzunguka, na wale Kumi na Wawili, walimwuliza kuhusu ile mifano.

¹¹Akawaambia, Ninyi mmejaliwa kuijua siri ya ufalme wa Mungu, bali kwa wale walio nje, yote hufanywa kwa mifano,[#1 Kor 5:12]

¹²ili wakitazama watazame, wasione;[#Isa 6:9,10; Yn 12:40; Mdo 28:26]

Na wakisikia wasikie, wasielewe;

Wasije wakaongoka, na kusamehewa.

¹³Akawaambia, Hamjui mfano huu? Basi mifano yote mtaitambuaje?

¹⁴Mpanzi huyo hulipanda neno.

¹⁵Hawa ndio walio kando ya njia lipandwapo neno; nao, wakiisha kusikia, mara huja Shetani, akaliondoa lile neno lililopandwa mioyoni mwao.

¹⁶Kadhalika na hawa ndio wapandwao penye miamba, ambao kwamba wakiisha kulisikia lile neno, mara hulipokea kwa furaha;

¹⁷ila hawana mizizi ndani yao, bali hudumu muda mchache; kisha ikitokea dhiki au udhia kwa ajili ya lile neno, mara hujikwaa.

¹⁸Na hawa ndio wale wapandwao penye miiba; ni watu walisikiao lile neno,

¹⁹na shughuli za dunia, na udanganyifu wa mali, na tamaa za mambo mengine zikiingia, hulisonga lile neno, likawa halizai.[#Mk 10:23,24]

²⁰Na hawa ndio waliopandwa penye udongo ulio mzuri; ni watu walisikiao lile neno na kulipokea, na kuzaa matunda, mmoja thelathini, mmoja sitini, na mmoja mia.

Taa chini ya pishi

²¹Akawaambia, Mwaonaje? Taa huja ili kuwekwa chini ya pishi, au mvunguni? Si kuwekwa juu ya kiango?[#Lk 8:16-18; #Mt 5:15; Lk 11:33]

²²Kwa maana hakuna neno lililositirika, ila kusudi lije kudhihirika; wala hakuna lililofichwa, ila kusudi lije kutokea wazi.[#Mt 10:26; Lk 12:2]

²³Mtu akiwa na masikio ya kusikilia, na asikie.

²⁴Akawaambia, Angalieni msikialo; kipimo kile mpimacho ndicho mtakachopimiwa, na tena mtazidishiwa.[#Mt 7:2; Lk 6:38]

²⁵Kwa maana mwenye kitu atapewa, naye asiye na kitu, hata kile alicho nacho atanyang'anywa.[#Mt 13:12; 25:29; Lk 19:26]

Mfano wa mbegu inayokua

²⁶Akasema, Ufalme wa Mungu, mfano wake ni kama mtu aliyemwaga mbegu juu ya nchi;

²⁷akawa akilala na kuondoka, usiku na mchana, nayo mbegu ikamea na kukua, asivyojua yeye.[#Yak 5:7]

²⁸Maana nchi huzaa yenyewe; kwanza jani, tena suke, kisha ngano pevu katika suke.

²⁹Hata matunda yakiiva, mara atapeleka mundu, kwa kuwa mavuno yamefika.[#Yoe 3:13]

Mfano wa punje ya haradali

³⁰Akasema, Tuulinganishe na nini ufalme wa Mungu? Au tuutie katika mfano gani?[#Mt 13:31,32,34; Lk 13:18,19]

³¹Ni kama punje ya haradali, ambayo ipandwapo katika nchi, ingawa ni ndogo kuliko mbegu zote zilizo katika nchi,

³²lakini ikiisha kupandwa hukua, ikawa kubwa kuliko miti yote ya mboga, ikafanya matawi makubwa; hata ndege wa angani waweza kukaa chini ya uvuli wake.[#Dan 4:12,21; Eze 17:23; 31:6]

Matumizi ya mifano

³³Kwa mifano mingi ya namna hii alikuwa akisema nao neno lake, kwa kadiri walivyoweza kulisikia;

³⁴wala pasipo mfano hakusema nao; lakini akawaeleza wanafunzi wake mwenyewe mambo yote kwa faragha.

Yesu atuliza dhoruba

³⁵Siku hiyo kulipokuwa jioni, Yesu akawaambia, Na tuvuke mpaka ng'ambo.[#Mt 8:18,23-27; Lk 8:22-25; #4:35 Katika Kigiriki hakuna Yesu.]

³⁶Wakauacha mkutano, wakamchukua vile vile alivyokuwa katika mashua. Na mashua zingine zilikuwako pamoja naye.

³⁷Ikatokea dhoruba kuu ya upepo, mawimbi yakaipiga mashua hata ikaanza kujaa maji.

³⁸Naye mwenyewe alikuwapo katika shetri, amelala juu ya mto; wakamwamsha, wakamwambia, Mwalimu, si kitu kwako kuwa tunaangamia?

³⁹Akaamka, akaukemea upepo, akaiambia bahari, Nyamaza, utulie. Upepo ukakoma, kukawa shwari kuu.

⁴⁰Akawaambia, Mbona mmekuwa waoga? Hamna imani bado?

⁴¹Wakaingiwa na hofu kuu, wakaambiana, Ni nani huyu, basi, hata upepo na bahari humtii?