¹Basi, ndugu zangu, wapendwa wangu, ninaowaonea shauku, furaha yangu, na taji langu, hivyo simameni imara katika Bwana, wapenzi wangu.[#2 Kor 1:14; 1 The 2:19,20]

Mahimizo

²Namsihi Euodia, namsihi na Sintike, wawe na nia moja katika Bwana.

³Naam, nataka na wewe pia, mtumwa mwenzangu wa kweli, uwasaidie wanawake hao; kwa maana waliishindania Injili pamoja nami, na Klementi naye, na wale wengine waliofanya kazi pamoja nami, ambao majina yao yamo katika kitabu cha uzima.[#Zab 69:28; Lk 10:20]

⁴Furahini katika Bwana sikuzote; tena nasema, Furahini.[#Flp 3:1; 2 Kor 13:11]

⁵Upole wenu na ujulikane na watu wote. Bwana yuko karibu.[#Ebr 10:37; Yak 5:8,9]

⁶Msijisumbue kwa neno lolote; bali katika kila neno kwa kusali na kuomba, pamoja na kushukuru, haja zenu na zijulikane na Mungu.[#Mt 6:25-34; Kol 4:2; 1 Pet 5:7; Zab 145:18; Yn 14:27]

⁷Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu.[#Kol 3:15]

⁸Hatimaye, ndugu zangu, mambo yoyote yaliyo ya kweli, yoyote yaliyo ya heshima, yoyote yaliyo ya haki, yoyote yaliyo safi, yoyote yenye kupendeza, yoyote yenye sifa njema; ukiwapo wema wowote, ikiwapo sifa nzuri yoyote, yatafakarini hayo.[#Rum 12:17]

⁹Mambo mliyojifunza kwangu na kuyapokea, na kuyasikia na kuyaona kwangu, yatendeni hayo; na Mungu wa amani atakuwa pamoja nanyi.[#1 The 5:23; Rum 16:20; 1 Kor 14:33]

Shukrani kwa zawadi za Wafilipi

¹⁰Nilifurahi sana katika Bwana, kwa kuwa sasa mwisho mmehuisha tena fikira zenu kwa ajili yangu, kama vile mlivyokuwa mkinifikiri hali yangu lakini hamkupata nafasi.

¹¹Si kwamba nasema haya kwa kuwa nina mahitaji; maana nimejifunza kuwa radhi na hali yoyote niliyo nayo.[#1 Tim 6:6]

¹²Najua kudhiliwa, tena najua kufanikiwa; katika hali yoyote, na katika mambo yoyote, nimefundishwa kushiba na kuona njaa, kuwa na vingi na kupungukiwa.[#2 Kor 6:10]

¹³Nayaweza mambo yote katika yeye anitiaye nguvu.[#2 Kor 12:10; 2 Tim 4:17]

¹⁴Lakini mlifanya vema, mliposhiriki nami katika dhiki yangu.

¹⁵Nanyi pia, ninyi wenyewe mnajua, enyi Wafilipi, ya kuwa katika mwanzo wa Injili, nilipotoka Makedonia, hakuna kanisa lingine lililoshirikiana nami katika habari hii ya kutoa na kupokea, ila ninyi peke yenu.[#2 Kor 11:9]

¹⁶Kwa kuwa hata huko Thesalonike mliniletea msaada kwa mahitaji yangu, wala si mara moja.[#Mdo 17:1]

¹⁷Si kwamba nakitamani kile kipawa, bali nayatamani mazao yanayozidi kuwa mengi, katika hesabu yenu.[#1 Kor 9:11]

¹⁸Lakini ninavyo vitu vyote na kuzidi, tena nimejaa tele; nimepokea kwa mkono wa Epafrodito vitu vile vilivyotoka kwenu, harufu ya manukato, sadaka yenye kibali, impendezayo Mungu.[#Kut 29:18; Eze 20:41; Flp 2:25]

¹⁹Na Mungu wangu atawajazeni kila mnachokihitaji kwa kadiri ya utajiri wake, katika utukufu, ndani ya Kristo Yesu.

²⁰Sasa atukuzwe Mungu, Baba yetu, milele na milele. Amina.

Salamu na baraka

²¹Mnisalimie kila mtakatifu katika Kristo Yesu. Ndugu walio pamoja nami wanawasalimu.

²²Watakatifu wote wanawasalimu, hasa wao walio wa nyumbani mwa Kaisari.[#Flp 1:13]

²³Neema ya Bwana Yesu Kristo na iwe pamoja na roho zenu.