Ushauri wa mzazi

¹Wanangu, yasikilizeni mausia ya baba yenu,[#Zab 34:11; Mit 1:8]

Tegeni masikio mpate kujua ufahamu.

²Kwa kuwa nawapa mafundisho mazuri;

Msiiache sheria yangu.

³Maana nilikuwa mwana kwa baba yangu,[#2 Sam 12:24; 1 Nya 29:1]

Mpole, mpenzi wa pekee wa mama yangu.

⁴Naye akanifundisha, akaniambia,[#1 Nya 28:9; Efe 6:4]

Moyo wako uyahifadhi maneno yangu;

Shika amri zangu ukaishi.

⁵Jipatie hekima, jipatie ufahamu; usiusahau;

Wala usiyakatae maneno ya kinywa changu.

⁶Usimwache, naye atakusitiri;[#2 The 2:10]

Umpende, naye atakulinda.

⁷Bora hekima, basi jipatie hekima;[#Mt 13:44; Lk 10:42]

Naam, kwa mapato yako yote jipatie ufahamu.

⁸Umtukuze, naye atakukuza;[#1 Sam 2:30; Dan 12:3]

Atakupatia heshima, ukimkumbatia.

⁹Atakupa neema kuwa kilemba kichwani;

Na kukukirimia taji la uzuri.

Maonyo kuhusu kushika njia ya haki

¹⁰Mwanangu, sikiliza, na kuzipokea kauli zangu;

Na miaka ya maisha yako itakuwa mingi.

¹¹Nimekufundisha katika njia ya hekima;

Nimekuongoza katika mapito ya unyofu.

¹²Uendapo, hatua zako hazitadhiikika,[#Zab 18:36; 91:11; Mit 3:23; 4:19; Yer 13:16; Yn 11:9,10]

Wala ukipiga mbio hutajikwaa.

¹³Mkamate sana elimu, usimwache aende zake;

Mshike, maana yeye ni uzima wako.

¹⁴Usiingie katika njia ya waovu,

Wala usitembee katika njia ya wabaya.

¹⁵Jiepushe nayo, usipite karibu nayo,

Igeukie mbali, ukaende zako.

¹⁶Maana hawalali isipokuwa wametenda madhara;

Huondolewa usingizi, ikiwa hawakumwangusha mtu.

¹⁷Maana wao hula mkate wa uovu,

Nao hunywa divai ya ujeuri.

¹⁸Bali njia ya wenye haki ni kama nuru ing'aayo,[#Mt 5:14; Flp 2:15; 2 Sam 23:4]

Ikizidi kung'aa hata mchana mkamilifu.

¹⁹Njia ya waovu ni kama giza;[#1 Sam 2:9; Ayu 5:14; Isa 59:9,10; Yer 13:16; Yn 12:35]

Hawajui ni kitu gani kiwakwazacho.

²⁰Mwanangu, sikiliza maneno yangu;

Tega sikio lako, uzisikie kauli zangu.

²¹Zisiondoke machoni pako;

Uzihifadhi ndani ya moyo wako.

²²Maana ni uhai kwa wale wazipatao,

Na afya ya mwili wao wote.

²³Linda moyo wako kuliko yote uyalindayo;

Maana ndiko zitokako chemchemi za uzima.

²⁴Jiepushe na kinywa cha ujeuri,

Na midomo ya upotovu uiweke mbali nawe.

²⁵Macho yako yatazame mbele,

Na kope zako zitazame mbele yako sawasawa.

²⁶Ulisawazishe pito la mguu wako,[#Ebr 12:13]

Na njia zako zote zithibitike;

²⁷Usigeuke kwa kulia wala kwa kushoto;[#Isa 1:16]

Ondoa mguu wako maovuni.