Tamaa za uasherati

¹Mwanangu, yashike maneno yangu,

Na kuziweka amri zangu akiba kwako.

²Uzishike amri zangu ukaishi,[#Law 18:5; Mit 4:4; Isa 55:3; Kum 32:10]

Na sheria yangu kama mboni ya jicho lako.

³Zifunge katika vidole vyako;[#Kum 6:8; Mit 3:3; Isa 30:8; Yer 17:1; 2 Kor 3:3]

Ziandike juu ya kibao cha moyo wako.

⁴Mwambie hekima, Wewe ndiwe dada yangu;

Mwite ufahamu jamaa yako mwandani.

⁵Wapate kukulinda na malaya,

Na mwasherati akubembelezaye kwa maneno yake.

⁶Maana katika dirisha la nyumba yangu

Nilichungulia katika shubaka yake.

⁷Nikaona katikati ya wajinga,[#Mit 6:32]

Nikamtambua miongoni mwa vijana,

Kijana mmoja asiyekuwa na akili,

⁸Akipita njiani karibu na pembe yake,

Akiishika njia iendayo nyumbani kwake,

⁹Wakati wa magharibi, wakati wa jioni,[#Ayu 24:15]

Usiku wa manane, gizani.

¹⁰Na tazama, mwanamke akamkuta,[#1 Tim 2:9]

Ana mavazi ya kikahaba, mwerevu wa moyo;

¹¹Ana kelele, na ukaidi;[#1 Tim 5:13; Tit 2:5]

Miguu yake haikai nyumbani mwake.

¹²Mara yuko katika njia kuu, mara viwanjani,

Naye huotea kwenye pembe za kila njia.

¹³Basi akamshika, akambusu,

Akamwambia kwa uso usio na haya,

¹⁴Kwangu ziko sadaka za amani;

Leo hivi nimeziondoa nadhiri zangu;

¹⁵Ndiyo maana nikatoka nikulaki,

Nikutafute uso wako kwa bidii, nami nimekuona.

¹⁶Nimetandika kitanda changu, magodoro mazuri,[#Isa 19:9]

Kwa matandiko ya Kimisri yenye mistari.

¹⁷Nimetia kitanda changu manukato,

Manemane na udi na mdalasini.

¹⁸Haya, na tushibe upendo hadi asubuhi,

Tujifurahishe nafsi zetu kwa mahaba.

¹⁹Maana mume wangu hayumo nyumbani,

Amekwenda safari ya mbali;

²⁰Amechukua mfuko wa fedha mkononi;

Atarudi wakati wa mwezi mpevu.

²¹Kwa maneno yake mengi na ulaini akamshawishi,

Kwa ubembelezi wa midomo yake akamshinda.

²²Huyo akafuatana naye mara hiyo,

Kama vile ng'ombe aendavyo machinjoni;

Au mpumbavu kuadhibiwa katika pingu;

²³Hata mshale umchome maini;

Kama ndege aendaye haraka mtegoni;

Wala hajui ya kuwa ni hasara ya nafsi yake.

²⁴Basi, wanangu, nisikilizeni sasa,

Mkayaangalie maneno ya kinywa changu.

²⁵Moyo wako usizielekee njia zake,

Wala usipotee katika mapito yake.

²⁶Maana amewaangusha wengi aliowajeruhi,[#Neh 13:26]

Naam, jumla ya waliouawa naye ni wengi.

²⁷Nyumba yake ni njia ya kwenda kuzimu,[#Mit 2:18; 1 Kor 6:9,10; Ebr 13:4; Ufu 22:15]

Hushuka mpaka vyumba vya mauti.