Kunyamaza na Kusema

¹Kuna kumhoji mtu nako si wajibu; tena kuna mtu anyamazaye naye anayo busara.

²Jinsi vilivyo vizuri kumhoji mtu mahali pa kumkasirikia,

³naye akiriye atahifadhika asipate hasara.

⁴Kama towashi akitaka kumkumbatia bikira, ndivyo alivyo mtu yeyote anayetekeleza hukumu kwa ujeuri.

⁵Yuko anyamazaye akaonekana ana hekima; yuko naye mwenye maneno mengi akachukiwa.

⁶Yuko anyamazaye kwa sababu hana la kujibu; yuko naye anyamazaye ambaye anajua wakati ufaao.

⁷Mwenye hekima atanyamaza hata wakati wake utakapowadia; bali mjigamba mpumbavu ataikosa nafasi yake.

⁸Mtu wa maneno mengi atachukiza, na mwenye kujidai mamlaka nayo atakirihiwa. Mwenye hekima ya usemi atajipendekeza, bali ubishi wa wapumbavu ni kazi bure.

Pambanisho la maneno

⁹Kuna mtu aonaye nafuu katika masaibu; tena kuna faida nayo hugeuka kuwa hasara.

¹⁰Kuna kipawa kisichokufaidia; tena kuna kipawa na malipo yake ni maradufu.

¹¹Kuna unyonge utokao katika utukufu; tena yuko aliyeinuliwa kichwa kutoka unyonge.

^12-13Tena anunuaye wingi kwa haba aweza pengine kuulipia mara saba.

¹⁴Kipawa cha mpumbavu si faida kwako,

Maana macho yake ni mengi si moja.

¹⁵Atatoa kidogo tu, na kukaripia kwa wingi; atapanua kinywa chake kama mpiga mbiu; leo atatoa na kesho atataka tena; mtu wa namna hiyo ni makuruhu.

¹⁶Mpumbavu husema, mimi sina rafiki;

Sitolewi asante kwa ukarimu wangu;

¹⁷Walao mkate ni bahili wa shukrani.

Je! Mara ngapi watu wangapi watamdhihaki huyo!

Kusema Isivyofaa

¹⁸Kuteleza sakafuni si kuteleza kwa ulimi;

Kadhalika wazembe huanguka kwa ghafla.

¹⁹Hadithi iliyosimuliwa wakati usiofaa ni mfano wa mkia wa kondoo wenye mafuta uliwapo pasipo chumvi.

²⁰Katika kinywa cha mpumbavu hata mfano utakataliwa, mahali hatanena wakati ufaao.

²¹Yuko aliyezuiwa na dhiki asikose,

Atakapostarehe hataona fadhaa.

²²Pia yuko mwenye kuiharibu roho yake kwa kuona haya; pia na kwa sura ya ubaradhuli aweza kuiharibu.

²³Tena kwa kuona haya kuna mtu mwenye kumwahidia rafiki yake, na kumgeuza kuwa adui bure.

Kusema Uongo

²⁴Uongo ni waa la unajisi katika mtu;

Utakuwamo daima kinywani mwa mjinga.

²⁵Afadhali mwizi kuliko mwongo wa daima; lakini wote wawili watarithi maangamizi.

²⁶Sifa ya mwongo ni fedheha, na aibu yake inadumu daima.

Heshima na hatari ya mtu mwenye Hekima

²⁷Mwenye hekima ya usemi atajikweza,

Na mwenye busara atawapendeza wakuu.

²⁸Alimaye shamba atalundisha chungu yake iwe kubwa; tena mtu awapendezaye wakuu atasamehewa makosa.

²⁹Zawadi na vipawa vyaweza kuwapofusha hata wenye hekima, na kama kufunga mdomo kinywani hugeuzia mbali makaripio.

³⁰Hekima iliyofichika,

Na mali iliyostirika,

Mna faida gani ndani yake zote mbili?

³¹Afadhali aufichaye upumbavu,

Kuliko aifichaye hekima yake.