¹Mwenye kujilipiza kisasi ataona kisasi kutoka kwa BWANA; hakika Yeye atamfungia dhambi zake.

²Umsamehe jirani yako dhara alilokufanyia, hivyo nawe utasamehewa dhambi zako wakati utakaposali.[#Mt 6:17; Mk 11:25]

³Mwanadamu humkasirikia mwanadamu, je! Atatafuta kuponywa na BWANA?

⁴Hamrehemu mwanadamu aliye mwenzake, je! Atalalamika kwa ajili ya dhambi zake mwenyewe?

⁵Aliye mwili na damu tu huilisha hasira yake, je! Ni nani atakayempatanisha yeye kwa makosa yake?

⁶Basi kumbuka mwisho wako, uuache uadui; kumbuka uoza na mauti, ujiepushe na kutenda dhambi.

⁷Kumbuka zile amri, usikasirike na jirani yako; nawe ulikumbuke agano lake Aliye Juu, umwachilie ujinga wake.

Magomvi

⁸Acha ugomvi, nawe utazipunguza dhambi zako; maana mwenye ghadhabu kuchochea ugomvi,

⁹na mchongezi huhangaisha rafiki, hata kupenyeza hitilafu kati yao wakaao kwa amani.

¹⁰Kama zilivyo kuni zake, ndivyo moto utakavyowaka; na kama ilivyo sababu ya ugomvi, ndivyo huo utakavyozidi. Kama cheo cha mtu, kadhalika ghadhabu yake; na kama uwezo wake, kadhalika ataizidisha hasira.

¹¹Ugomvi ulioanzishwa na haraka huwasha moto, na mapigano ya ghafla humwaga damu.

Ulimi Mwovu

¹²Vuvia cheche, itawaka;

Tema juu yake, itazimika;

Na yote mawili yatoka kinywani mwako.

Ulimi

¹³Mlaani mchongezi aliye mnafiki, madhali amewaharibu wengi waliokaa kwa amani.[#Sira 51:2-6; Yak 3:5-12]

¹⁴Ulimi wa msingiziaji umewatikisa wengi, na kuwatawanya toka taifa hata taifa; umebomoa miji yenye nguvu, na kuangamiza nyumba za watu mashuhuri.

¹⁵Ulimi wa msingiziaji umewatupa nje wanawake hodari, na kuwanyima kazi zao.

¹⁶Wala yeye aliyeusikiliza haoni raha, wala hatakaa katika utulivu.

¹⁷Pigo la mjeledi huchapa ngozi, lakini pigo la ulimi laweza kuvunja mifupa.

¹⁸Ni wengi walioanguka kwa upanga, lakini wengi zaidi kwa sababu ya ulimi.

¹⁹Heri aliyesitiriwa nao, asiyeipitia ghadhabu yake asiyeivuta nira yake, wala kufungwa kwa kamba zake.

²⁰Kwa kuwa nira yake ni ya chuma, na kamba zake za shaba.

²¹Mauti uiletayo ni kufa kubaya, kuna raha kuzimuni zaidi ya na huo.

²²Huo hautatawala wenye haki, wala hawataungua katika miali ya moto wake;

²³wale waliomwacha BWANA watautumbukia, nao utawaka kati yao, usizimike. Kama simba utawashambulia, na mfano wa chui utawararua.

²⁴Tazama, ulizungushie shamba lako boma la miiba, na kufunga salama fedha yako na dhahabu;

²⁵fanya mizani na mawe kwa maneno yako, fanya mlango na komeo kwa kinywa chako.

²⁶Angalia usije ukateleza kwa ulimi wako; ukaanguka mbele yake anayekuotea.