Kuchunga Kundi la Mungu

¹Nawasihi wazee walio kwenu, mimi niliye mzee, mwenzi wao, na shahidi wa mateso ya Kristo, na mshirika wa utukufu utakaofunuliwa baadaye;[#2 Yoh 1:1; 3 Yoh 1:1; Rum 8:17; Ufu 1:9]

²lichungeni kundi la Mungu lililo kwenu, na kulisimamia, si kwa kulazimishwa, bali kwa hiari kama Mungu atakavyo; si kwa kutaka fedha ya aibu, bali kwa moyo.[#Yn 10:12; 21:15-17; Flm 1:14; Tit 1:11; Mdo 20:28; 1 Tim 3:2-7]

³Wala si kama wajifanyao mabwana juu ya mitaa yao, bali kwa kujifanya vielelezo kwa lile kundi.[#2 Kor 1:24; Tit 2:7; Flp 3:17; 1 The 1:7]

⁴Na Mchungaji mkuu atakapodhihirishwa, mtaipokea taji ya utukufu, ile isiyokauka.[#1 Pet 2:25; Ebr 13:20; 1 Kor 9:25; 2 Tim 4:8]

⁵Vivyo hivyo ninyi vijana, watiini wazee. Naam, ninyi nyote jifungeni unyenyekevu, mpate kuhudumiana; kwa sababu Mungu huwapinga wenye kiburi, lakini huwapa wanyenyekevu neema.[#Mit 3:34; Efe 5:21; Mt 23:12; Yn 13:4,14; Yak 4:6]

⁶Basi nyenyekeeni chini ya mkono wa Mungu ulio hodari, ili awakweze kwa wakati wake;[#Mt 23:12; Lk 14:11; 18:14; Ayu 22:29; Yak 4:10]

⁷huku mkimtwika yeye fadhaa zenu zote, kwa maana yeye hujishughulisha sana kwa mambo yenu.[#Zab 55:22; Mt 6:25; Flp 4:6]

⁸Mwe na kiasi na kukesha; kwa kuwa mshitaki wenu Ibilisi, kama simba angurumaye, huzunguka-zunguka, akitafuta mtu ammeze.[#1 The 5:6; Lk 18:3; Yak 4:7]

⁹Nanyi mpingeni huyo, mkiwa thabiti katika imani, mkijua ya kuwa mateso yale yale yanatimizwa kwa ndugu zenu walioko duniani.[#Efe 6:11-13]

¹⁰Na Mungu wa neema yote, aliyewaita kuingia katika utukufu wake wa milele katika Kristo, mkiisha kuteswa kwa muda kidogo, yeye mwenyewe atawatengeneza, na kuwathibitisha, na kuwatia nguvu.[#1 Pet 1:6; 1 The 2:12]

¹¹Uweza una yeye hata milele na milele. Amina.

Salamu za Mwisho na Baraka

¹²Kwa mkono wa Silwano, ndugu mwaminifu kama nionavyo, nimewaandikia kwa maneno machache, kuonya na kushuhudia ya kuwa hii ndiyo neema ya kweli ya Mungu. Simameni imara katika hiyo.[#Mdo 15:22,40; Ebr 13:22]

¹³Mwenzenu mteule hapa Babeli awasalimu, na Marko mwanangu.[#Mdo 12:12,25; 13:13; 15:37-39; Kol 4:10; Flm 1:24; 2 Tim 4:11]

¹⁴Salimianeni kwa busu la upendo.[#1 Kor 16:20]

Amani na iwe kwenu nyote, mlio katika Kristo. Amina.