Salamu

¹Yakobo, mtumwa wa Mungu, na wa Bwana Yesu Kristo, kwa kabila kumi na mbili waliotawanyika; salamu.[#Mt 13:55; Mk 6:3; Mdo 15:13,23; 1 Pet 1:1; Gal 1:19]

Imani na Hekima

²Ndugu zangu, hesabuni ya kuwa ni furaha tupu, mkiangukia katika majaribu mbalimbali;[#Rum 5:3-5; 1 Pet 1:6]

³mkifahamu ya kuwa kujaribiwa kwa imani yenu huleta saburi.[#1 Pet 1:7]

⁴Saburi na iwe na kazi kamilifu, mpate kuwa wakamilifu na watimilifu bila kupungukiwa na neno.

⁵Lakini mtu wa kwenu akipungukiwa na hekima, na aombe dua kwa Mungu, awapaye wote, kwa ukarimu, wala hakemei; naye atapewa.[#Mit 2:3-6]

⁶Ila na aombe kwa imani, pasipo shaka yo yote; maana mwenye shaka ni kama wimbi la bahari lililochukuliwa na upepo, na kupeperushwa huku na huku.[#Mk 11:24]

⁷Maana mtu kama yule asidhani ya kuwa atapokea kitu kwa Bwana.

⁸Mtu wa nia mbili husita-sita katika njia zake zote.

Umaskini na Utajiri

⁹Lakini ndugu asiye na cheo na afurahi kwa kuwa ametukuzwa;[#Yak 2:5]

¹⁰bali tajiri kwa kuwa ameshushwa; kwa maana kama ua la majani atatoweka.[#Isa 40:6-7; 1 Pet 1:24]

¹¹Maana jua huchomoza kwa hari, huyakausha majani; ua lake huanguka, uzuri wa umbo lake hupotea; vivyo hivyo naye tajiri atanyauka katika njia zake.

Majaribu na Mateso

¹²Heri mtu astahimiliye majaribu; kwa sababu akiisha kukubaliwa ataipokea taji ya uzima, Bwana aliyowaahidia wampendao.[#Dan 12:12; 2 Tim 4:8; 1 Pet 5:4; 1 Kor 9:25; Ufu 2:10]

¹³Mtu ajaribiwapo, asiseme, Ninajaribiwa na Mungu; maana Mungu hawezi kujaribiwa na maovu, wala yeye mwenyewe hamjaribu mtu.

¹⁴Lakini kila mmoja hujaribiwa na tamaa yake mwenyewe huku akivutwa na kudanganywa.[#Rum 7:7-10]

¹⁵Halafu ile tamaa ikiisha kuchukua mimba huzaa dhambi, na ile dhambi ikiisha kukomaa huzaa mauti.

¹⁶Ndugu zangu wapenzi, msidanganyike.

¹⁷Kila kutoa kuliko kwema, na kila kitolewacho kilicho kamili, hutoka juu, hushuka kwa Baba wa mianga; kwake hakuna kubadilika, wala kivuli cha kugeuka-geuka.[#1 Yoh 1:5; Mt 7:11]

¹⁸Kwa kupenda kwake mwenyewe alituzaa sisi kwa neno la kweli, tuwe kama limbuko la viumbe vyake.[#Yn 1:13; 1 Pet 1:23]

Kusikia na Kutenda Neno

¹⁹Hayo mnajua, ndugu zangu wapenzi. Basi kila mtu na awe mwepesi wa kusikia, bali si mwepesi wa kusema; wala kukasirika;[#Mhu 7:9]

²⁰kwa maana hasira ya mwanadamu haiitendi haki ya Mungu.[#Efe 4:26]

²¹Kwa hiyo wekeeni mbali uchafu wote na ubaya uzidio, na kupokea kwa upole neno lile lililopandwa ndani, liwezalo kuziokoa roho zenu.[#Kol 3:8; 1 Pet 2:1]

²²Lakini iweni watendaji wa neno, wala si wasikiaji tu, hali mkijidanganya nafsi zenu.[#Mt 7:26; Rum 2:13]

²³Kwa sababu mtu akiwa ni msikiaji wa neno tu, wala si mtendaji, mtu huyo ni kama mtu anayejiangalia uso wake katika kioo.

²⁴Maana hujiangalia, kisha huenda zake, mara akasahau jinsi alivyo.

²⁵Lakini aliyeitazama sheria kamilifu iliyo ya uhuru, na kukaa humo, asiwe msikiaji msahaulifu, bali mtendaji wa kazi, huyo atakuwa heri katika kutenda kwake.[#Yak 2:12; Rum 8:2; Yn 13:17]

²⁶Mtu akidhani ya kuwa anayo dini, wala hauzuii ulimi wake kwa hatamu, hali akijidanganya moyo wake, dini yake mtu huyo haifai.[#Zab 34:13]

²⁷Dini iliyo safi, isiyo na taka mbele za Mungu Baba ni hii, Kwenda kuwatazama yatima na wajane katika dhiki yao, na kujilinda na dunia pasipo mawaa.