Urafiki na Ulimwengu

¹Vita vyatoka wapi, na mapigano yaliyoko kati yenu yatoka wapi? Si humu, katika tamaa zenu zifanyazo vita katika viungo vyenu?[#Rum 7:23; 1 Pet 2:11]

²Mwatamani, wala hamna kitu, mwaua na kuona wivu, wala hamwezi kupata. Mwafanya vita na kupigana, wala hamna kitu kwa kuwa hamwombi!

³Hata mwaomba, wala hampati kwa sababu mwaomba vibaya, ili mvitumie kwa tamaa zenu.

⁴Enyi wazinzi, hamjui ya kwamba kuwa rafiki wa dunia ni kuwa adui wa Mungu? Basi kila atakaye kuwa rafiki wa dunia hujifanya kuwa adui wa Mungu.[#Lk 6:26; Rum 8:7; 1 Yoh 2:15]

⁵Au mwadhani ya kwamba maandiko yasema bure? Huyo Roho akaaye ndani yetu hututamani kiasi cha kuona wivu?[#Kut 20:3,5; Mt 6:24; Gal 5:17]

⁶Lakini hutujalia sisi neema iliyozidi; kwa hiyo husema, Mungu huwapinga wajikuzao, bali huwapa neema wanyenyekevu.[#Mit 3:34; Ayu 22:29; Mt 23:12; 1 Pet 5:5]

⁷Basi mtiini Mungu. Mpingeni Shetani, naye atawakimbia.[#Efe 6:12; 1 Pet 5:8,9]

⁸Mkaribieni Mungu, naye atawakaribia ninyi. Itakaseni mikono yenu, enyi wenye dhambi, na kuisafisha mioyo yenu, enyi wenye nia mbili.[#Zek 1:3; Isa 1:16]

⁹Huzunikeni na kuomboleza na kulia. Kucheka kwenu na kugeuzwe kuwa kuomboleza, na furaha yenu kuwa hamu.

¹⁰Jidhilini mbele za Bwana, naye atawakuza.[#1 Pet 5:6]

Onyo dhidi ya Kumhukumu Mwingine

¹¹Ndugu, msisingiziane; amsingiziaye ndugu yake, au kumhukumu ndugu yake, huisingizia sheria na kuihukumu sheria. Lakini ukiihukumu sheria, huwi mtenda sheria, bali umekuwa hakimu.

¹²Mtoa sheria na mwenye kuhukumu ni mmoja tu, ndiye awezaye kuokoa na kuangamiza. U nani wewe umhukumuye mtu mwingine?[#Mk 7:1; Rum 2:1; 14:4]

Kujivuna juu ya Kesho

¹³Haya basi, ninyi msemao, Leo au kesho tutaingia katika mji fulani na kukaa humo mwaka mzima, na kufanya biashara na kupata faida;[#Mit 27:1]

¹⁴walakini hamjui yatakayokuwako kesho. Uzima wenu ni nini? Maana ninyi ni mvuke uonekanao kwa kitambo, kisha hutoweka.[#Lk 12:20; Zab 39:5,11]

¹⁵Badala ya kusema, Bwana akipenda, tutakuwa hai na kufanya hivi au hivi.[#Mdo 18:21]

¹⁶Lakini sasa mwajisifu katika majivuno yenu; kujisifu kote kwa namna hii ni kubaya.

¹⁷Basi yeye ajuaye kutenda mema, wala hayatendi, kwake huyo ni dhambi.[#Lk 12:47; Rum 14:23]