Onyo kwa Matajiri Wadhalimu

¹Haya basi, enyi matajiri! Lieni, mkapige yowe kwa sababu ya mashaka yenu yanayowajia.[#Lk 6:24]

²Mali zenu zimeoza, na mavazi yenu yameliwa na nondo.[#Mt 6:19]

³Dhahabu yenu na fedha yenu zimeingia kutu, na kutu yake itawashuhudia, nayo itakula miili yenu kama moto. Mmejiwekea akiba katika siku za mwisho.[#Mit 16:27]

⁴Angalieni, ujira wa wakulima waliovuna mashamba yenu, ninyi mliouzuia kwa hila, unapiga kelele, na vilio vyao waliovuna vimeingia masikioni mwa Bwana wa majeshi.[#Kum 24:14-15; Law 19:13; Mal 3:5; Isa 5:9; Ayu 31:38-40]

⁵Mmefanya anasa katika dunia, na kujifurahisha kwa tamaa; mmejilisha mioyo yenu kama siku ya machinjo.[#Lk 16:19,25; Yer 12:3]

⁶Mmehukumu mwenye haki mkamwua; wala hashindani nanyi.

Uvumilivu katika Mateso

⁷Kwa hiyo ndugu, vumilieni, hata kuja kwake Bwana. Tazama, mkulima hungoja mazao ya nchi yaliyo ya thamani, huvumilia kwa ajili yake hata yatakapopata mvua ya kwanza na ya mwisho.[#Kum 11:14; Yoe 2:23; Zek 10:1; Yer 5:24; Lk 21:19; Ebr 10:36]

⁸Nanyi vumilieni, mthibitishe mioyo yenu, kwa maana kuja kwake Bwana kunakaribia.[#Ebr 10:25; 1 The 2:16; 3:13]

⁹Ndugu, msinung’unikiane, msije mkahukumiwa. Angalieni, mwamuzi amesimama mbele ya milango.

¹⁰Ndugu, watwaeni manabii walionena kwa jina la Bwana, wawe mfano wa kustahimili mabaya, na wa uvumilivu.[#Mt 5:12]

¹¹Angalieni, twawaita heri wao waliosubiri. Mmesikia habari ya subira yake Ayubu, mmeuona mwisho wa Bwana ya kwamba Bwana ni mwingi wa rehema, mwenye huruma.[#Ayu 1:21-22; 2:10; Zab 103:8; 111:4; Dan 12:12]

¹²Lakini zaidi ya yote, ndugu zangu, msiape, wala kwa mbingu wala kwa nchi; wala kwa kiapo kinginecho chote; bali ndiyo yenu na iwe ndiyo, na siyo yenu iwe siyo, msije mkaangukia hukumu.[#Mt 5:34-37]

Sala ya Imani

¹³Mtu wa kwenu amepatikana na mabaya? Na aombe. Ana moyo wa kuchangamka? Na aimbe zaburi.[#Zab 50:15; Kol 3:16]

¹⁴Mtu wa kwenu amekuwa hawezi? Na awaite wazee wa kanisa; nao wamwombee, na kumpaka mafuta kwa jina la Bwana.[#Mk 6:13]

¹⁵Na kule kuomba kwa imani kutamwokoa mgonjwa yule, na Bwana atamwinua; hata ikiwa amefanya dhambi, atasamehewa.[#Mk 16:18]

¹⁶Ungameni dhambi zenu ninyi kwa ninyi, na kuombeana, mpate kuponywa. Kuomba kwake mwenye haki kwafaa sana, akiomba kwa bidii.

¹⁷Eliya alikuwa mwanadamu mwenye tabia moja na sisi, akaomba kwa bidii mvua isinyeshe, na mvua haikunyesha juu ya nchi muda wa miaka mitatu na miezi sita.[#1 Fal 17:1; 18:1; Lk 4:25; Mdo 14:15]

¹⁸Akaomba tena, mbingu zikatoa mvua, nayo nchi ikazaa matunda yake.[#1 Fal 18:42-45]

¹⁹Ndugu zangu, ikiwa mtu wa kwenu amepotelea mbali na kweli, na mtu mwingine akamrejeza;[#Gal 6:1]

²⁰jueni ya kuwa yeye amrejezaye mwenye dhambi hata atoke katika njia ya upotevu, ataokoa roho na mauti, na kufunika wingi wa dhambi.[#Mit 10:12; 1 Pet 4:8; Zab 51:13]