Upendo wa Mungu Huvumilia

¹Mimi ni mtu aliyeona mateso

Kwa fimbo ya ghadhabu yake.

²Ameniongoza na kuniendesha katika giza

Wala si katika nuru.

³Hakika juu yangu augeuza mkono wake

Mara kwa mara mchana wote.

⁴Amechakaza nyama yangu na ngozi yangu;

Ameivunja mifupa yangu.

⁵Amejenga boma juu yangu,

Na kunizungusha uchungu na uchovu.

⁶Amenikalisha penye giza,[#Zab 88:5]

Kama watu waliokufa zamani.

⁷Amenizinga pande zote hata siwezi kutoka;

Ameufanya mnyororo wangu mzito.

⁸Naam, nikilia na kuomba msaada,[#Ayu 30:20; Zab 22:2]

Huyapinga maombi yangu.

⁹Ameziziba njia zangu kwa mawe yaliyochongwa;

Ameyapotosha mapito yangu.

¹⁰Alivyo kwangu ni kama dubu aoteaye,[#Hos 5:14]

Kama simba aliye mafichoni.

¹¹Amezigeuza njia zangu, na kunirarua-rarua;[#Hos 6:1]

Amenifanya ukiwa.

¹²Ameupinda upinde wake,[#Ayu 6:4; Zab 34:2]

Na kunifanya niwe shabaha kwa mshale.

¹³Amenichoma viuno

Kwa mishale ya podo lake.

¹⁴Nimekuwa dhihaka kwa watu wangu wote;[#Neh 4:2-4; Zab 22:6,7; Yer 20:7; Mt 27:29-31]

Wimbo wao mchana kutwa.

¹⁵Amenijaza uchungu,[#Yer 9:15]

Amenikinaisha kwa pakanga.

¹⁶Amenivunja meno kwa changarawe;[#Mit 20:17]

Amenifunika majivu.

¹⁷Umeniweka nafsi yangu mbali na amani;

Nikasahau kufanikiwa.

¹⁸Nikasema, Nguvu zangu zimepotea,[#Zab 31:22]

Na tumaini langu kwa BWANA.

¹⁹Kumbuka mateso yangu, na msiba wangu,

Pakanga na nyongo.

²⁰Nafsi yangu ikali ikiyakumbuka hayo,

Nayo imeinama ndani yangu.

²¹Najikumbusha neno hili,

Kwa hiyo nina matumaini.

²²Ni huruma za BWANA kwamba hatuangamii,[#Neh 9:31; Zab 57:10; Mal 3:6]

Kwa kuwa rehema zake hazikomi.

²³Ni mpya kila siku asubuhi;[#Isa 33:2; Ebr 10:23]

Uaminifu wako ni mkuu.

²⁴BWANA ndiye fungu langu, husema nafsi yangu,[#Zab 16:5]

Kwa hiyo nitamtumaini yeye.

²⁵BWANA ni mwema kwa hao wamngojeao,[#Zab 130:6]

Kwa hiyo nafsi imtafutayo.

²⁶Ni vema mtu autarajie wokovu wa BWANA[#Zab 37:7]

Na kumngojea kwa utulivu.

²⁷Ni vema mwanadamu aichukue nira[#Zab 90:12]

Wakati wa ujana wake.

²⁸Na akae peke yake na kunyamaza kimya;[#Yer 15:17]

Kwa sababu Bwana ameweka hayo juu yake.

²⁹Na atie kinywa chake mavumbini;[#Ayu 42:6]

Ikiwa yamkini liko tumaini.

³⁰Na amwelekezee yule ampigaye shavu lake;[#Mik 5:1; Mt 5:39]

Ashibishwe mashutumu.

³¹Kwa kuwa Bwana hatamtupa mtu[#Zab 94:14]

Hata milele.

³²Maana ajapomhuzunisha atamrehemu,

Kwa kadiri ya wingi wa huruma zake.

³³Maana moyo wake hapendi kuwatesa wanadamu.[#Ebr 12:10]

Wala kuwahuzunisha.

³⁴Kuwaseta chini kwa miguu

Wafungwa wote wa duniani,

³⁵Kuipotosha hukumu ya mtu

Mbele zake Aliye juu,

³⁶Na kumnyima mtu haki yake,[#Hab 1:13]

Hayo Bwana hayaridhii kabisa.

³⁷Ni nani asemaye neno nalo likafanyika,[#Zab 33:9]

Ikiwa Bwana hakuliagiza?

³⁸Je! Katika kinywa chake Aliye juu[#Ayu 2:10]

Hayatoki maovu na mema?

³⁹Mbona anung’unika mwanadamu aliye hai[#Mik 7:9]

Mtu akiadhibiwa kwa dhambi zake?

⁴⁰Na tuchunguze njia zetu na kuzijaribu,[#Zab 119:59]

Na kumrudia BWANA tena.

⁴¹Na tumwinulie Mungu aliye mbinguni[#Zab 86:4]

Mioyo yetu na mikono.

⁴²Sisi tumekosa na kuasi;[#Dan 9:5]

Wewe hukusamehe.

⁴³Umetufunika kwa hasira na kutufuatia;

Umeua, wala hukuona huruma.

⁴⁴Umejifunika nafsi yako kwa wingu,

Maombi yetu yasipite.

⁴⁵Umetufanya kuwa takataka, na vifusi[#1 Kor 4:13]

Katikati ya mataifa.

⁴⁶Juu yetu adui zetu wote

Wametupanulia vinywa vyao.

⁴⁷Hofu imetujilia na shimo,

Ukiwa na uharibifu.

⁴⁸Jicho langu lachuruzika mito ya maji

Kwa ajili ya uvunjifu wa binti ya watu wangu.

⁴⁹Jicho langu latoka machozi lisikome,

Wala haliachi;

⁵⁰Hata BWANA atakapoangalia[#Isa 63:15]

Na kutazama toka mbinguni.

⁵¹Jicho langu lanitia huzuni nafsini mwangu,

Kwa sababu ya binti zote za mji wangu.

⁵²Walio adui zangu bila sababu[#Zab 35:7; 69:4]

Wameniwinda sana kama ndege;

⁵³Wameukatilia mbali uhai wangu gerezani,[#Yer 37:16; Dan 6:17]

Na kutupa jiwe juu yangu.

⁵⁴Maji mengi yalipita juu ya kichwa changu,[#Zab 69:2]

Nikasema, Nimekatiliwa mbali.

⁵⁵Naliliitia jina lako, BWANA, kutoka lile shimo[#2 Nya 33:12; Zab 18:5,6; Yon 2:2]

Liendalo chini kabisa.

⁵⁶Ukaisikia sauti yangu; usifiche sikio lako[#Zab 6:8; Rum 8:26]

Ili usisikie pumzi yangu, kwa kilio changu.

⁵⁷Ulinikaribia siku ile nilipokulilia;[#Zab 69:18; Isa 58:9; Yak 4:8]

Ukasema, Usiogope.

⁵⁸Ee BWANA umenitetea mateto ya nafsi yangu;[#1 Sam 25:39; Yer 51:36; Zab 35:1; 71:23]

Umeukomboa uhai wangu.

⁵⁹Umekuona kudhulumiwa kwangu, Ee BWANA;

Unihukumie neno langu.

⁶⁰Umekiona kisasi chao chote,[#Yer 11:19]

Na mashauri yao yote juu yangu.

⁶¹Ee BWANA, umeyasikia matukano yao,

Na mashauri yao yote juu yangu;

⁶²Midomo yao walioinuka juu yangu

Na maazimio yao juu yangu mchana kutwa.

⁶³Uangalie kuketi kwao, na kuinuka kwao;[#Zab 139:2]

Wimbo wao ndio mimi.

⁶⁴Utawalipa malipo, Ee BWANA,[#Zab 28:4; Yer 11:20; 2 Tim 4:14; Ufu 6:10]

Sawasawa na kazi ya mikono yao.

⁶⁵Utawapa ushupavu wa moyo;[#Zab 8:3]

Laana yako juu yao.

⁶⁶Utawafuatia kwa hasira, na kuwaangamiza

Wasiwe tena chini ya mbingu za BWANA.