Mafundisho kuhusu Talaka

¹Ikawa Yesu alipomaliza maneno hayo, akatoka Galilaya akafika mipaka ya Uyahudi, ng’ambo ya Yordani.[#Mk 10:1-12; #Mt 7:28; 11:1; 13:53; 26:1]

²Makutano mengi wakamfuata, akawaponya huko.

³Basi Mafarisayo wakamwendea, wakamjaribu, wakimwambia, Je! Ni halali mtu kumwacha mkewe kwa kila sababu?[#Mt 5:31,32]

⁴Akajibu, akawaambia, Hamkusoma ya kwamba yeye aliyewaumba mwanzo, aliwaumba mtu mume na mtu mke,[#Mwa 1:27; 5:2]

⁵akasema, Kwa sababu hiyo, mtu atamwacha babaye na mamaye, ataambatana na mkewe; na hao wawili watakuwa mwili mmoja?[#Mwa 2:24; Efe 5:31]

⁶Hata wamekuwa si wawili tena, bali mwili mmoja. Basi aliowaunganisha Mungu, mwanadamu asiwatenganishe.[#1 Kor 7:10,11]

⁷Wakamwambia, Jinsi gani basi Musa aliamuru kumpa hati ya talaka, na kumwacha?[#Kum 24:1-4; Mt 5:31]

⁸Akawaambia, Musa, kwa sababu ya ugumu wa mioyo yenu, aliwapa ruhusa kuwaacha wake zenu; lakini tangu mwanzo haikuwa hivi.

⁹Nami nawaambia ninyi, Kila mtu atakayemwacha mkewe, isipokuwa ni kwa sababu ya uasherati, akaoa mwingine, azini; naye amwoaye yule aliyeachwa azini.[#Mt 5:32; 1 Kor 7:10-11; Lk 16:18]

¹⁰Wanafunzi wake wakamwambia, Mambo ya mtu na mkewe yakiwa hivyo, haifai kuoa.

¹¹Lakini yeye akawaambia, Si wote wawezao kulipokea neno hili, ila wale waliojaliwa.[#1 Kor 7:7,17]

¹²Maana wako matowashi waliozaliwa hali hiyo toka matumboni mwa mama zao; tena wako matowashi waliofanywa na watu kuwa matowashi; tena wako matowashi waliojifanya kuwa matowashi kwa ajili ya ufalme wa mbinguni. Awezaye kulipokea neno hili, na alipokee.

Yesu Awabariki Watoto Wadogo

¹³Ndipo akaletewa watoto wadogo ili aweke mikono yake juu yao na kuwaombea; wanafunzi wake wakawakemea.[#Mk 10:13-16; Lk 18:15-17]

¹⁴Lakini Yesu akasema, Waacheni watoto wadogo waje kwangu; wala msiwazuie; kwa maana walio mfano wa hao, ufalme wa mbinguni ni wao.[#Mt 18:2,3]

¹⁵Akaweka mikono yake juu yao, akatoka huko.

Mtu Aliyekuwa Tajiri

¹⁶Na tazama, mtu mmoja akamwendea akamwambia, Mwalimu, nitende jambo gani jema, ili nipate uzima wa milele?[#Mk 10:17-31; Lk 18:18-30]

¹⁷Akamwambia Kwani kuniuliza habari ya wema? Aliye mwema ni mmoja. Lakini ukitaka kuingia katika uzima, zishike amri.[#Lk 10:26-28]

¹⁸Akamwambia, Zipi? Yesu akasema, Ni hizi, Usiue, Usizini, Usiibe, Usishuhudie uongo,[#Kut 20:13-16; Kum 5:17-20]

¹⁹Waheshimu baba yako na mama yako, na, Mpende jirani yako kama nafsi yako.[#Kut 20:12; Kum 5:16; Law 19:18]

²⁰Yule kijana akamwambia, Haya yote nimeyashika; nimepungukiwa na nini tena?

²¹Yesu akamwambia, Ukitaka kuwa mkamilifu, enenda ukauze ulivyo navyo, uwape maskini, nawe utakuwa na hazina mbinguni; kisha njoo unifuate.[#Mt 6:20; Lk 12:33]

²²Yule kijana alipolisikia neno lile, akaenda zake kwa huzuni; kwa sababu alikuwa na mali nyingi.[#Zab 62:10]

²³Yesu akawaambia wanafunzi wake, Amin, nawaambieni, ya kwamba itakuwa shida tajiri kuingia katika ufalme wa mbinguni.

²⁴Nawaambia tena, Ni rahisi zaidi ngamia kupenya tundu ya sindano, kuliko tajiri kuingia katika ufalme wa Mungu.

²⁵Wanafunzi waliposikia, walishangaa mno, wakisema, Ni nani basi awezaye kuokoka?

²⁶Yesu akawakazia macho, akawaambia, Kwa wanadamu hilo haliwezekani; bali kwa Mungu yote yawezekana.[#Mwa 18:14; Ayu 42:2; Zek 8:6]

²⁷Ndipo Petro akajibu, akamwambia, Tazama, sisi tumeacha vyote tukakufuata; tutapata nini basi?

²⁸Yesu akawaambia, Amin, nawaambia ya kwamba ninyi mlionifuata mimi, katika ulimwengu mpya, atakapoketi Mwana wa Adamu katika kiti cha utukufu wake, ninyi nanyi mtaketi katika viti kumi na viwili, mkiwahukumu kabila kumi na mbili za Israeli.[#Mt 25:31; Lk 22:30; Dan 7:9,10]

²⁹Na kila mtu aliyeacha nyumba, au ndugu wa kiume au wa kike, au baba, au mama, au watoto, au mashamba, kwa ajili ya jina langu, atapokea mara mia, na kuurithi uzima wa milele.[#Ebr 10:34]

³⁰Lakini wengi walio wa kwanza watakuwa wa mwisho, na walio wa mwisho watakuwa wa kwanza.[#Mt 20:16; Lk 13:30]