Kukataliwa kwa Yesu Nazareti

¹Akatoka huko, akafika mpaka nchi ya kwao; wanafunzi wake wakamfuata.[#Mt 13:53-58; Lk 4:15-30]

²Na ilipokuwa sabato, alianza kufundisha katika sinagogi; wengi waliposikia wakashangaa, wakisema, Huyu ameyapata wapi haya? Na, Ni hekima gani hii aliyopewa huyu? Na, Ni nini miujiza hii mikubwa inayotendeka kwa mikono yake?[#Yn 7:15]

³Huyu si yule seremala, mwana wa Mariamu, na ndugu yao Yakobo, na Yose, na Yuda, na Simoni? Na maumbu yake hawapo hapa petu? Wakajikwaa kwake.

⁴Yesu akawaambia, Nabii hakosi heshima, isipokuwa katika nchi yake mwenyewe, na kwa jamaa zake, na nyumbani mwake.[#Yn 4:44]

⁵Wala hakuweza kufanya mwujiza wo wote huko, isipokuwa aliweka mikono yake juu ya wagonjwa wachache, akawaponya.[#Mk 6:13]

⁶Akastaajabu kwa sababu ya kutokuamini kwao. Akazunguka-zunguka katika vile vijiji, akifundisha.

Yesu Awatuma wale Kumi na Wawili

⁷Akawaita wale Thenashara, akaanza kuwatuma wawili wawili, akawapa amri juu ya pepo wachafu;[#Mt 10:1,9-15; Lk 9:1-6; #Lk 10:1]

⁸akawakataza wasichukue kitu cha njiani isipokuwa fimbo tu; wala mkate, wala mkoba, wala pesa za bindoni;[#Lk 10:4-11]

⁹lakini wajifungie viatu; akasema, Msivae kanzu mbili.

¹⁰Akawaambia, Mahali po pote mtakapoingia katika nyumba, kaeni humo hata mtakapotoka mahali pale.

¹¹Na mahali po pote wasipowakaribisha ninyi wala kuwasikia, mtokapo huko, yakung’uteni mavumbi yaliyo chini ya miguu yenu, kuwa ushuhuda kwao.[#Mdo 13:51]

¹²Wakatoka, wakahubiri kwamba watu watubu.

¹³Wakatoa pepo wengi, wakapaka mafuta watu wengi waliokuwa wagonjwa, wakawapoza.[#Yak 5:14,15]

Kifo cha Yohana Mbatizaji

¹⁴Naye Mfalme Herode akasikia habari; kwa maana jina lake lilikuwa kutangaa, akasema, Yohana Mbatizaji amefufuka katika wafu, na kwa hiyo nguvu hizi zinatenda kazi ndani yake.[#Mt 16:14; Mk 8:28; Lk 9:19; #Lk 3:19,20]

¹⁵Wengine walisema, Ni Eliya. Wengine walisema, Huyu ni nabii, au ni kama mmoja wa manabii.

¹⁶Lakini Herode aliposikia, alisema, Yohana, niliyemkata kichwa, amefufuka.

¹⁷Kwa maana Herode mwenyewe alikuwa ametuma watu, akamkamata Yohana, akamfunga gerezani, kwa ajili ya Herodia, mkewe Filipo ndugu yake, kwa kuwa amemwoa;[#Lk 3:19-20]

¹⁸kwa sababu Yohana alimwambia Herode, Si halali kwako kuwa na mke wa nduguyo.[#Law 18:16]

¹⁹Naye yule Herodia akawa akimvizia, akataka kumwua, asipate.

²⁰Maana Herode alimwogopa Yohana; akimjua kuwa ni mtu wa haki, mtakatifu, akamlinda; na alipokwisha kumsikiliza alifadhaika sana; naye alikuwa akimsikiliza kwa furaha.

²¹Hata ilipotokea siku ya kufaa, na Herode, sikukuu ya kuzaliwa kwake, alipowafanyia karamu wakubwa wake, na majemadari, na watu wenye cheo wa Galilaya;

²²ndipo binti yake yule Herodia alipoingia, akacheza, akampendeza Herode na wale walioketi pamoja naye karamuni. Mfalme akamwambia yule kijana, Niombe lo lote utakalo, nitakupa.

²³Akamwapia, Lo lote utakaloniomba nitakupa, hata nusu ya ufalme wangu.[#Est 5:3-6]

²⁴Basi akatoka, akamwuliza mamaye, Niombe nini? Naye akasema, Kichwa cha Yohana Mbatizaji.

²⁵Mara akaingia kwa haraka mbele ya mfalme, akaomba akisema, Nataka unipe sasa hivi katika kombe kichwa cha Yohana Mbatizaji.

²⁶Mfalme akafanya huzuni sana, lakini kwa ajili ya viapo vyake, na kwa ajili ya hao walioketi karamuni, hakutaka kumkatalia.

²⁷Mara mfalme akatuma askari, akaamuru kuleta kichwa chake. Basi akaenda, akamkata kichwa mle gerezani,

²⁸akakileta kichwa chake katika kombe, akampa yule kijana, naye yule kijana akampa mamaye.

²⁹Wanafunzi wake waliposikia habari, walikwenda, wakauchukua mwili wake, wakauzika kaburini.

Kuwalisha Watu Elfu Tano

³⁰Na mitume wakakusanyika mbele ya Yesu; wakampa habari za mambo yote waliyoyafanya, na mambo yote waliyoyafundisha.[#Lk 9:10; 10:17]

³¹Akawaambia, Njoni ninyi peke yenu kwa faragha, mahali pasipokuwa na watu, mkapumzike kidogo. Kwa sababu walikuwako watu wengi, wakija, wakienda, hata haikuwapo nafasi ya kula.

³²Wakaenda zao faragha mashuani, mahali pasipokuwa na watu.[#Mt 14:13-21; Lk 9:11-17; Yn 6:1-13]

³³Watu wakawaona wakienda zao, na wengi wakatambua, wakaenda huko mbio kwa miguu, toka miji yote, wakatangulia kufika.

³⁴Naye aliposhuka mashuani, akaona mkutano mkuu, akawahurumia; kwa sababu walikuwa kama kondoo wasio na mchungaji; akaanza kuwafundisha mambo mengi.[#Hes 27:17; 1 Fal 22:17; 2 Nya 18:16; Eze 34:5; Mt 9:36]

³⁵Hata zilipopita saa nyingi za mchana, wanafunzi wake walimwendea, wakasema, Mahali hapa ni nyika tupu, na sasa kunakuchwa;[#Mk 8:1-9]

³⁶uwaage watu hawa, ili waende zao mashambani na vijijini kandokando, wakajinunulie chakula.

³⁷Akajibu, akawaambia, Wapeni ninyi chakula. Wakamwambia, Je! Twende tukanunue mikate ya dinari mia mbili ili tuwape kula?

³⁸Akawaambia, Mnayo mikate mingapi? Nendeni mkatazame. Walipokwisha kujua wakasema, Mitano, na samaki wawili.

³⁹Akawaagiza wawaketishe wote, vikao vikao, penye majani mabichi.

⁴⁰Wakaketi safu safu, hapa mia hapa hamsini.

⁴¹Akaitwaa ile mikate mitano na wale samaki wawili, akatazama mbinguni, akashukuru, akaimega ile mikate, akawapa wanafunzi wake wawaandikie; na wale samaki wawili akawagawia wote.[#Mk 7:34]

⁴²Wakala wote wakashiba.

⁴³Wakaokota vipande vilivyomegwa vya kuweza kujaza vikapu kumi na viwili; na vipande vya samaki pia.[#Kum 28:5]

⁴⁴Na walioila ile mikate wapata elfu tano wanaume.

Yesu Atembea juu ya Maji

⁴⁵Mara akawalazimisha wanafunzi wake wapande mashuani, watangulie kwenda ng’ambo hata Bethsaida, wakati yeye alipokuwa akiwaaga mkutano.[#Mt 14:22-36; Yn 6:15-21]

⁴⁶Hata alipokwisha kuagana nao akaenda zake mlimani kuomba.

⁴⁷Na kulipokuwa jioni mashua ilikuwa katikati ya bahari, na yeye yu peke yake katika nchi kavu.

⁴⁸Akawaona wakitaabika kwa kuvuta makasia, kwa maana upepo ulikuwa wa mbisho; hata ilipopata kama zamu ya nne ya usiku akawaendea, akitembea juu ya bahari; akataka kuwapita.

⁴⁹Nao walipomwona anatembea juu ya bahari, walidhani ya kuwa ni kivuli, wakapiga yowe,

⁵⁰kwa kuwa wote walimwona, wakafadhaika. Mara akasema nao, akawaambia, Changamkeni; ni mimi, msiogope.

⁵¹Akapanda mle chomboni walimo; upepo ukakoma; wakashangaa sana mioyoni mwao;[#Mk 4:39]

⁵²kwa maana hawakufahamu habari za ile mikate, lakini mioyo yao ilikuwa mizito.

Kuwaponya Wagonjwa Genesareti

⁵³Hata walipokwisha kuvuka, walifika nchi ya Genesareti, wakatia nanga.

⁵⁴Nao wakiisha kutoka mashuani, mara watu walimtambua,

⁵⁵wakaenda mbio, wakizunguka nchi ile yote, wakaanza kuwachukua vitandani walio hawawezi, kwenda kila mahali waliposikia kwamba yupo.

⁵⁶Na kila alikokwenda, akiingia vijijini, au mijini, au mashambani, wakawaweka wagonjwa sokoni, wakamsihi waguse ngaa pindo la vazi lake; nao wote waliomgusa wakapon[#Mk 5:27,28; Mdo 5:15; 19:11,12]