Wimbo wa Ushindi

¹Haleluya.[#1 Nya 16:18,34; 2 Nya 5:13; 7:3; Ezr 3:11; Zab 100:5; 106:1; 107:1; 136:1; Yer 33:11]

Mshukuruni BWANA kwa kuwa ni mwema,

Kwa maana fadhili zake ni za milele.

²Israeli na aseme sasa,[#Zab 115:9]

Ya kwamba fadhili zake ni za milele.

³Mlango wa Haruni na waseme sasa,

Ya kwamba fadhili zake ni za milele.

⁴Wamchao BWANA na waseme sasa,

Ya kwamba fadhili zake ni za milele.

⁵Katika shida yangu nalimwita BWANA;[#Zab 18:19]

BWANA akanijibu akaniweka panapo nafasi.

⁶BWANA yuko upande wangu, sitaogopa;[#Ebr 13:6]

Mwanadamu atanitenda nini?

⁷BWANA yuko upande wangu, msaidizi wangu,[#Zab 54:4]

Kwa hiyo nitawaona wanaonichukia wameshindwa.

⁸Ni heri kumkimbilia BWANA[#Zab 62:8; Isa 2:22; Yer 17:5,7]

Kuliko kuwatumainia wanadamu.

⁹Ni heri kumkimbilia BWANA.[#Zab 146:3; Isa 30:2,3]

Kuliko kuwatumainia wakuu.

¹⁰Mataifa yote walinizunguka;

Kwa jina la BWANA naliwakatilia mbali.

¹¹Walinizunguka, naam, walinizunguka;[#Zab 88:17]

Kwa jina la BWANA naliwakatilia mbali.

¹²Walinizunguka kama nyuki,[#Kum 1:44; Mhu 7:6]

Walizimika kama moto wa miibani;

Kwa jina la BWANA naliwakatilia mbali.

¹³Ulinisukuma sana ili nianguke;

Lakini BWANA akanisaidia.

¹⁴BWANA ni nguvu zangu na wimbo wangu,[#Kut 15:2; Isa 12:2]

Naye amekuwa wokovu wangu.

¹⁵Sauti ya furaha na wokovu

Imo hemani mwao wenye haki;

Mkono wa kuume wa BWANA hutenda makuu.

¹⁶Mkono wa kuume wa BWANA umetukuzwa;[#Kut 15:6]

Mkono wa kuume wa BWANA hutenda makuu.

¹⁷Sitakufa bali nitaishi,[#Zab 6:5; 73:28]

Nami nitayasimulia matendo ya BWANA.

¹⁸BWANA ameniadhibu sana,[#Mit 3:11,12; 1 Kor 11:32]

Lakini hakuniacha nife.

¹⁹Nifungulieni malango ya haki,[#Isa 26:2]

Nitaingia na kumshukuru BWANA.

²⁰Lango hili ni la BWANA,[#Zab 24:7; Isa 35:8]

Wenye haki ndio watakaoliingia.

²¹Nitakushukuru kwa maana umenijibu,

Nawe umekuwa wokovu wangu.

²²Jiwe walilolikataa waashi[#Mt 21:42; Mk 12:10; Lk 20:17; Mdo 4:11; Efe 2:20; 1 Pet 2:4,7; #Mt 21:42; Mk 12:10-11]

Limekuwa jiwe kuu la pembeni.

²³Neno hili limetoka kwa BWANA,[#Ayu 5:9]

Nalo ni ajabu machoni petu.

²⁴Siku hii ndiyo aliyoifanya BWANA,[#2 Kor 6:2]

Tutashangilia na kuifurahia.

²⁵Ee BWANA, utuokoe, twakusihi;[#Mt 21:9; Mk 11:9; Yn 12:13]

Ee BWANA, utufanikishe, twakusihi.

²⁶Na abarikiwe yeye ajaye kwa jina la BWANA;[#Zek 4:7; Mt 21:9; 23:39; Mk 11:9; Lk 13:35; 19:38; Yn 12:13]

Tumewabarikia toka nyumbani mwa BWANA.

²⁷BWANA ndiye aliye Mungu,[#Est 8:16; Mik 7:9; Mal 4:2]

Naye ndiye aliyetupa nuru.

Ifungeni dhabihu kwa kamba

Pembeni mwa madhabahu.

²⁸Ndiwe Mungu wangu, nami nitakushukuru,[#Kut 15:2; Isa 25:1]

Ndiwe Mungu wangu, nami nitakutukuza.

²⁹Mshukuruni BWANA kwa kuwa ni mwema,

Kwa maana fadhili zake ni za milele.