Shukrani kwa Ushindi

¹Ee BWANA, mfalme atazifurahia nguvu zako,

Na wokovu wako ataufanyia shangwe nyingi sana.

²Umempa haja ya moyo wake,[#Yn 11:42]

Wala hukumzuilia matakwa ya midomo yake.

³Maana umemsogezea baraka za heri,

Umemvika taji ya dhahabu safi kichwani pake.

⁴Alikuomba uhai, ukampa,[#2 Sam 7:19]

Muda mrefu wa siku nyingi, milele na milele.

⁵Utukufu wake ni mkuu kwa wokovu wako,

Heshima na adhama waweka juu yake.

⁶Maana umemfanya kuwa baraka za milele,

Wamfurahisha kwa furaha ya uso wako.

⁷Kwa kuwa mfalme humtumaini BWANA,[#Zab 91:2]

Na kwa fadhili zake Aliye juu hataondoshwa.

⁸Mkono wako utawapata adui zako wote,

Mkono wako wa kuume utawapata wanaokuchukia.

⁹Utawafanya kuwa kama tanuru ya moto,[#Kum 32:22]

Wakati wa ghadhabu yako.

BWANA atawameza kwa ghadhabu yake,

Na moto utawala.

¹⁰Matunda yao utayaharibu na kuyaondoa katika nchi,

Na wazao wao katika wanadamu.

¹¹Madhali walinuia kukutenda mabaya,

Waliwaza hila wasipate kuitimiza.

¹²Kwa maana utawafanya kukupa kisogo,

Kwa upote wa uta wako ukiwaelekezea mishale.

¹³Ee BWANA, utukuzwe kwa nguvu zako,[#Ufu 15:3,4]

Nasi tutaimba na kuuhimidi uweza wako.