Shangwe kwa Kusamehewa

¹Heri aliyesamehewa dhambi,[#Rum 4:7-8; Zab 85:2]

Na kusitiriwa makosa yake.

²Heri BWANA asiyemhesabia upotovu,[#Law 17:4; Rum 5:13; Yn 1:47; 2 Kor 1:12]

Ambaye rohoni mwake hamna hila.

³Niliponyamaza mifupa yangu ilichakaa

Kwa kuugua kwangu mchana kutwa.

⁴Kwa maana mchana na usiku

Mkono wako ulinilemea.

Jasho langu likakauka hata nikawa

Kama nchi kavu wakati wa kaskazi.

⁵Nalikujulisha dhambi yangu,[#Mit 28:13; Isa 65:24; Lk 15:18]

Wala sikuuficha upotovu wangu.

Nalisema, Nitayakiri maasi yangu kwa BWANA,

Nawe ukanisamehe upotovu wa dhambi yangu.

⁶Kwa hiyo kila mtu mtauwa[#1 Tim 1:16; Isa 55:6; Yn 7:34]

Akuombe wakati unapopatikana.

Hakika maji makuu yafurikapo,

Hayatamfikia yeye.

⁷Ndiwe sitara yangu, utanihifadhi na mateso,[#Zab 9:9; Mit 18:10; Isa 4:6; Mt 23:37; Kol 3:3]

Utanizungusha nyimbo za wokovu.

⁸Nitakufundisha na kukuonyesha njia utakayoiendea;[#Isa 48:17]

Nitakushauri, jicho langu likikutazama.

⁹Msiwe kama farasi wala nyumbu,

Walio hawana akili.

Kwa matandiko ya lijamu na hatamu

Sharti kuwazuia hao, au hawatakukaribia.

¹⁰Naye mtu mwovu ana mapigo mengi,[#Mit 13:21; Zab 34:8; Mit 16:20; Yer 17:7]

Bali amtumainiye BWANA fadhili zitamzunguka.

¹¹Mfurahieni BWANA;

Shangilieni, enyi wenye haki

Pigeni vigelegele vya furaha;

Ninyi nyote mlio wanyofu wa moyo.