Shukrani kwa Kuponywa na Sala ya kutaka Msaada

¹Nalimngoja BWANA kwa saburi,

Akaniinamia akakisikia kilio changu.

²Akanipandisha toka shimo la uharibifu,

Toka udongo wa utelezi;

Akaisimamisha miguu yangu mwambani,

Akaziimarisha hatua zangu.

³Akatia wimbo mpya kinywani mwangu,

Ndio sifa zake Mungu wetu.

Wengi wataona na kuogopa,

Nao watamtumaini BWANA

⁴Heri aliyemfanya BWANA kuwa tumaini lake,[#Zab 2:12]

Wala hakuwaelekea wenye kiburi,

Wala hao wanaogeukia uongo.

⁵Ee BWANA, Mungu wangu, umefanya kwa wingi[#Isa 55:8]

Miujiza yako na mawazo yako kwetu;

Hakuna awezaye kufananishwa nawe;

Kama ningependa kuyatangaza na kuyahubiri,

Ni mengi sana hayahesabiki.

⁶Dhabihu na matoleo hukupendezwa nazo,[#Ebr 10:5-7; Hos 6:6; Mt 9:13]

Masikio yangu umeyazibua,

Kafara na sadaka za dhambi hukuzitaka.

⁷Ndipo niliposema, Tazama nimekuja,[#Lk 24:44; Yn 5:39; Mdo 10:43; Ebr 10:7]

(Katika gombo la chuo nimeandikiwa,)

⁸Kuyafanya mapenzi yako,[#Ayu 23:12; Yer 15:16; Yn 4:34; Rum 7:22]

Ee Mungu wangu, ndiyo furaha yangu;

Naam, sheria yako imo moyoni mwangu.

⁹Nimehubiri habari za haki katika kusanyiko kubwa.[#Zab 139:2]

Sikuizuia midomo yangu; Ee BWANA, unajua.

¹⁰Sikusitiri haki yako moyoni mwangu;[#Mdo 20:20; Rum 1:16,17; Flp 3:9]

Nimetangaza uaminifu wako na wokovu wako.

Sikuficha fadhili zako wala kweli yako

Katika kusanyiko kubwa.

¹¹Nawe, BWANA, usinizuilie rehema zako,[#Zab 43:3]

Fadhili zako na kweli yako na zinihifadhi daima.

¹²Kwa maana mabaya yasiyohesabika[#Zab 38:4]

Yamenizunguka mimi.

Maovu yangu yamenipata,

Wala siwezi kuona.

Yamezidi kuliko nywele za kichwa changu,

Na moyo wangu umeniacha.

¹³Ee BWANA, uwe radhi kuniokoa,

Ee BWANA, unisaidie hima.

¹⁴Waaibike, wafedheheke pamoja,

Wanaoitafuta nafsi yangu waiangamize.

Warudishwe nyuma, watahayarishwe,

Wapendezwao na shari yangu.

¹⁵Wakae hali ya ukiwa, na iwe aibu yao,

Wanaoniambia, Ewe! Ewe!

¹⁶Washangilie, wakufurahie,

Wote wakutafutao.

Waupendao wokovu wako

Waseme daima, Atukuzwe BWANA.

¹⁷Nami ni maskini na mhitaji,[#Neh 5:19; Yon 1:6]

Bwana atanitunza.

Ndiwe msaada wangu na mwokozi wangu,

Ee Mungu wangu, usikawie.