Sifa kwa Ajili ya Wema wa Mungu kwa Israeli

¹Mpigie Mungu kelele za shangwe, nchi yote,

²Imbeni utukufu wa jina lake,

Tukuzeni sifa zake.

³Mwambieni Mungu, Matendo yako yatisha kama nini![#Zab 18:44]

Kwa ajili ya wingi wa nguvu zako,

Adui zako watakuja kunyenyekea mbele zako.

⁴Nchi yote itakusujudia na kukuimbia,[#Zab 67:3]

Naam, italiimbia jina lako.

⁵Njoni yatazameni matendo ya Mungu;[#Zab 46:8]

Hutisha kwa mambo awatendayo wanadamu;

⁶Aligeuza bahari ikawa nchi kavu;[#Kut 14:21; Yos 3:14-17; Zab 78:13; Isa 63:13,14]

Katika mto walivuka kwa miguu;

Huko ndiko mlikomfurahia.

⁷Atawala kwa uweza wake milele;[#Zab 11:4]

Macho yake yanaangalia mataifa;

Waasio wasijitukuze nafsi zao.

⁸Enyi mataifa, mtukuzeni Mungu wetu,

Itangazeni sauti ya sifa zake;

⁹Aliyeiweka nafsi yetu katika uhai,

Wala hakuuacha mguu wetu usogezwe.

¹⁰Kwa maana umetupima, Ee Mungu,[#Zek 13:9]

Umetujaribu inavyojaribiwa fedha.

¹¹Ulituingiza ndani ya wavu,

Na kuweka viunoni mwetu mzigo uliotulemea.

¹²Uliwapandisha watu

Juu ya vichwa vyetu.

Tulipita motoni na majini;

Ukatutoa na kutuleta kunako wingi.

¹³Nitaingia nyumbani mwako na kafara;[#Zab 116:14,18; Mhu 5:4; Yon 2:9]

Nitaondoa kwako nadhiri zangu;

¹⁴Ambazo midomo yangu ilizinena;

Kinywa changu kikazisema nilipokuwa taabuni.

¹⁵Kafara za vinono nitakutolea,

Pamoja na fukizo la kondoo waume,

Nitatoa ng’ombe pamoja na mbuzi.

¹⁶Njoni, sikieni, ninyi nyote mnaomcha Mungu,

Nami nitayatangaza aliyonitendea roho yangu.

¹⁷Nalimwita kwa kinywa changu,

Na sifa kuu zilikuwa chini ya ulimi wangu.

¹⁸Kama ningaliwaza maovu moyoni mwangu,[#Ayu 11:14,15; Mit 15:29; Isa 1:15]

Bwana asingesikia.

¹⁹Hakika Mungu amesikia;

Ameisikiliza sauti ya maombi yangu.

²⁰Na ahimidiwe Mungu asiyeyakataa maombi yangu,

Wala kuniondolea fadhili zake.