MGA AWIT 23

Ang Panginoon ay pastol ng mangaawit. Awit ni David.

¹Ang Panginoon ay aking pastor; hindi ako mangangailangan.[#Is. 40:11; Jer. 23:4; Ezek. 34:21; Juan 10:11; 1 Ped. 2:25.]

²Kaniyang pinahihiga ako sa sariwang pastulan:[#Ezek. 34:14.]

Pinapatnubayan niya ako sa siping ng mga tubig na pahingahan,

³Kaniyang pinapananauli ang aking kaluluwa:

Pinapatnubayan niya ako sa mga landas ng katuwiran alangalang sa kaniyang pangalan.

⁴Oo, bagaman ako'y lumalakad sa libis ng lilim ng kamatayan,

Wala akong katatakutang kasamaan; sapagka't ikaw ay sumasa akin:

Ang iyong pamalo at ang iyong tungkod, ay nagsisialiw sa akin.

⁵Iyong pinaghahandaan ako ng dulang sa harap ko sa harapan ng aking mga kaaway:[#Awit 78:19; 104:15.]

Iyong pinahiran ang aking ulo ng langis;

Ang aking saro ay inaapawan.

⁶Tunay na ang kabutihan at kaawaan ay susunod sa akin sa lahat ng mga kaarawan ng aking buhay:

At ako'y tatahan sa bahay ng Panginoon magpakailan man.