MGA AWIT 92

Salmo, Awit sa araw ng sabbath.

¹Isang mabuting bagay ang magpapasalamat sa Panginoon,[#Awit 147:1.]

At umawit ng mga pagpuri sa iyong pangalan, Oh Kataastaasan:

²Upang magpakilala ng iyong kagandahang-loob sa umaga,[#Awit 89:11.]

At ng iyong pagtatapat gabigabi.

³Na may panugtog na may sangpung kawad, at may salterio;[#Awit 33:2.]

Na may dakilang tunog na alpa.

⁴Sapagka't ikaw, Panginoon, iyong pinasaya ako sa iyong gawa:

Ako'y magtatagumpay sa mga gawa ng iyong mga kamay.

⁵Kay dakila ng iyong mga gawa, Oh Panginoon![#Awit 40:5.]

Ang iyong mga pagiisip ay totoong malalim.

⁶Ang taong hangal ay hindi nakakaalam;[#Awit 94:8.]

Ni nauunawa man ito ng mangmang.

⁷Pagka ang masama ay lumilitaw na parang damo,

At pagka gumiginhawa ang lahat na manggagawa ng kasamaan;

Ay upang mangalipol sila magpakailan man:

⁸Nguni't ikaw, Oh Panginoon, ay mataas magpakailan man.

⁹Sapagka't, narito, ang mga kaaway mo, Oh Panginoon,[#Awit 129:1, 2; Nah. 1:2.]

Sapagka't, narito, ang mga kaaway mo'y malilipol;

Lahat ng mga manggagawa ng kasamaan ay mangangalat.

¹⁰Nguni't ang sungay ko'y iyong pinataas na parang sungay ng mailap na toro:[#1 Sam. 2:1.; #Blg. 23:22.]

Ako'y napahiran ng bagong langis.

¹¹Nakita naman ng aking mata ang nasa ko sa aking mga kaaway,[#Awit 54:7.]

Narinig ng aking pakinig ang nasa ko sa mga manggagawa ng kasamaan na nagsisibangon laban sa akin.

¹²Ang matuwid ay giginhawa na parang puno ng palma.[#Awit 52:8; Is. 65:22; Os. 14:5-8; Amos 2:9.]

Siya'y tutubo na parang cedro sa Libano.

¹³Sila'y nangatatag sa bahay ng Panginoon;[#Awit 1:3.]

Sila'y giginhawa sa mga looban ng aming Dios.

¹⁴Sila'y mangagbubunga sa katandaan;

Sila'y mapupuspos ng katas at kasariwaan:

¹⁵Upang ipakilala na ang Panginoon ay matuwid;

Siya'y aking malaking bato, at walang kalikuan sa kaniya.