The chat will start when you send the first message.
1Nang malapit nang mamatay si David, naghabilin siya kay Solomon na kanyang anak ng ganito:
2“Malapit na akong mamatay, kaya magpakatatag ka at magpakatapang,
3at sundin ang mga iniuutos ng Panginoon na iyong Diyos. Sumunod ka sa kanyang mga pamamaraan, mga tuntunin at mga utos na nakasulat sa Kautusan ni Moises para magtagumpay ka sa lahat ng gagawin mo, saan ka man magpunta.
4Kung gagawin mo ito, tutuparin ng Panginoon ang pangako niya sa akin, na kung ang aking mga lahi ay mamumuhay nang tama at buong buhay na susunod sa kanya nang may katapatan, laging sa kanila magmumula ang maghahari sa Israel.
5“Ito pa ang bilin ko sa iyo: Nalaman mo kung ano ang ginawa sa akin ni Joab na anak ni Zeruias. Pinatay niya ang dalawang kumander ng mga sundalo ng Israel na si Abner na anak ni Ner at si Amasa na anak ni Jeter. Pinatay niya sila na parang mga kaaway, pero ginawa niya iyon sa panahon na walang labanan. Siya ang may pananagutan sa pagkamatay nila.[#2:5 : Sa literal, Dinungisan niya ang kanyang sinturon at panyapak ng dugo sa labanan.]
6Kaya gawin mo ang naiisip mong mabuting gawin sa kanya, pero huwag mong hayaan na payapa siyang mamatay sa katandaan.
7“Ngunit maging mabuti ka sa mga anak ni Barzilai na taga-Gilead at pakainin silang kasama mo, dahil tinulungan nila ako nang tumakas ako sa kapatid mong si Absalom.
8“Tandaan mo si Shimei na anak ni Gera, na taga-Bahurim at mula sa lahi ni Benjamin. Isinumpa niya ako nang matindi noong pumunta ako sa Mahanaim. Ngunit nang magkita kami sa Ilog Jordan, nakipagkasundo ako sa kanya sa pangalan ng Panginoon na hindi ko siya papatayin.
9Ngunit ngayon, ikaw ang hahatol sa kanya. Matalino ka, at alam mo kung ano ang dapat gawin. Kahit matanda na siya, ipapatay mo siya.”
10Pagkatapos, namatay si David at inilibing sa kanyang lungsod.[#2:10 : Sa Hebreo, Lungsod ni David.]
11Naghari siya sa buong Israel sa loob ng apatnapung taon – pitong taon sa Hebron at 33 taon sa Jerusalem.
12Si Solomon ang pumalit sa ama niyang si David bilang hari, at tunay na matatag ang kaharian niya.
13Ngayon, si Adonias na anak ni Haguit ay pumunta kay Batsheba na ina ni Solomon. Nagtanong si Batsheba sa kanya, “Mabuti ba ang pakay mo sa pagpunta rito?”
Sumagot si Adonias, “Mabuti po.
14May hihilingin lang ako sa inyo.”
Nagtanong si Batsheba, “Ano ba ang hihilingin mo?”
15Sumagot si Adonias, “Nalalaman ninyong ako na sana ang naging hari, at hinihintay ito ng buong Israel. Pero iba ang nangyari; ang kapatid ko ang siyang naging hari, dahil iyan ang gusto ng Panginoon .
16Ngayon, may hihilingin ako sa inyo. At kung maaari, huwag nʼyo akong biguin.”
Nagtanong si Batsheba, “Ano ba iyon?”
17Sumagot si Adonias, “Kung maaari ay hilingin nʼyo kay Haring Solomon na mapangasawa ko si Abisag na taga-Shunem. Alam kong hindi siya tatanggi sa inyo.”
18Sumagot si Batsheba, “Sige, sasabihin ko sa hari.”
19Kaya pumunta si Batsheba kay Haring Solomon upang sabihin sa kanya ang tungkol sa kahilingan ni Adonias. Pagkakita ni Solomon sa kanya, tumayo si Solomon mula sa kanyang trono para salubungin siya, at agad siyang yumukod sa kanyang ina. Pagkatapos, muli siyang naupo sa kanyang trono. Nagpakuha siya ng upuan at ipinalagay sa kanan niya at doon pinaupo ang kanyang ina.
20Sinabi ni Batsheba, “Mayroon akong maliit na kahilingan sa iyo. Huwag mo sana akong tatanggihan.”
Sumagot ang hari, “Ano po ang hihilingin ninyo? Hindi ko kayo bibiguin.”
21Sinabi ni Batsheba, “Hayaan mong mapangasawa ng iyong kapatid na si Adonias si Abisag na taga-Shunem.”
22Nagtanong si Haring Solomon, “Bakit hinihiling ninyo na mapangasawa ni Adonias si Abisag? Baka hilingin nʼyo rin na ibigay ko sa kanya ang kaharian ko dahil mas matanda siya sa akin at kakampi niya ang paring si Abiatar at si Joab na anak ni Zeruias!”
23Pagkatapos, sumumpa si Haring Solomon sa pangalan ng Panginoon , “Parusahan nawa ako ng Diyos kung hindi buhay ni Adonias ang kapalit ng kahilingan niyang ito!
24Ang Panginoon ang siyang nagluklok sa akin sa trono ng aking amang si David. Tinupad niya ang kanyang pangako na ibibigay niya ang kaharian sa akin at sa aking mga angkan. Kaya sumusumpa ako sa buháy na Panginoon na mamamatay si Adonias sa araw na ito!”
25Kaya iniutos ni Haring Solomon kay Benaias, na anak ni Jehoiada, na patayin si Adonias, at pinatay nga niya ito.
26Pagkatapos, sinabi ni Haring Solomon kay Abiatar na pari, “Umuwi ka sa iyong bukirin sa Anatot. Dapat kang patayin pero hindi kita papatayin ngayon dahil katiwala ka ng Kahon ng Makapangyarihang Panginoon noong kasama ka pa ng aking amang si David, at nakihati ka sa kanyang mga pagtitiis.”
27Kaya tinanggal ni Solomon si Abiatar sa kanyang tungkulin bilang pari ng Panginoon . At natupad ang sinasabi ng Panginoon doon sa Silo tungkol sa pamilya ni Eli.
28Hindi tumulong si Joab kay Absalom na maging hari, ngunit tumulong siya kay Adonias. Kaya nang mabalitaan niya ang pagkamatay ni Adonias, tumakas siya papunta sa tolda ng Panginoon at humawak sa mga sungay na bahagi ng altar.[#2:28 Ang kahit sinong hahawak sa parang mga sungay na bahagi ng altar ay hindi papatayin.]
29Nang mabalitaan ni Haring Solomon na tumakas si Joab papunta sa tolda ng Panginoon at lumapit sa altar, iniutos niya kay Benaias na anak ni Jehoiada, na patayin si Joab.
30Kaya pumunta si Benaias sa tolda ng Panginoon at sinabihan si Joab, “Lumabas ka, sabi ng hari!”
Ngunit sumagot si Joab, “Hindi ako lalabas; dito ako mamamatay!” Bumalik si Benaias sa hari at sinabi ang sagot ni Joab.
31-32Sinabi ng hari kay Benaias, “Gawin mo ang sinabi niya. Patayin mo siya at ilibing, upang ako at ang pamilya ng aking ama ay hindi managot sa pagpatay niya nang walang dahilan kay Abner na anak ni Ner, na kumander ng mga sundalo ng Israel, at kay Amasa na anak ni Jeter, na kumander ng mga sundalo ng Juda. Pinatay niya ang mga taong ito nang hindi nalalaman ng aking ama. Mas matuwid at mabuti ang mga taong ito kaysa sa kanya. Ngayon, gagantihan siya ng Panginoon sa ginawa niya sa kanila.
33Siya at ang angkan niya ang mananagot magpakailanman sa pagkamatay ng mga taong ito. Ngunit si David at ang angkan niyaʼt kaharian ay bibigyan ng mabuting kalagayan magpakailanman.”
34Kaya pinuntahan ni Benaias si Joab at pinatay. Inilibing siya malapit sa bahay niya sa ilang.[#2:34 : O sa libingan.]
35Pagkatapos, ipinalit ng hari si Benaias kay Joab bilang kumander ng mga sundalo at ang ipinalit niya kay Abiatar ay ang paring si Sadoc.
36Ipinatawag ng hari si Shimei at sinabi sa kanya, “Magpatayo ka ng sarili mong bahay dito sa Jerusalem at tumira ka sa bahay mo. Huwag kang umalis sa lungsod at pumunta sa ibang lugar.
37Sa oras na umalis ka at tumawid sa Lambak ng Kidron, tiyak na mamamatay ka. At kapag nangyari ito, ikaw na ang may pananagutan nito.”
38Sumagot si Shimei sa hari, “Mabuti po ang sinabi nʼyo, susundin ko ito!” Kaya tumira si Shimei sa Jerusalem nang matagal na panahon.
39Ngunit pagkalipas ng tatlong taon, lumayas ang dalawa sa mga alipin ni Shimei, at pumunta sa hari ng Gat na si Aquis, na anak ni Maaca. Nang mabalitaan ito ni Shimei,
40nilagyan niya agad ng upuan ang kanyang asno at sumakay, pumunta siya kay Aquis sa Gat upang hanapin ang dalawang alipin niya. Nakita niya sila at isinama pauwi.
41Nang mabalitaan ni Solomon na umalis si Shimei sa Jerusalem at pumunta sa Gat at nakabalik na,
42ipinatawag niya ito at sinabihan, “Hindi baʼt pinasumpa kita sa pangalan ng Panginoon at binalaan na sa oras na umalis ka sa Jerusalem at pumunta sa ibang lugar ay tiyak na mamamatay ka? At hindi ba sinabi mo na mabuti ang sinabi ko at susundin mo ito?
43Ngayon, bakit hindi mo sinunod ang ipinangako mo sa Panginoon ? Bakit hindi mo tinupad ang mga iniutos ko sa iyo?”
44Sinabi pa ng hari sa kanya, “Tiyak na naaalala mo ang lahat ng kasamaan na ginawa mo sa aking amang si David. Ngayon, gagantihan ka ng Panginoon sa masamang ginawa mo.
45Ngunit pagpapalain ako ng Panginoon , at ang kaharian ng aking ama na si David ay magpapatuloy sa kanyang mga angkan magpakailanman.”
46Pagkatapos, inutusan ng hari si Benaias na patayin si Shimei. Kaya dinala ni Benaias si Shimei sa labas at pinatay.
Mas lalong tumatag ang kaharian sa ilalim ng pamamahala ni Solomon.