2 Samuel 22

Papuring Awit ni David

¹Umawit si David sa Panginoon nang iligtas siya ng Panginoon sa kamay ng kanyang mga kalaban at kay Saul.

²Ito ang awit niya:

“Ang Panginoon ang aking matibay

na batong kanlungan

at pananggalang.

Siya ang aking Tagapagligtas

na nag-iingat sa akin.

³Siya ang aking batong kanlungan,

ang aking kublihan.

Inililigtas niya ako

sa mararahas na tao.

⁴“Karapat-dapat kayong purihin Panginoon ,

dahil kapag tumatawag ako sa inyo,

inililigtas nʼyo ako sa mga kalaban ko.

⁵Tulad ng mga alon,

ang kamatayan ay nakapalibot sa akin.

Ang mga pinsalaʼy tulad

ng malakas na agos na tumatangay sa akin.

⁶Ang kamatayaʼy parang lubid

na nakapulupot sa akin

at parang bitag sa aking daraanan.

⁷“Sa aking kahirapan,

humingi ako ng tulong sa inyo,

Panginoon na aking Diyos,

at pinakinggan nʼyo

ang panalangin ko roon sa inyong templo.

⁸Lumindol,

at ang pundasyon

ng kalangitan ay nayanig,

dahil kayo, Panginoon ,

ay nagalit.

⁹Umusok din ang inyong ilong,

at ang inyong bibig ay bumuga

ng apoy at mga nagliliyab na baga.

¹⁰Binuksan nʼyo ang langit

at kayoʼy bumaba,

at tumuntong sa maitim

at makapal na ulap.

¹¹Kayoʼy sumakay sa isang kerubin,

at mabilis na lumipad na dala ng hangin.

¹²Pinalibutan mo ang iyong sarili ng kadiliman,

ng madilim at makapal na ulap.

¹³Kumidlat mula sa inyong kinaroroonan,

at mula rooʼy bumagsak ang mga yelo

at nagliliyab na baga.

¹⁴Ang tinig nʼyo,

Kataas-taasang Diyos

na aming Panginoon ,

ay dumadagundong mula sa langit.

¹⁵Pinana nʼyo ng kidlat

ang inyong mga kalaban

at nataranta silang nagsitakas.

¹⁶Sa inyong tinig at matinding galit,

natuyo ang dagat

at nakita ang lupa sa ilalim nito,

pati na rin ang pundasyon

ng mundo ay nalantad.

¹⁷“At mula sa langit akoʼy inabot nʼyo

at inahon mula sa malalim na tubig.

¹⁸Iniligtas nʼyo ako sa kapangyarihan

ng aking mga kalaban

na hindi ko kayang labanan.

¹⁹Sinalakay nila ako sa oras ng aking kagipitan.

Ngunit sinaklolohan nʼyo ako, Panginoon .

²⁰Dinala nʼyo ako

sa lugar na walang kapahamakan

dahil nalulugod kayo sa akin.

²¹“Pinagpala nʼyo ako

dahil akoʼy namumuhay sa katuwiran.

Sa kalinisan ng aking kamay

akoʼy inyong ginantimpalaan.

²²Dahil sinusunod ko ang inyong kalooban,

at hindi ko kayo tinalikuran,

Panginoon na aking Diyos.

²³Tinutupad ko ang lahat

ng inyong utos.

Ang inyong mga tuntunin

ay hindi ko sinusuway.

²⁴Alam nʼyong namumuhay ako

nang walang kapintasan,

at iniiwasan ko ang kasamaan.

²⁵Kaya naman akoʼy inyong ginagantimpalaan,

dahil nakita nʼyong

wala akong ginagawang kasalanan.

²⁶“Tapat kayo sa mga tapat sa inyo,

at mabuti kayo sa mabubuting tao.

²⁷Tapat kayo sa mga taong totoo sa inyo,

ngunit mas tuso kayo

sa mga taong masama.

²⁸Inililigtas nʼyo ang mga mapagpakumbaba,

ngunit ibinababa nʼyo

ang mga mapagmataas.

²⁹Panginoon , kayo ang aking liwanag

Sa kadiliman kayo ang aking ilaw.

³⁰Sa tulong nʼyo, o Diyos,

kaya kong salakayin

ang grupo ng mga sundalo,

at kaya kong akyatin ang pader

ng kanilang tanggulan.

³¹“Ang pamamaraan nʼyo,

O Diyos, ay walang kamalian.

Ang inyong mga salita Panginoon

ay maaasahan.

Kayoʼy katulad ng isang kalasag

sa mga kumakanlong sa inyo.

³²Kayo lang, Panginoon ,

ang tunay na Diyos, at wala nang iba.

At kayo lang talaga

ang aming Batong kanlungan.

³³Kayo, O Diyos,

ang nagbibigay sa akin ng kalakasan,

at nagbabantay sa aking daraanan.

³⁴Pinatatatag nʼyo ang aking paa tulad

ng paa ng usa,

upang maging ligtas ang pag-akyat ko

sa matataas na lugar.

³⁵Sinasanay nʼyo ako sa pakikipaglaban,

at ang aking brasoʼy nakakabanat ng panang tanso.

³⁶Ang katulad nʼyo ay kalasag

na nag-iingat sa akin,

at sa pamamagitan ng inyong tulong

ay naging kilala ako.

³⁷Pinaluwang nʼyo ang aking dadaanan,

kaya hindi ako natitisod.

³⁸Hinabol ko ang aking mga kalaban

at inabutan ko sila,

at hindi ako tumigil hanggang sa naubos ko sila.

³⁹Hinampas ko sila hanggang sa magsibagsak,

at hindi na makabangon sa aking paanan.

⁴⁰Binigyan nʼyo ako ng lakas sa pakikipaglaban,

kaya natalo ko ang aking mga kalaban.

⁴¹Dahil sa inyo,

umatras ang aking mga kaaway

na may galit sa akin,

at silaʼy pinatay ko.

⁴²Humingi sila ng tulong,

ngunit walang sinumang tumulong.

Tumawag din sila sa inyo Panginoon ,

ngunit kayoʼy hindi tumugon.

⁴³Dinurog ko sila

hanggang sa naging parang alikabok na lamang

na inililipad ng hangin,

at tinatapak-tapakan

na parang putik sa kalsada.

⁴⁴Iniligtas nʼyo ako Panginoon

sa mga rebelde kong mamamayan.

Ginawa nʼyo akong pinuno ng mga bansa.

Ang mga taga-ibang lugar

ay sumusunod sa akin.

⁴⁵Yumuyukod sila sa akin nang may takot

at sinusunod ang aking mga utos.

⁴⁶Nawawalan sila ng lakas ng loob,

kaya lumalabas sila

sa kanilang pinagtataguan

na nanginginig sa takot.

⁴⁷Buháy kayo, Panginoon !

Karapat-dapat kayong purihin at dakilain,

O Diyos na aking Batong kanlungan

at Tagapagligtas!

⁴⁸Pinaghigantihan nʼyo ang aking mga kaaway,

at ipinasailalim mo ang mga bansa

sa aking kapangyarihan.

⁴⁹Inilalayo nʼyo ako sa mararahas kong kalaban,

at pinagtagumpay nʼyo ako sa kanila.

⁵⁰Kaya pararangalan ko kayo

sa mga bansa, O Panginoon .

Aawitan ko kayo ng mga papuri.

⁵¹Sa hinirang nʼyong hari

ay nagbigay kayo ng maraming tagumpay.

Ipinapadama ninyo ang inyong wagas na pag-ibig

sa inyong hinirang na si David

at sa lahat ng kanyang lahi,

magpakailanman.”