Amos 1

¹Ito ang mga pahayag ni Amos na isa sa mga pastol ng kawan ng tupa sa bayan ng Tekoa. Ang mga pangitaing ito tungkol sa Israel ay ipinakita sa kanya noong panahon na si Uzias ang hari ng Juda at si Jeroboam na anak ni Jehoas ang hari ng Israel, dalawang taon bago lumindol.

²Sinabi ni Amos:

“Umaatungal ang Panginoon

mula sa Zion;

dumadagundong ang tinig niya

mula sa Jerusalem.

Dahil dito natutuyo ang mga pastulan

ng mga pastol

at nalalanta ang mga tanim

sa tuktok ng Bundok ng Carmel.”

Ang Hatol sa mga Karatig-bansa ng Israel

³Ito ang sinasabi ng Panginoon tungkol sa Siria:

“Dahil sa paulit-ulit na pagkakasala

ng mga taga-Damasco,

parurusahan ko sila.

Sapagkat pinagmalupitan nila

ang mga taga-Gilead

na parang giniik ng tabla

na may mga ngiping bakal sa ilalim.

⁴Kaya susunugin ko

ang palasyo ni Haring Hazael

at ang matitibay na bahagi ng Damasco

na ipinagawa ng anak niyang

si Haring Ben-hadad.

⁵Wawasakin ko ang pintuan ng Damasco

at papatayin ko ang pinuno

ng Lambak ng Aven at ng Bet-eden.

Bibihagin at dadalhin sa Kir

ang mga mamamayan ng Siria.

Ako, ang Panginoon ,

ang nagsasabi nito.”

Ang Parusa sa Bansang Filistia

⁶Ito ang sinasabi ng Panginoon tungkol sa Filistia:

“Dahil sa paulit-ulit na pagkakasala

ng mga taga-Gaza,

parurusahan ko sila.

Sapagkat binihag nila

ang lahat ng naninirahan

sa mga bayan

at ipinagbili bilang mga alipin

sa Edom.

⁷Kaya susunugin ko

ang mga pader ng Gaza

at ang matitibay

na bahagi ng lungsod na ito.

⁸Lilipulin ko ang mga pinuno

ng Asdod at ng Ashkelon,

at parurusahan ko

ang mga taga-Ekron.

At ang mga Filisteong makakatakas sa parusa

ay mamamatay din.

Ako, ang Makapangyarihang Panginoon ,

ang nagsasabi nito.”

Ang Parusa sa Bansang Tiro

⁹Ito ang sinasabi ng Panginoon tungkol sa Tiro:

“Dahil sa paulit-ulit

na pagkakasala ng mga taga-Tiro,

parurusahan ko sila.

Sapagkat ipinagbili nila

ang lahat ng naninirahan

sa mga bayan

bilang mga alipin sa Edom.

Hindi nila sinunod

ang kanilang kasunduang pangkapatiran

sa mga mamamayang ito.

¹⁰Kaya susunugin ko

ang mga pader ng Tiro

at ang matitibay na bahagi

ng lungsod nito.”

Ang Parusa sa Bansang Edom

¹¹Ito ang sinasabi ng Panginoon tungkol sa Edom:

“Dahil sa paulit-ulit na pagkakasala

ng mga taga-Edom,

parurusahan ko sila.

Sapagkat tinugis nila

ang kanilang mga kamag-anak na mga Israelita

at walang awang pinatay.

Hinding-hindi mawawala

ang kanilang galit sa mga Israelita.

¹²Kaya susunugin ko ang Teman

at ang matitibay na bahagi ng Bosra.”

Ang Parusa sa Bansang Amon

¹³Ito ang sinasabi ng Panginoon tungkol sa Amon:

“Dahil sa paulit-ulit na pagkakasala

ng mga Amonita,

parurusahan ko sila.

Sapagkat nilaslas nila ang tiyan

ng mga buntis sa Gilead

nang salakayin nila ito,

upang mapalawak ang kanilang lupain.

¹⁴Kaya susunugin ko

ang mga pader ng Rabba

at ang matitibay

na bahagi ng lungsod na ito

habang nagsisigawan

ang mga kaaway

na sumasalakay sa kanila,

na parang umuugong na bagyo.

¹⁵At bibihagin ang hari ng Amon

gayon din ang kanyang mga opisyal,”

sabi ng Panginoon .