Amos 6

Kahabag-habag ang mga Panatag

¹Nakakaawa kayong mga pinuno

ng Zion at Samaria

na nagpapasarap sa buhay

at walang pakialam.

Itinuturing ninyo

ang inyong mga sarili

na mararangal na tao

ng nangungunang bansa,

at sa inyo nagtitiwala

ang inyong mga mamamayang

nangangailangan.

²Tingnan ninyo kung ano

ang nangyari

sa lungsod ng Calne,

ang malaking lungsod ng Hamat,

at ang lungsod ng Gat sa Filistia.

Mas makapangyarihan ba kayo

kaysa sa mga kahariang iyon?

Mas malawak ba

ang inyong lupain kaysa sa kanila?

³Kahabag-habag kayong nag-aakala

na hindi darating sa inyo

ang araw ng pagpaparusa.

Dahil sa ginagawa ninyong kasamaan,

lalo ninyong pinapadali

ang araw na iyon

na maghahari ang karahasan.

⁴Kahabag-habag kayong

mga pahiga-higa lang

sa inyong mga mamahaling kama

at nagpapakabusog sa masasarap

na pagkaing

karne ng batang tupa

at ng pinatabang guya.

⁵Kahabag-habag kayong mga kumakatha

ng mga awit

habang tumutugtog ng alpa

at mahilig tumugtog

ng mga tugtugin katulad ni David.

⁶Kahabag-habag kayong

malalakas uminom ng alak

at gumagamit ng mamahaling pabango,

ngunit hindi nagdadalamhati

sa sasapiting pagbagsak ng inyong bansa.

⁷Kaya kayong mga pinuno

ang unang bibihagin

at matitigil na ang inyong

mga pagpipista at pagwawalang-bahala.

Kinamumuhian ng Panginoon ang Pagmamataas ng Israel

⁸Sumumpa ang Makapangyarihang Panginoon , ang Panginoong Diyos ng mga Hukbo. Sinabi niya,

“Kinamumuhian ko

ang pagmamataas

ng mga lahi ni Jacob,

at kinasusuklaman

ang matitibay na bahagi

ng kanilang lungsod.

Kaya ipapasakop ko sa kaaway

ang kanilang lungsod

at ang lahat ng naroroon.”

⁹Kung may sampung tao na matitira sa isang bahay, lahat sila ay mamamatay.

¹⁰Kukunin ang mga bangkay na ito ng kanyang kamag-anak at ilalabas sa bahay upang sunugin. Itatanong niya sa sinumang nagtatago sa kaloob-looban ng bahay, “May kasama ka pa riyan?” Kapag ang sagot ay wala, sasabihin ng kamag-anak, “Tumahimik ka! Huwag mong banggitin ang pangalan ng Panginoon .”[#6:10 : O May bangkay pa ba riyan?]

¹¹Ang totoo, kapag ang Panginoon na ang nag-uutos,

mawawasak ang lahat ng bahay,

malaki man o maliit.

¹²Makakatakbo ba

ang kabayo sa batuhan?

Makakapag-araro ba

ang baka roon?

Siyempre hindi!

Subalit ginawa ninyong lason

ang katarungan,

at ang katuwiran

ay ginawa ninyong masama.

¹³Tuwang-tuwa kayo nang nasakop ninyo

ang mga bayan ng Lodebar at Karnaim,

at sinasabi ninyo,

“Natalo natin sila

sa pamamagitan ng sarili

nating kalakasan.”

¹⁴Ngunit ito ang sagot

ng Panginoong Diyos

ng mga Hukbo,

“Kayong mga mamamayan ng Israel

ay ipasasalakay ko sa isang bansa.

Pahihirapan nila kayo

at sasakupin ang inyong lugar

mula Lebo-hamat hanggang

sa lambak ng Araba.”