Ezekiel 14

Hinatulan ang mga Sumasamba sa Diyos-diyosan

¹Minsan, lumapit sa akin ang mga pinuno ng Israel at umupo sa harap ko upang sumangguni sa Panginoon .

²Sinabi sa akin ng Panginoon ,

³“Anak ng tao, ang mga taong iyan ay nagmamahal sa mga diyos-diyosan na siyang nagtulak sa kanila sa pagkakasala, kaya hindi ako makakapayag na humingi sila ng payo sa akin.

⁴Sabihin mo sa kanila na ako, ang Makapangyarihang Panginoon , ay nagsasabi: ‘Ang sinumang Israelitang nagmamahal sa mga diyos-diyosan na siyang nagtulak sa kanya sa pagkakasala, at pagkatapos ay humihingi ng payo sa isang propeta ay tuwiran kong sasagutin sa pamamagitan ng parusang nararapat at ayon sa dami ng kanyang mga diyos-diyosan.

⁵Gagawin ko ito upang magsibalik sa akin ang lahat ng Israelitang lumayo sa akin dahil sa mga diyos-diyosan nila.’

⁶“Kaya sabihin mo ngayon sa mga Israelitang ako, ang Makapangyarihang Panginoon , ay nagsasabi: Magsisi kayo at itakwil na ang mga diyos-diyosan ninyo at talikuran ang lahat ng kasuklam-suklam ninyong mga gawa.

⁷Ang sinumang Israelita o dayuhang nakatira sa Israel, na humiwalay sa akin at nagmamahal sa mga diyos-diyosan na siyang nagtulak sa kanya sa pagkakasala, at pagkatapos ay humingi ng payo sa akin sa pamamagitan ng paglapit sa mga propeta, ako, ang Panginoon , ang tuwirang sasagot mismo sa kanya sa pamamagitan ng parusa.

⁸Kakalabanin ko siya at gagawing babala sa mga tao, at siyaʼy pag-uusapan nila. Ihihiwalay ko siya sa mga mamamayan ko. At malalaman ninyo na ako ang Panginoon .

⁹“Kung ang isang propeta ay iniligaw sa pagpapahayag ng mali, itoʼy dahil sa ako, ang Panginoon ay nag-udyok sa kanya upang magpahayag ng mali. Parurusahan ko siya at ihihiwalay sa mga mamamayan kong Israel.

¹⁰Ang propetang iyon at ang mga taong humingi ng payo sa kanya ay parehong magdurusa dahil sa kanilang kasalanan.

¹¹Gagawin ko ito upang ang mga Israelita ay hindi na lumayo sa akin at nang hindi na nila dungisan ang sarili nila sa pamamagitan ng paggawa ng kasalanan. Kung magkagayon, magiging mga mamamayan ko sila at akoʼy magiging Diyos nila. Ako, ang Makapangyarihang Panginoon , ang nagsasabi nito.”

¹²Sinabi sa akin ng Panginoon ,

¹³“Anak ng tao, kung ang isang bansa ay magkasala sa pamamagitan ng pagtatakwil sa akin, parurusahan ko sila at aalisin ko ang pinagmumulan ng kanilang pagkain. Magpapadala ako ng taggutom upang mamatay sila pati na ang kanilang mga hayop.

¹⁴Kahit kasama pa nila sina Noe, Daniel at Job, silang tatlo lang ang maliligtas dahil sa matuwid nilang pamumuhay. Ako, ang Makapangyarihang Panginoon , ang nagsasabi nito.

¹⁵“Sakaling magpadala ako ng mababangis na hayop sa bansang iyon upang patayin ang mga mamamayan, magiging tiwangwang ito at walang dadaan doon dahil sa takot sa mababangis na hayop,

¹⁶kahit na kasama pa nila ang tatlong taong binanggit ko, ako, ang Makapangyarihang Panginoon na buhay, ay sumusumpang hindi makapagliligtas ang tatlong iyon kahit ng mga anak nila. Sila lang ang maliligtas, at ang bansang iyon ay magiging tiwangwang.

¹⁷“O kung padalhan ko naman ng digmaan ang bansang iyon upang patayin ang mga mamamayan at ang mga hayop nila,

¹⁸kahit na kasama pa nila ulit ang tatlong taong binanggit ko, ako, ang Makapangyarihang Panginoon na buhay, ay sumusumpang hindi pa rin nila maililigtas kahit ang mga anak nila maliban lang sa kanilang sarili.

¹⁹“O kung dahil sa galit ko sa kanila, padalhan ko ng sakit ang bansang iyon upang patayin ang mga mamamayan at ang mga hayop nila,

²⁰kahit na kasama pa nga nila sina Noe, Daniel at Job, ako, ang Makapangyarihang Panginoon na buhay, ay sumusumpang hindi nila maililigtas kahit ang kanilang mga anak kundi ang mga sarili lang nila dahil sa matuwid nilang pamumuhay.

²¹“Ako, ang Makapangyarihang Panginoon ay nagsasabi na magiging kahabag-habag ang Jerusalem kapag ipinadala ko na sa kanila ang apat na mabibigat na parusa – ang digmaan, taggutom, mababangis na hayop at mga karamdaman – na papatay sa mga mamamayan nila at mga hayop.

²²Ngunit may makakaligtas sa kanila na dadalhin dito sa Babilonia upang isama sa inyo bilang mga bihag. Makikita ninyo ang masasamang ugali nila at gawa, at mawawala ang sama ng loob ninyo sa akin sa pagpaparusa ko sa Jerusalem.

²³Oo, mawawala ang sama ng loob ninyo kapag nakita ninyo ang pag-uugali nila at mga gawa, at maiintindihan ninyo na tama ang ginawa ko sa mga taga-Jerusalem. Ako, ang Makapangyarihang Panginoon , ang nagsasabi nito.”