Ezekiel 41

¹Pagkatapos, dinala ako ng tao sa Banal na Lugar ng Templo. Sinukat niya ang magkabilang panig ng pader ng daanan ng Banal na Lugar, sampung talampakan ang taas,

²walong talampakan ang kapal ng pader at labingwalong talampakan ang lawak ng daanan. Sinukat din niya ang bulwagan ng Banal na Lugar, pitumpung talampakan ang haba at tatlumpuʼt limang talampakan ang lawak.

³Pagkatapos, pumasok ang tao sa Pinakabanal na Lugar. Sinukat din niya ang magkabilang panig ng pader ng daanan ng Pinakabanal na Lugar, tatlong talampakan ang kapal ng pader at labindalawang talampakan ang taas. Sampung talampakan ang luwang ng daanan.

⁴Sinukat niya ang bulwagan ng Pinakabanal na Lugar, at tatlumpuʼt limang talampakan ang haba nito ganoon din ang luwang. Pagkatapos, sinabi ng tao sa akin, “Ito ang Pinakabanal na Lugar.”

⁵Pagkatapos, sinukat ng tao ang pader ng Templo at ang kapal nito ay sampung talampakan. Sa labas ng pader na ito na nakapaligid sa Templo ay may sunod-sunod na silid na tig-pipitong talampakan ang luwang.

⁶May tatlong palapag ang mga silid na ito at bawat palapag ay may tatlumpung silid. Ang bawat palapag ay nakapatong sa malapad na parang biga sa gilid ng pader ng Templo. Kaya hindi na nito kailangan ng mga biga.

⁷Ang pader ay papanipis mula sa ibaba pataas, kaya ang mga silid ay unti-unting lumuluwang mula sa unang palapag hanggang sa pangatlong palapag. May hagdanan mula sa unang palapag papunta sa ikalawang palapag hanggang sa ikatlong palapag.

⁸Nakita ko ang Templo na nakapatong sa pundasyon na ang sukat ay labing-isang talampakan ang taas, at ito rin ang pundasyon ng mga silid sa gilid ng Templo.

⁹Ang pader sa bandang labas ng mga silid ay walong talampakan ang kapal. May bukas na bahagi sa pagitan ng mga silid na ito

¹⁰at sa ibang silid na may luwang na tatlumpuʼt limang talampakan at nakapaikot sa Templo.

¹¹May dalawang pinto papunta sa mga silid sa gilid mula sa bukas na bahagi, ang isa ay sa gawing hilaga at ang isa ay sa gawing timog. Ang tapat ng bakanteng lugar ay may daanan na ang luwang ay walong talampakan.

¹²May nakita akong isang gusali na nakaharap sa bakuran ng Templo sa kanluran. Ang lawak ng gusaling ito ay 123 talampakan, at ang haba ay 158 talampakan, at ang kapal ng pader ay walong talampakan.

¹³Pagkatapos, sinukat ng tao ang haba ng Templo, at itoʼy 175 talampakan. Ang sukat mula sa likurang bahagi ng Templo papunta sa kabilang bahagi ng pader ng gusali sa kanluran ay 175 talampakan.

¹⁴Ang luwang ng bulwagan sa loob sa gawing silangan, sa harap ng Templo ay 175 talampakan din.

¹⁵Pagkatapos, sinukat din ng tao ang haba ng gusali sa kanluran na nakaharap sa loob ng bulwagan na likod ng Templo, pati ang mga pader sa bawat tabi nito, at ito ay may sukat na 175 talampakan. Ang Banal na Lugar, ang Pinakabanal na Lugar, at ang balkonahe ng Templo

¹⁶ay nababalot ng tabla, pati ang palibot ng maliliit na bintana. Ang tatlong silid sa magkabilang daanan ay nababalot din ng tabla mula sa sahig hanggang bintana. Ang mga bintanang ito ay maaaring isara.[#41:16 : Ganito sa tekstong Septuagint. Sa tekstong Hebreo, ang sahig sa silong ng pintuan.]

¹⁷Ang dingding sa itaas ng pinto na papunta sa Pinakabanal na Lugar ay nababalot din ng mga tabla. Ang buong dingding sa loob ng Templo

¹⁸ay napapalamutian ng mga nakaukit na punong palma at mga kerubin na may dalawang mukha.

¹⁹Ang isang kerubin ay mukha ng taong nakaharap sa palmera at ang isa naman ay mukha ng leon na nakaharap din sa kabilang palma. Nakaukit ang mga ito sa lahat ng dingding ng Templo.

²⁰Mula sa sahig hanggang sa itaas, nakaukit ang kerubin at mga palmera pati na sa dingding sa labas ng Banal na Lugar.

²¹Parisukat ang hamba ng pinto ng Banal na Lugar. Sa harap ng pinto ng Banal na Lugar ay may parang

²²altar na kahoy na limang talampakan ang taas at tatlong talampakan ang haba at tatlo ring talampakan ang luwang. Ang mga sulok, sahig at mga gilid ay puro kahoy. Sinabi sa akin ng tao, “Ito ang mesa sa harap ng Panginoon .”

²³Ang Banal na Lugar at ang Pinakabanal na Lugar ay may tigdalawang pinto,

²⁴ang bawat pinto ay may dalawang hati na maaaring itiklop.

²⁵Ang pintuan ng Banal na Lugar ay may mga nakaukit na kerubin at punong palma gaya ng sa dingding. At ang balkonahe ay may mga bubong na kahoy.

²⁶Sa bawat gilid ng balkonahe ay may maliliit na bintanang may nakaukit sa gilid na mga puno ng palma. Ang mga silid sa gilid ng Templo ay may bubong din.