Job 16

Sumagot si Job

¹Sumagot si Job,

²“Napakinggan ko na iyan noon pa.

Sa halip na aliwin ninyo ako,

lalo nʼyo pang pinabigat

ang paghihirap ko.

³Hindi na ba kayo titigil

sa pagsasalita ng walang kabuluhan?

Ano baʼng gumugulo sa isipan nʼyo

at wala kayong tigil

sa pakikipagtalo sa akin?

⁴Kung kayo ang nasa kalagayan ko,

masasabi ko rin ang katulad

ng mga sinasabi ninyo sa akin.

Pagsasabihan ko kayo

at kukutyain pa.

⁵Ngunit hindi ko gagawin iyon.

Sa halip, magsasalita ako

ng mga salitang makapagpapalakas

at makapagpapaaliw sa inyo.

⁶“Ngunit sa ngayon, patuloy pa rin

ang paghihirap ko kahit ano pa

ang sabihin ko.

At kung tumahimik man ako,

hindi rin ito mawawala.

⁷O Diyos, pinanghina nʼyo ako

at winasak ang buong sambahayan ko.

⁸Pinapayat nʼyo ako; butoʼt balat na lang ako,

at ayon sa iba ito ang katunayan

na akoʼy nagkasala.

⁹Sa galit nʼyo, O Diyos,

sinalakay nʼyo ako.

Para kayong mabangis na hayop

na lumuray ng aking laman.

Nagngangalit ang inyong ngipin

at tinititigan nʼyo ako

na parang akoʼy inyong kaaway.

¹⁰Kinukutya ako

at pinagtatawanan ng mga tao.

Sinasampal upang hiyain.

Nagkaisa sila laban sa akin.

¹¹Ipinaubaya ako ng Diyos

sa kamay ng taong masasama

at makasalanan.

¹²Maganda ang kalagayan ko noon,

ngunit dinurog niya ako.

Hinawakan niya ako sa leeg,

inilugmok, at ginawa niya

akong puntiryahan.

¹³Pinalibutan ako ng mga tagapana niya

at walang awang pinagpapana.

Tinamaan ang aking bato,

at ang apdo koʼy bumulwak sa lupa.

¹⁴Paulit-ulit niya akong sinusugatan.

Sinasalakay niya akong parang mandirigma.

¹⁵“Nagdamit ako ng sako

at naupo sa lupa upang magluksa.

¹⁶Namumula na ang aking mukha

at namumugto na ang aking mga mata

sa kakaiyak.

¹⁷Wala akong nagawang kasalanan

at tapat ang aking panalangin.

¹⁸“Ang katulad koʼy isang taong pinatay

na nakikiusap sa lupa na huwag tatabunan

ang kanyang dugo hanggaʼt

hindi niya nakakamtan

ang katarungan.

¹⁹Kahit ngayon ang saksi koʼy nasa langit.[#16:19 : Maaaring isa sa makalangit na nilalang.]

Siya ang magpapatunay

na wala akong kasalanan.

²⁰Hinahamak ako ng mga kaibigan ko;

ngunit umiiyak ako sa Diyos

at humihingi ng tulong sa kanya.

²¹Ang saksi ko ang siyang magmamakaawa

sa Diyos para sa akin,

katulad ng taong nakikiusap

para sa kanyang kaibigan.

²²Sapagkat malapit na

akong pumanaw

at hindi na babalik pa.