Job 22

Nagsalita si Elifaz

¹Pagkatapos, sumagot si Elifaz na taga-Teman,

²“May pakinabang ba ang tao sa Diyos?

Kahit na marunong pa ito,

wala itong maitutulong sa kanya.

³Matutuwa kaya ang Diyos na Makapangyarihan

kung matuwid ka?

May mapapala ba siya sa iyo

kung walang kapintasan ang buhay mo?

⁴“Sinasaway ka at hinahatulan ng Diyos

hindi dahil may takot ka sa kanya,

⁵kundi dahil sa sukdulan na ang kasamaan mo

at walang tigil ang paggawa mo ng kasalanan.

⁶Walang awa mong kinukuha

ang damit ng iyong kapwa

bilang garantiya sa kanyang utang sa iyo.

⁷Hindi mo binibigyan ng tubig ang nauuhaw

at hindi mo rin binibigyan

ng pagkain ang nagugutom.

⁸Ginagamit mo ang iyong kapangyarihan

at kadakilaan sa pangangamkam ng lupa.

⁹Kapag humihingi sa iyo ng tulong

ang mga biyuda,

pinauuwi mo silang walang dala.

Pinagmamalupitan mo pa

pati ang mga ulila.

¹⁰Iyan ang mga dahilan

kung bakit napapalibutan ka ng patibong

at dumarating sa iyo

ang biglang pagkatakot.

¹¹Iyan din ang mga dahilan

kung bakit nadiliman ka

at hindi nakakita,

at inaapawan pa ng baha.

¹²“Ang Diyos ay nasa kataas-taasang langit,

mas mataas pa sa pinakamataas na bituin.

¹³Kaya sinasabi mo,

‘Hindi alam ng Diyos

ang ginagawa ko.

Paano siya makakahatol

kung napapalibutan siya

ng makapal na ulap?

¹⁴Napapalibutan nga siya

ng makapal na ulap,

kaya hindi niya tayo makikita

habang naglalakad siya

sa itaas ng langit.’

¹⁵Patuloy ka bang susunod

sa pag-uugaling matagal nang sinusunod

ng taong masasama?

¹⁶Namatay sila nang wala pa sa panahon;

katulad sila ng pundasyon ng bahay

na tinangay ng baha.

¹⁷Sinabi nila sa Diyos na Makapangyarihan,

‘Pabayaan mo kami!’

at ‘Ano baʼng magagawa

ng Diyos na Makapangyarihan sa amin?’

¹⁸Ngunit ang Diyos ang siyang pumuno

sa kanilang tahanan ng mabubuting bagay.

Kaya ang ipapayo ng masasamang tao

ay hindi ko tatanggapin.

¹⁹Kapag nakita ng mga taong matuwid

at walang kasalanan

ang kapahamakan ng mga taong masama,

matutuwa sila at magdiriwang.

²⁰Sasabihin nila, ‘Napahamak na

ang mga kaaway natin,

at natupok sa apoy ang kayamanan nila.’

²¹“Job, magpasakop ka sa Diyos

at makipagkasundo sa kanya

upang pagpalain ka niya.

²²Tanggapin mo ang kanyang mga itinuturo

at ingatan sa iyong puso

ang kanyang mga salita.

²³Kung manunumbalik ka sa Diyos

na Makapangyarihan,

at aalisin ang kasamaan

sa iyong sambahayan,

muli ka niyang bibiyayaan.

²⁴At kung ituturing mong parang buhangin lang

ang iyong kayamanan,

at itatapon sa ilog

ang iyong mamahaling ginto,

²⁵ang Diyos na Makapangyarihan

ang magiging kayamanan mo,

Mamahaling pilak siya para sa iyo.

²⁶At saka mo matatagpuan

ang kaligayahang nagmumula

sa Diyos na Makapangyarihan,

at hindi ka mahihiyang

lumapit sa kanya.

²⁷Manalangin ka sa kanya

at diringgin ka niya.

Tuparin mo

ang iyong mga pangako sa kanya.

²⁸Anuman ang binabalak mong gawin

ay mangyayari

at magiging maliwanag ang iyong daan.

²⁹Kung may taong nanghihina,

at kung idadalangin mo sa Diyos

na palakasin siya,

tutulungan niya ang taong iyon.

³⁰Pati ang mga taong nagkasala

ay ililigtas niya sa pamamagitan

ng buhay mong matuwid.”