Job 36

¹Nagpatuloy pa si Elihu,

²“Pagtiyagaan mo pa ako ng kaunti,

dahil may sasabihin pa ako

upang ipagtanggol ang Diyos.

³Marami akong nalalaman

at papatunayan ko sa iyo

na ang Diyos na lumikha sa akin ay tama.

⁴Tinitiyak ko sa iyong

hindi ako nagsisinungaling,

dahil ako na kausap moʼy

tunay na marunong.

⁵“Makapangyarihan ang Diyos,

ngunit wala siyang hinahamak.

Nalalaman niya ang lahat ng bagay.

⁶Hindi niya pinapayagang

mabuhay ang masama,

at ang mga inaapi

ay binibigyan niya ng katarungan.

⁷Hindi niya pinapabayaan

ang mga matuwid.

Pinararangalan niya sila

kasama ng mga hari magpakailanman.

⁸Ngunit kung silaʼy pinahihirapan

na parang ginagapos ng kadena,

⁹ipinapakita sa kanila ng Diyos

ang ginawa nilang kasalanan

na ipinagmamalaki pa nila.

¹⁰Ipinaririnig niya sa kanila

ang kanyang babala

at inuutusan silang tumalikod

sa kasamaan.

¹¹Kung susunod sila at maglilingkod sa kanya,

buong buhay silang mamumuhay

sa kasaganaan at kaligayahan.

¹²Ngunit kung hindi sila susunod,

mamamatay sila sa digmaan

na kapos sa kaalaman.

¹³“Ang mga taong hindi makadiyos

ay nagkikimkim ng galit sa puso,

at kahit na pinaparusahan na sila ng Diyos,

hindi pa rin sila humihingi

ng tulong sa kanya.

¹⁴Mamamatay silang nang maaga,

habang silaʼy bata pa

pagkatapos nilang sayangin

ang kanilang buhay sa kalaswaan.

¹⁵Ngunit sa pamamagitan

ng mga paghihirap,

tinuturuan ng Diyos ang mga tao.

Natututo silang makinig sa kanya

sa pamamagitan ng mga pagdurusa.

¹⁶“Inilalayo ka ng Diyos sa panganib

at binibigyan ng kalayaan at kasaganaan.

At mapupuno ng masasarap na pagkain

ang iyong hapag-kainan.

¹⁷Ngunit ngayong nararanasan mo

ang parusang nararapat sa masasamâ,

hindi ka na makakaiwas sa katarungan.

¹⁸Mag-ingat kaʼt

baka matukso ka sa kayamanan

at maakit sa malaking suhol.

¹⁹Makakatulong kaya sa iyong paghihirap

ang mga kayamanan moʼt kakayahan?

²⁰Huwag mong hahanapin ang gabi,[#36:20 : Ang ibig sabihin, ang oras ng pagpaparusa ng Diyos.]

ang panahon ng kapahamakan

ng mga bansa.

²¹Mag-ingat kaʼt

huwag gumawa ng masama.

Pinahihirapan ka

upang makaiwas sa kasamaan.

²²“Alalahanin mong ang Diyos

ay tunay makapangyarihan.

Walang guro na katulad niya.

²³Walang makapagtuturo sa kanya

kung ano ang dapat niyang gawin,

at walang makapagsasabing

nagkamali siya.

²⁴Huwag mong kalimutang purihin

ang kanyang mga ginawa

gaya ng ginagawa ng iba

sa kanilang pag-awit.

²⁵Nakita ng lahat ng tao ang kanyang mga gawa,

kahit tinitingnan ito mula sa malayo.

²⁶Tunay na makapangyarihan ang Diyos

at hinding-hindi natin kayang unawain

ang kanyang kadakilaan.

Kahit ang kanyang mga taon

ay hindi natin mabibilang.

²⁷“Ang Diyos ang nagpapaakyat

ng tubig mula sa lupa

at ginagawa niyang ulan.

²⁸Bumubuhos ang ulan

mula sa ulap

at ang lahat ng taoʼy nakikinabang.

²⁹Walang nakakaalam

kung paano kumakalat ang ulap,

at kung paano kumukulog sa langit

kung saan nananahan ang Diyos.

³⁰Masdan mo kung paano niya

pinakikidlat sa kanyang paligid,

at kung paano nito pinaliliwanag

hanggang sa dulo ng dagat.

³¹Ganito niya kinakalinga

ang mga bansa,

binibigyan niya sila

ng pagkaing sagana.

³²Hinahawakan niya ang kidlat

at inuutusang tamaan

ang sinumang nais niyang patamaan.

³³Ang kulog ay nagpapahiwatig

na may bagyong paparating,

kahit mga hayop ay alam

na itoʼy darating.