Job 39

¹“Alam mo ba kung kailan nanganganak

ang mga kambing sa gubat?

Nakakita ka na ba ng usa

na nanganganak?

²Binibilang mo ba ang mga buwan

ng kanilang pagbubuntis

hanggang sa sila ay manganak?

At alam mo rin ba

kung kailan sila manganganak?

³Nakayukyok silaʼt nagtitiis ng hirap

hanggang sa makapanganak.

⁴Paglaki ng kanilang mga anak sa kagubatan,

umaalis sila at hindi na bumabalik.

⁵“Sino ang nagpakawala

sa asnong-gubat?

Sino ang nagkalas ng tali nito?

⁶Ibinigay ko sa kanya ang ilang

upang kanyang tirhan,

pinatira ko siya sa lupaing pinabayaan.

⁷Lumalayo siya sa maingay na bayan

at ayaw niyang siya ay mapaamo.

⁸Paikot-ikot siya sa mga kabundukan

upang maghanap ng sariwang pastulan.

⁹“Papayag ba ang bakang-gubat

na pagsilbihan ka?

Mapapanatili mo kaya siya

sa kanyang sabsaban kung gabi?

¹⁰Matatalian mo kaya siya

at mapag-aararo sa iyong bukid?

¹¹Makakaasa ka kaya sa lakas niya

upang gawin ang mabibigat na gawain?

¹²Maaasahan mo kaya siyang

tipunin at hakutin

ang iyong ani papunta sa giikan?

¹³“Pumapagaspas nang may kagalakan

ang mga pakpak ng abestrus,

ngunit hindi nito mapapantayan

ang mga pakpak at balahibo ng tagak.

¹⁴Iniiwanan ng malaking ibong ito

ang kanyang mga itlog sa lupa

upang mainitan sa buhanginan.

¹⁵Hindi siya nag-aalalang

baka matapakan ito o madaganan

ng mga hayop sa gubat.

¹⁶Malupit siya sa kanyang mga sisiw,

parang hindi kanya kung ituring.

Hindi siya nag-aalala

na ang pinaghirapan niya

ay mawawalan ng kabuluhan.

¹⁷Sapagkat hindi siya binigyan

ng Diyos ng karunungan

at hindi rin binahagian

ng pang-unawa.

¹⁸Ngunit kapag tumakbo na siya,

tinatawanan niya ang kabayo

at ang sakay nito.

¹⁹“Ikaw ba ang nagbibigay

ng lakas sa kabayo?

Ikaw din ba ang naglagay

ng buhok sa kanyang leeg?

²⁰Ikaw ba ang nagpapalukso sa kanya

gaya ng isang balang

at nagiging kagimbal-gimbal

kapag itoʼy sumisinghal?

²¹Kumakahig siya sa lupa

na parang ipinagmamalaki

ang kanyang lakas.

Pagkatapos ay sumusugod siya sa digmaan.

²²Wala siyang kinatatakutan,

ni hindi siya natatakot sa espada.

²³Kumakalansing at kumikislap

ang mga sandata ng sumasakay sa kanya.

²⁴Lumilipad ang alikabok

sa bilis ng kanyang pagtakbo.

Hindi na siya mapigilan

kapag tumunog na ang trumpeta.

²⁵Sumisinghal siya

kapag naririnig ang trumpeta.

Naaamoy niya ang digmaan

kahit sa malayo,

at naririnig niya ang ingay ng digmaan

at ang sigaw ng mga kumander.

²⁶“Ang karunungan mo ba

ang nagpapalipad sa lawin

para ibuka ang pakpak nito

patungo sa timog?

²⁷Ikaw ba ang nag-uutos

sa agila na lumipad

at gumawa ng kanyang pugad

sa mataas na dako?

²⁸Nakatira ang agila

sa mataas na bato.

Ang matarik na lugar

ang kanyang taguan.

²⁹Mula doon naghahanap

siya ng madadagit,

kahit ang malayo

ay naaabot ng kanyang paningin.

³⁰At kapag may nakita siyang bangkay

ay pinupuntahan niya,

at ang dugo nito ang iniinom

ng kanyang mga inakay.”