1Sinabi pa ng Panginoon kay Job,
2“Makikipagtalo ka pa rin ba sa akin,
ako na Diyos na Makapangyarihan?
Sinasabi mong nagkamali ako.
Ngayon, sagutin mo ako.”
3Kaya sinagot ni Job ang Panginoon ,
4“Hindi po ako karapat-dapat
na sumagot sa inyo.
Tatahimik na lamang po ako.
5Marami na akong nasabi,
kaya hindi na po ako magsasalita.”
6At sinagot ng Panginoon si Job mula sa ipuipo,
7“Ihanda mo ang iyong sarili,
at sagutin mo ang mga tanong ko.
8“Gusto mo bang patunayan na mali ako
upang palabasin na ikaw ang tama?
9Ang kamay mo baʼy makapangyarihan
tulad ng sa Diyos?
Dadagundong ba ang boses mo
tulad ng sa kanya?
10Kung magagawa mo iyan,
patunayan mo na ikaw nga
ay makapangyarihan, marangal at dakila.
11Ipakita mo ang matindi mong galit
sa taong mayayabang at ibagsak sila.
12Wasakin mo ang taong masasama
sa kanilang kinatatayuan.
13Ilibing mo silang lahat sa lupa,
sa lugar ng mga patay.
14Kapag nagawa mo ang mga ito,
ako ang pupuri sa iyo
at tatanggapin kong may kakayahan ka
na iligtas ang iyong sarili.
15“Tingnan mo ang Behemot,[#40:15 : Maaaring isang elepante o hipopotamus o dambuhalang hayop panlupa.]
nilalang ko rin siya katulad mo.
Kumakain ito ng damo na tulad ng baka,
16ngunit napakalakas nito,
at napakatibay ng katawan.
17Ang buntot niyaʼy
tuwid na tuwid
na parang kahoy ng sedro,
at ang mga hitaʼy matipuno.
18Ang mga buto nitoʼy
tulad ng tubong tanso o bakal.
19Kahanga-hanga siya sa lahat
ng aking nilalang.
Ngunit ako na Manlilikha niya
ay hindi niya matatalo.
20Nanginginain siya sa mga kabundukan
habang naglalaro ang mga hayop sa gubat
malapit sa kanya.
21Nagpapahinga siya
sa matitinik na halamang
natatabunan ng talahib.
22Ang mga halamang matinik
at ang iba pang mga punongkahoy
sa tabi ng batis
ay nagiging kanlungan niya.
23Hindi siya natatakot
kahit na rumaragasa
ang tubig sa ilog.
Tahimik pa rin siya
kahit halos natatabunan na siya
ng tubig ng Ilog Jordan.
24Sino ang makakahuli sa kanya
sa pamamagitan ng pagbulag sa kanya?
Sino ang makakabitag sa kanya
at makakakawit sa ilong niya?