Josue 17

¹May ibinigay din na mga lupain para sa kalahating lahi ni Manases, na panganay na anak ni Jose. Ang Gilead at ang Bashan sa silangan ng Ilog Jordan ay ibinigay kay Maquir dahil mabuti siyang sundalo. (Si Maquir ang panganay na anak ni Manases at ang ama ni Gilead.)

²Ang lupain sa kanluran ng Jordan ay ibinigay sa ibang mga lahi ni Manases: ang mga sambahayan nina Abiezer, Helek, Asriel, Shekem, Hefer at Shemida. Sila ang mga lalaking anak ni Manases na anak ni Jose, at mga pinuno ng kani-kanilang angkan.

³Ngayon, may isang tao na ang pangalan ay si Zelofehad. Anak siya ni Hefer at apo ni Gilead. Si Gilead ay anak ni Maquir, at si Maquir ay anak ni Manases. Si Zelofehad ay walang anak na lalaki kundi mga babae lang. Silaʼy sina Mahlah, Noe, Hogla, Milca at Tirza.

⁴Pumunta sila kina Eleazar na pari, Josue na anak ni Nun at sa mga pinuno, at sinabi, “Nag-utos po ang Panginoon kay Moises na bigyan kami ng lupain gaya po ng mga kamag-anak naming lalaki.” Kaya binigyan sila ng bahagi nila ayon sa iniutos ng Panginoon .

⁵Ito ang dahilan kung bakit ang lahi ni Manases ay nakatanggap ng sampung bahagi ng lupain, hindi kasama ang Gilead at Bashan sa silangan ng Jordan,

⁶dahil binigyan din ng bahagi ang mga kalahing babae kagaya ng mga kalahi niyang lalaki. Ang Gilead ay ibinigay sa iba pang lahi ni Manases.

⁷Ang hangganan ng lupain ng lahi ni Manases ay nagmula sa Aser hanggang sa Micmetat, sa silangan ng Shekem papuntang timog sa lupain ng mga nakatira malapit sa bukal ng Tapua.[#17:7 : O nakatira sa En Tapua.]

⁸(Ang mga lupain sa paligid ng Tapua ay pagmamay-ari ng lahi ni Manases, pero ang Tapua, na nasa hangganan ng lupain ni Manases ay pagmamay-ari ng lahi ni Efraim.)

⁹Tumuloy ito sa hangganan na papunta sa Lambak ng Kana. Sa timog ng lambak na ito ay may mga bayan na pagmamay-ari ng lahi ni Efraim, kahit na kasama ito sa mga bayan ng lahi ni Manases. Ang hangganan ng lahi ni Manases ay patuloy sa hilaga ng lambak hanggang sa Dagat ng Mediteraneo.

¹⁰Ang lupain sa timog ng ilog ay pagmamay-ari ng lahi ni Efraim at ang lupain sa hilaga ng ilog ay pagmamay-ari ng lahi ni Manases. Ang hangganan ng lupain ng lahi ni Manases sa kanluran ay ang Dagat ng Mediteraneo. Ang nasa hilaga ng lahi ni Manases ay ng lahi ni Asher, at ang nasa silangan ay ng lahi ni Isacar.

¹¹Ito ang mga bayan sa lupain ng lahi nina Isacar at Asher na ibinigay sa lahi ni Manases: ang Bet-sean, Ibleam, Dor (na tinatawag ding Nafot-dor), Endor, Taanac, Megido at ang mga bayan sa paligid nito.

¹²Ngunit hindi naangkin ng mga lahi ni Manases ang mga bayan na ito dahil hindi nila mapaalis ang mga Cananeo roon.

¹³Ngunit nang matatag na ang mga Israelita, inalipin nila ang mga Cananeo, pero hindi nila itinaboy nang lubusan ang mga ito.

¹⁴Sinabi ng mga lahi ni Jose kay Josue, “Bakit isang bahagi lang ng lupain ang ibinigay mo sa amin? Napakarami namin dahil pinagpala talaga kami ng Panginoon .”

¹⁵Sumagot si Josue, “Kung talagang marami kayo at maliit para sa inyo ang mga kabundukan ng Efraim, pumunta kayo sa mga kagubatan ng mga Perezeo at Refaimeo. Linisin nʼyo ang lugar na iyon para sa sarili ninyo.”

¹⁶Sinabi ng mga lahi ni Jose, “Ang mga kabundukan ay maliit para sa amin. At hindi namin kaya ang mga Cananeo sa kapatagan dahil may mga karwahe silang bakal. At ganoon din ang mga Cananeo sa Bet-sean at sa mga bayan sa paligid nito at sa Lambak ng Jezreel.”

¹⁷Kaya sinabi ni Josue sa mga tribo ng Efraim at Manases, na mga lahi ni Jose, “Dahil napakarami nʼyo at makapangyarihan, hindi lang isa ang bahagi nʼyo,

¹⁸magiging inyo rin ang mga kagubatan ng kabundukan. Kahit magubat ito, linisin na lang ninyo, dahil magiging inyo ito mula sa unahan hanggang sa dulo. At tiyak na maitataboy nʼyo ang mga Cananeo kahit makapangyarihan pa sila at may mga karwaheng bakal.”