Josue 24

Muling Nangako ang mga Israelita

¹Tinipon ni Josue ang lahat ng lahi ng Israel sa Shekem. Tinawag niya ang mga tagapamahala, mga pinuno, mga hukom at mga opisyal ng Israel, at lumapit sila sa presensya ng Diyos.

²Sinabi ni Josue sa lahat ng tao, “Ito ang sinasabi ng Panginoon , ang Diyos ng Israel, ‘Noon, ang mga ninuno nʼyo ay nakatira sa kabila ng Ilog Eufrates at sumamba sa ibang mga diyos-diyosan. Isa sa kanila ay si Tera na ama nina Abraham at Nahor.

³Ngunit kinuha ko si Abraham sa lugar na iyon at pinapunta papunta sa lupain ng Canaan at binigyan ng maraming lahi. Naging anak niya si Isaac,

⁴at naging anak naman ni Isaac sina Esau at Jacob. Ibinigay ko kay Esau ang kabundukan ng Seir bilang bahagi niya pero si Jacob at ang mga anak niya ay pumunta sa Ehipto.

⁵“ ‘Pagkatapos, isinugo ko sina Moises at Aaron sa Ehipto at pinadalhan ko ng mga salot ang mga Ehipsiyo, at inilabas roon ang inyong mga ninuno.

⁶Ngunit nang makarating ang mga ninuno nʼyo sa Dagat na Pula, hinabol sila ng mga Ehipsiyo na may mga kabayo at mga karwahe.

⁷Humingi ng tulong sa akin ang inyong mga ninuno at nilagyan ko ng kadiliman ang pagitan nila at ng mga Ehipsiyo. At nilunod ko agad ang mga Ehipsiyo sa dagat. Nakita mismo ng inyong mga ninuno ang ginawa ko sa mga Ehipsiyo. At tumira kayo sa disyerto nang mahabang panahon.

⁸“ ‘Pagkatapos, dinala ko kayo sa lupain ng mga Amoreo sa silangan ng Ilog Jordan. Nakipaglaban sila sa inyo, pero pinagtagumpay ko kayo sa kanila. Nilipol ko sila at nasakop nʼyo ang lupain nila.

⁹Pagkatapos, nakipaglaban sa Israel ang hari ng Moab na si Balak na anak ni Zipor. Inutusan niya si Balaam na anak ni Beor na sumpain kayo.

¹⁰Ngunit hindi ko pinahintulutan si Balaam na gawin ito sa inyo. Sa halip, binasbasan kayo ni Balaam, at iniligtas ko kayo sa kamay ni Balak.

¹¹“ ‘Pagkatapos, tumawid kayo sa Ilog Jordan at nakarating sa Jerico. Nakipaglaban sa inyo ang mga taga-Jerico, ganoon din ang mga Amoreo, Perezeo, Cananeo, Heteo, Gergeseo, Heveo at Jebuseo. Pinagtagumpay ko kayo laban sa kanila.

¹²Pinadalhan ko ng mga putakti ang dalawang haring Amoreo para itaboy sila bago pa kayo dumating. Nanalo kayo hindi dahil sa inyong mga espada at pana.

¹³Binigyan ko kayo ng lupaing hindi nʼyo pinaghirapan. Pinatira ko kayo sa mga lungsod na hindi kayo ang nagtatag. Kumakain kayo ngayon ng mga ubas at mga olibo na hindi kayo ang nagtanim.’

¹⁴“Kaya ngayon, igalang nʼyo ang Panginoon at paglingkuran nang may katapatan. Itakwil na ninyo ang mga diyos-diyosang sinasamba noon ng mga ninuno ninyo sa kabila ng Ilog Eufrates at sa Ehipto, at sa halip ay maglingkod kayo sa Panginoon .

¹⁵Ngunit kung ayaw nʼyong maglingkod sa Panginoon , mamili kayo ngayon sa araw na ito kung sino ang paglilingkuran ninyo. Maglilingkod ba kayo sa mga diyos na pinaglilingkuran ng mga ninuno nʼyo sa kabila ng Ilog Eufrates, o sa mga diyos ng mga Amoreo na ang lupain ay tinitirhan nʼyo ngayon? Ngunit para sa akin at sa pamilya ko, maglilingkod kami sa Panginoon .”

¹⁶Sumagot ang mga tao, “Wala sa isipan naming tumalikod sa Panginoon at maglingkod sa ibang mga diyos.

¹⁷Ang Panginoon na ating Diyos mismo ang naglabas sa atin at sa mga ninuno natin sa pagkaalipin doon sa Ehipto. Nakita rin natin ang mga himalang ginawa niya. Iningatan niya tayo sa paglalakbay natin sa mga bansang dinadaanan natin.

¹⁸Itinaboy niya ang mga Amoreo at ang ibang mga bansa na naninirahan sa mga lupaing ito. Kaya maglilingkod din kami sa Panginoon , dahil siya ang aming Diyos.”

¹⁹Sinabi ni Josue sa mga tao, “Hindi kayo makapaglilingkod sa Panginoon dahil siyaʼy banal na Diyos at ayaw niyang may sinasamba kayong iba. Hindi niya babalewalain ang pagrerebelde at mga kasalanan ninyo.

²⁰Kapag itinakwil nʼyo ang Panginoon at naglingkod kayo sa ibang diyos, magagalit siya sa inyo at parurusahan niya kayo. Lilipulin niya kayo kahit na nooʼy naging mabuti siya sa inyo.”

²¹Ngunit sumagot ang mga tao kay Josue, “Maglilingkod kami sa Panginoon .”

²²Sinabi ni Josue, “Kayo mismo ang mga saksi sa mga sarili nʼyo na pinili ninyong paglingkuran ang Panginoon .” Sumagot sila, “Oo, mga saksi kami.”

²³Pagkatapos, sinabi ni Josue, “Kung ganoon, itakwil nʼyo na ang mga diyos-diyosan nʼyo at paglingkuran ninyo nang buong puso ang Panginoon , ang Diyos ng Israel.”

²⁴Sumagot kay Josue ang mga tao, “Paglilingkuran namin ang Panginoon naming Diyos, at susundin namin ang mga utos niya.”

²⁵Nang araw na iyon, gumawa si Josue ng kasunduan sa mga tao roon sa Shekem, at ibinigay niya sa kanila ang mga kautusan at mga tuntunin.

²⁶Sinulat ito ni Josue sa Aklat ng Kautusan ng Diyos. Pagkatapos, kumuha siya ng malaking bato at itinayo sa puno ng terebinto malapit sa banal na lugar ng Panginoon .

²⁷At sinabi ni Josue sa lahat ng tao, “Ang batong ito ang saksi natin na nakipag-usap ang Panginoon sa atin. Magpapatunay ito laban sa inyo kung tatalikuran ninyo ang Diyos.”

²⁸Pagkatapos, pinauwi ni Josue ang mga tao sa kani-kanilang mga lupain.

Namatay si Josue at si Eleazar

²⁹Dumating ang panahon na namatay ang lingkod ng Panginoon na si Josue, na anak ni Nun sa edad na 110.

³⁰Inilibing siya sa lupain niya sa Timnat Sera, sa kabundukan ng Efraim, sa hilaga ng Bundok ng Gaas.

³¹Naglingkod sa Panginoon ang mga Israelita habang nabubuhay pa si Josue. At kahit patay na si Josue, nanatili pa rin sila sa paglilingkod sa Panginoon habang buháy pa ang mga tagapamahala ng Israel na nakaranas ng lahat ng ginawa ng Panginoon para sa Israel.

³²Ang mga buto ni Jose na dinala ng mga Israelita mula sa Ehipto ay inilibing sa Shekem, sa lupa na binili ni Jacob ng isandaang pilak sa mga anak ni Hamor na ama ni Shekem. Ang lupang itoʼy bahagi ng teritoryo na ibinigay sa mga lahi ni Jose.

³³Namatay din si Eleazar na anak ni Aaron at inilibing sa Gibea, ang bayan sa kabundukan ng Efraim, na ibinigay ni Eleazar sa anak niyang si Finehas.