Josue 8

Ang Pagsakop sa Ai

¹Sinabi ng Panginoon kay Josue, “Huwag kang matakot o kayaʼy manghina. Isama mo ang lahat ng iyong sundalo at lusubin ulit ninyo ang Ai, dahil ibinigay ko na sa inyo ang hari ng Ai, ang kanyang mga mamamayan, ang kanyang bayan at ang kanyang lupain.

²Kung ano ang ginawa ninyo sa Jerico at sa hari nito, ganoon din ang gawin ninyo sa Ai. Ngunit sa pagkakataong ito, maaari na ninyong kunin ang kanilang mga ari-arian at mga hayop para sa inyong sarili. Maghanda kayo at tambangan ninyo sila sa likod ng lungsod.”

³Kaya umalis sila Josue at ang lahat ng sundalo niya para lusubin ang Ai. Pumili si Josue ng tatlumpung libong sundalo na mahuhusay makipaglaban at pinaalis nang gabi.

⁴Ito ang bilin ni Josue sa kanila, “Magtago kayo sa likod ng lungsod, pero huwag masyadong malayo. Maging handa kayo sa paglusob kahit anong oras.

⁵Ako at ang mga kasama ko ay lalapit sa lungsod, at kapag lumabas na sila para makipaglaban sa amin, tatakas kami, gaya ng nangyari noon.

⁶Iisipin nilang natatakot kami kagaya noon, kaya hahabulin nila kami hanggang sa makalayo sila sa lungsod.

⁷Pagkatapos, lumabas kayo sa pinagtataguan nʼyo at sakupin ang lungsod. Ibibigay ito sa inyo ng Panginoon na inyong Diyos.

⁸Kapag nasakop nʼyo na ang lungsod, sunugin nʼyo ito ayon sa sinabi ng Panginoon . Tiyakin nʼyong gagawin ito ayon sa iniutos.”

⁹Pinaalis sila ni Josue, at nagtago sila sa bandang kanluran ng Ai, sa kalagitnaan ng Ai at Betel. At sina Josue naman ay nagpaiwan sa kampo nang gabing iyon.

¹⁰Kinaumagahan, maagang tinipon ni Josue ang mga sundalo niya. Pinangunahan niya sila kasama ang mga pinuno ng Israel at pumunta sila sa Ai.

¹¹Nakarating sila sa lugar na nakaharap sa lungsod, sa bandang hilaga nito, at doon sila nagtayo ng mga tolda. May lambak na nakapagitan sa kanila at sa Ai.

¹²Nagpadala si Josue ng 5,000 sundalo para tambangan ang lungsod sa bandang kanluran nito, sa kalagitnaan ng Ai at Betel.

¹³Kaya pumuwesto na ang mga sundalo. Ang ibang mga sundalo ay nasa bandang hilaga ng lungsod, at ang iba naman ay naroon sa bandang kanluran nito.

Nang gabing iyon pumunta sina Josue sa lambak.

¹⁴Nang makita ng hari ng Ai sina Josue, maaga paʼy agad-agad na siyang lumabas sa lungsod kasama ang mga tauhan niya, at pumunta sa lugar na nakaharap sa Kapatagan ng Jordan para makipaglaban sa Israel. Hindi nila alam na may lulusob sa kanila galing sa likod ng lungsod.[#8:14 : Sa Hebreo, Araba.]

¹⁵Si Josue at ang lahat ng mga kasama niya ay nagkunwaring natalo, at tumakas papuntang ilang.

¹⁶Kaya hinabol silang lahat ng kalalakihan ng Ai hanggang sa nailayo na nila ang mga ito sa lungsod.

¹⁷Lahat ng kalalakihan sa Ai at Betel ay humabol sa mga Israelita, kaya walang naiwan para ipagtanggol ang lungsod.

¹⁸Sinabi ng Panginoon kay Josue, “Ituro mo ang sibat mo sa Ai dahil ipapasakamay ko sa inyo ang lungsod na ito.” Kaya itinuro ni Josue ang sibat niya sa Ai.

¹⁹Nang ginawa niya iyon, lumabas at nagsitakbo ang mga tauhan niyang nananambang sa bayan, lumusob sila papasok sa lungsod, at dali-daling sinunog ito.

²⁰Nang lumingon ang mga taga-Ai, nakita nila ang makapal na usok sa ibabaw ng lungsod. Wala na silang matatakbuhan, dahil bigla na lang silang hinarap ng mga Israelita na hinahabol nila sa ilang.

²¹Dahil nang makita ni Josue at ng mga kasama niya na nakapasok na sa lungsod ang ibang mga kasama nila at sinunog na nila ito, bumalik sila at nilusob ang mga taga-Ai.

²²Lumusob din ang mga Israelitang pumasok sa lungsod, kaya napagitnaan nila ang mga taga-Ai. Pinatay nilang lahat ang mga ito at walang nakatakas o kayaʼy naiwang buháy sa kanila,

²³bukod lang sa hari nila. Binihag siya at dinala kay Josue.

²⁴Nang mapatay na nilang lahat ang taga-Ai na humabol sa kanila sa ilang, bumalik silang lahat sa lungsod at pinatay din ang lahat ng naiwan doon.

²⁵Nang araw na iyon, namatay ang lahat ng naninirahan sa Ai; labindalawang libo lahat, lalaki at babae.

²⁶Nanatiling nakatutok ang sibat ni Josue sa lugar ng Ai hanggang sa malipol ang lahat ng mamamayan nito.

²⁷Kinuha ng mga Israelita ang mga hayop at mga ari-arian ng lungsod, ayon sa sinabi ng Panginoon kay Josue.

²⁸Pagkatapos, ipinasunog ni Josue ang buong Ai, at hindi na ito muling maitatayo; hanggang ngayon wala nang nakatira rito.

²⁹Ibinitin ni Josue sa isang puno ang hari at pinabayaan doon maghapon. Paglubog ng araw, ipinakuha niya ang bangkay at ipinatapon sa labas ng pintuan ng lungsod. Pinatambakan nila ito ng malaking bunton ng mga bato, at hanggang ngayon ay makikita pa roon ang mga batong ito.

Binasa ang Kasunduan sa Bundok ng Ebal

³⁰Pagkatapos, nagpagawa si Josue ng altar sa Bundok ng Ebal para sa Panginoon , ang Diyos ng Israel.

³¹Ipinagawa niya ito ayon sa utos ni Moises na lingkod ng Panginoon sa mga Israelita. Nakasulat ito sa Aklat ng Kautusan ni Moises at ito ang sinasabi: “Gumawa ka ng altar na bato na hindi natabasan ng gamit na bakal.” Sa ibabaw ng altar, nag-alay sila sa Panginoon ng mga handog na sinusunog at mga handog pangkapayapaan.

³²Sa harap ng mga Israelita, kinopya ni Josue sa mga bato ang kautusang isinulat ni Moises.[#8:32 : O sa mga bato ng altar.]

³³Ang lahat ng mga Israelita, kasama ang kanilang mga tagapamahala, mga opisyal at mga hukom nila, pati ang mga dayuhang kasama nila ay tumayo sa dalawang grupo na magkaharap. Ang isang grupo ay nakatalikod sa Bundok ng Gerizim at ang isaʼy nakatalikod sa Bundok ng Ebal. Sa gitna nila ay nakatayo ang mga paring Levita na nagdadala ng Kahon ng Kasunduan. Nag-utos sa kanila noon si Moises na lingkod ng Panginoon na gawin ito sa panahong tatanggapin na nila ang pagbabasbas.

³⁴Binasa ni Josue ang kautusan, pati ang pagpapala at sumpa na nakasulat sa Aklat ng Kautusan.

³⁵Isa-isang binasa ni Josue ang mga utos ni Moises sa harap ng buong mamamayan ng Israelita, kasama na ang mga babae, anak at mga dayuhang naninirahan kasama nila.