Mga Panaghoy 3

¹Isa ako sa mga nakaranas ng parusa ng Panginoon

dahil sa kanyang galit.

²Pinalayas niya ako at pinalakad

sa dilim sa halip na sa liwanag.

³Paulit-ulit niya akong pinarusahan

araw at gabi.

⁴Pinahina ang aking katawan

at binali ang aking mga buto.

⁵Sinalakay niya ako at ibinilanggo

sa paghihirap at pagdurusa.

⁶Inilagay sa kadiliman

na parang isang tao na matagal nang patay.

⁷Kinadena niya ako at ikinulong

upang hindi makatakas.

⁸Kahit na humingi ako ng tulong,

hindi niya ako pinakinggan.

⁹Hinarangan niya ng pader na bato ang aking landas,

at pinaliku-liko ang aking dadaanan.

¹⁰Para siyang oso o leon na nag-aabang

para salakayin ako.

¹¹Kinaladkad ako palayo sa daan

at pagkatapos ay nilapa at iniwan.

¹²Iniumang niya ang kanyang pana

at itinutok sa akin.

¹³Pinana niya ako

at tumagos ito sa puso ko.

¹⁴Naging katawa-tawa ako sa aking mga kalahi.

Buong araw nila akong inaawitan ng pangungutya.

¹⁵Pinuno niya ako ng labis na kapaitan

at binigyan ng inuming may lason.

¹⁶Nabungi ang mga ngipin ko dahil pinakain niya ako ng graba,

at saka tinapak-tapakan niya ako sa lupa.

¹⁷Inalis niya ako sa maganda kong kalagayan

at hindi ko na naranasan ang kasaganaan.

¹⁸Nawala na ang karangalan ko

at lahat ng pag-asa sa Panginoon .

¹⁹Napakasakit isipin ang mga paghihirap

at pagdurusa kong tulad ng mapait na lason.

²⁰At kung palagi ko itong iisipin,

manghihina ako.

²¹Ngunit nanunumbalik ang aking pag-asa

sapagkat aking naalala:

²²Dahil ang pag-ibig at awa ng Panginoon

ay walang katapusan

kaya hindi tayo tuluyang nalipol.

²³Araw-araw ay ipinapakita niya ang kanyang habag.

Dakila ang katapatan ng Panginoon !

²⁴Kaya sinabi ko sa aking sarili, “Ang Panginoon ang lahat para sa akin,

kaya sa kanya ako nagtitiwala.”

²⁵Mabuti ang Panginoon

sa mga nagtitiwalaʼt umaasa sa kanya.

²⁶Mabuting matiyagang maghintay

sa pagliligtas ng Panginoon .

²⁷Mabuti para sa isang tao na kahit bata pa

ay matuto nang makipamatok at sumunod.

²⁸Kapag tinuturuan tayo ng Panginoon ,

tumahimik tayo at pag-isipan itong mabuti.

²⁹Magpakumbaba tayo sa harap ng Panginoon

at huwag mawalan ng pag-asa.

³⁰Kapag sinampal ka sa isang pisngi, ibigay mo pa ang kabila.

At tanggapin mo rin ang pangungutya ng iyong mga kaaway.

³¹Dahil hindi tayo itatakwil

ng Panginoon magpakailanman.

³²Ngunit kahit nagpaparusa siya, ipinapakita pa rin niya ang kanyang habag

at ang napakalakiʼt walang hanggan niyang pag-ibig sa atin.

³³Dahil hindi siya natutuwa

na tayoʼy saktan o pahirapan.

³⁴Ayaw ng Panginoon na apihin ang mga bilanggo,

³⁵o balewalain ang karapatan ng tao.

³⁶Ayaw din ng Kataas-taasang Diyos

na ipagkait ang katarungan sa sinumang tao.

Nakikita niya ang lahat ng ito.

³⁷Walang anumang bagay na nangyayari

na hindi pinahihintulutan ng Panginoon.

³⁸Hindi baʼt ang Kataas-taasang Diyos ang nagpapasya

kung mangyayari ang isang bagay,

mabuti man ito o masama?

³⁹Kaya bakit tayong mga taoʼy magrereklamo

kung pinarurusahan tayo dahil sa ating kasalanan?

⁴⁰Ang dapat ay siyasatin natin ang ating pamumuhay

at magbalik-loob sa Panginoon .

⁴¹Buksan natin ang ating mga puso at itaas ang ating mga kamay sa Diyos na nasa langit at sabihin:

⁴²“Panginoon , nagkasala po kami at naghimagsik sa inyo,

at hindi nʼyo kami pinatawad.

⁴³“Nagalit kayo sa amin at inusig kami

at walang awang pinatay.

⁴⁴Tinakpan nʼyo ng mga ulap ang inyong sarili

upang hindi nʼyo marinig ang aming mga panalangin.

⁴⁵Ginawa nʼyo kaming parang basura

sa paningin ng ibaʼt ibang bansa.

⁴⁶“Kinutya kami ng lahat

ng aming mga kaaway.

⁴⁷Dumanas kami ng matinding takot, panganib,

pagkasira at kapahamakan.”

⁴⁸Napaluha ako

dahil sa kapahamakang

sinapit ng aking mga kalahi.

⁴⁹Patuloy akong iiyak,

at dadaloy ang aking luha nang walang tigil,

⁵⁰hanggang sa tumunghay

ang Panginoon mula sa langit.

⁵¹Labis akong nasaktan sa sinapit

ng mga kababaihan ng aking lungsod.

⁵²Hinahabol ako ng aking mga kaaway

na parang isang ibon,

kahit na wala naman akong nagawang kasalanan sa kanila.

⁵³Sinubukan nila akong patayin

sa pamamagitan ng pambabato at paghulog sa balon.

⁵⁴Halos malunod na ako

at ang akala koʼy mamamatay na ako.

⁵⁵Doon sa ilalim ng balon,

tumawag ako sa inyo Panginoon .

⁵⁶Pinakinggan nʼyo ang pagmamakaawa ko

at paghingi ng tulong.

⁵⁷Dumating kayo nang akoʼy tumawag

at sinabi ninyong huwag akong matakot.

⁵⁸Tinulungan nʼyo ako sa aking problema, Panginoon,

at iniligtas nʼyo ang aking buhay.

⁵⁹Panginoon , nakita ninyo ang kasamaang ginawa sa akin ng aking mga kaaway,

kaya bigyan ninyo ako ng katarungan.

⁶⁰Alam ninyo kung paano nila ako pinaghigantihan

at ang lahat ng kanilang binabalak laban sa akin.

⁶¹Napakinggan nʼyo, O Panginoon , ang kanilang mga pangungutya

at alam ninyo ang lahat ng binabalak nila laban sa akin.

⁶²Buong araw nilang pinag-uusapan

ang pinaplano nilang masama laban sa akin.

⁶³Masdan nʼyo, nakaupo man sila o nakatayo,

kinukutya nila ako sa pamamagitan ng pag-awit.

⁶⁴Panginoon , parusahan nʼyo sila

ayon sa kanilang ginagawa.

⁶⁵Patigasin nʼyo ang mga puso nila

at sumpain nʼyo sila.

⁶⁶Sa galit nʼyo Panginoon , habulin nʼyo sila

at lipulin nang mawala na sila sa mundong ito.